Yozue 13 - WE NU GALE 1995

Tala nùnɔ kɛ obe Israɛlɛ wa tɛ bà gɔ ni

¹ Olo nɛ la sabɛlɛ dɛlɛ wena, nɛ Yozue dɛa gbɛlɛ wena, nɛ NWA tɔ̃ hã a na: “Mɔ dɛ gbɛlɛ wena, nɛ nde nùnɔ kɛ nɛ tɛ bà gɔɛ ni, ma 'bana wena.

^2-3 Ma 'bana na, nɛ ba nùi 'da Ofilisti do lenɔ 'da wa mɔlɔ ni. Olenɔ ni ma kɛ: Gaza, Asdɔdɛ, Askaloni, Gatɛ do Ekroni. Nɛ ma 'bana 'bɔ a nùi 'da Ogesurɛ, kɛ wa si 'biti gba wese, do nùi 'da Oavi, si ba gɔtɔ. Nɛ ma 'bana 'bɔ a nùi, yolo nu lì Sihɔrɛ tɛ ngbala Ezipeto, gbaa we hɔ tɛ Ekroni, kɛ ma nyɛlɛ dɛ si gbãlã ngɔ wena ni.

⁴ Dɛ ngɔ nɛ, ma 'bana 'bɔ na, nɛ ba nùi 'da Okanana vɛ̃, yolo tɛ Ara, kɛ ma ngɔ nùi 'da Osidoni, gbaa we hɔ tɛ Afɛkɛ, li ngbala nùi 'da Oamori.

⁵ Nɛ nù Gebalɛ do mbee tɛ nù Libanɛ 'bana 'bɔ, yolo tɛ Bala-Gadɛ, tɛ ti nyanga kala Hɛrmoni, gbaa we hɔ tɛ Lɛbo-Hamatɛ,

⁶ mba do nùnɔ 'da Osidoni, kɛ lenɔ 'da wa ma ngɔ kala ngbala Libanɛ do Misrɛfɔtɛ-Maimɛ ni. Fala obe Israɛlɛ wa le sɛ ngɔ nùnɔ ni, nɛ mi ndaka sɛ owinɔ ni ngɔ nùnɔ 'da wa. Nɛ mɔ hã sɛ nùnɔ ni vɛ̃ hã obe Israɛlɛ, nɛ́ kɛ mi ba zi do nu mi ni.

⁷ Ma wia na, mɔ kɛ̃ nùnɔ ni hã tala nu kpala obe Israɛlɛ kusi, do mbee nu kpala Manase kɛ wa 'bana ni, hã wa ba ma do mɔ wa.”

Mɔizɛ kɛ̃a sanga nùi kulu lì Yɔrdanɛ si 'biti gba wese

⁸ Zi dati, nɛ Mɔizɛ wi dɛa toe 'da NWA, kɛ̃a nùi hã nu kpala Rubɛnɛ, do Gadɛ, do mbee nu kpala Manase tɛ kulu lì Yɔrdanɛ, si 'biti gba wese, nɛ wa ba ma do mɔ́ wa.

⁹ Nùnɔ do lenɔ kɛ wa ba zi ma ni, mɛ a nùi vɛ̃ kɛ ma nɛa gbaa si ba gɔtɔ, nɛ ma Sɔkpɔ do le Arɔɛrɛ tɛ nu gbangɔlɔ̃ lì Arnoni, do le ma dɛ gbogbo gbangɔlɛ̃ ni. Nɛ ma mba do mbɛ nùi ngɔ kala sanga tɛ ngba Medɛba do Diboni.

¹⁰ Nɛ ma mba 'bɔ do lenɔ 'da Sihoni, nwa ngɔ Oamori, kɛ a ɔ zi kɔ le Hɛsɛboni, nɛ nùi 'da a ndua zi nyɛlɛ wena, si 'biti gba wese, we Sɔkpɔ do nùi 'da Oamoni ni.

¹¹ Dɛ ngɔ nɛ, ma mba zi 'bɔ do le Galadɛ, do nù Gesurɛ do nù Maaka, do kala Hɛrmoni, do nù Basanɛ vɛ̃ we hɔ Salka.

¹² Nùi 'da nwa Ɔgɛ mɛ zi 'bɔ a nù mɔ́ wa. Ɔgɛ zi a mbe kpo sanga tala du winɔ, kɛ wa sa zi li wa na Orɛfa. Nɛ a dungu nwa kɔ le Asɛtarɔtɛ, do Edrei tɛ ngɔ nù Basanɛ. Mɔizɛ nɛa ngɔ Owele nùnɔ ni, nɛ a ndaka wa kɔ lenɔ 'da wa.

¹³ Nɛ nde obe Israɛlɛ wa ndàkà zi owi kɔ le Gesurɛ, do Maaka gɔ. Nɛ winɔ ni, wa 'bana ɔ dɛ sanga obe Israɛlɛ ni tia do sɔɛ gɛ.

¹⁴ Nɛ Mɔizɛ hã̀ nù hã nu kpala Levi gɔ. Mba gɔ, NWA Gale tɔ̃a zi na, wa kpa sɛ mbee tɛ nu dɔnggamɛnɔ kɛ owinɔ wa dɔ we dɔnggɔ do ɛ NWA Gale 'da obe Israɛlɛ ni.

Nùi kɛ Mɔizɛ ba hã nu kpala Rubɛnɛ

¹⁵ Mɔizɛ hã mbee tɛ nùi 'da Oamori hã nu kpala Rubɛnɛ.

¹⁶ Nùi 'da wa ma nɛa gbaa si ba gɔtɔ, nɛ ma Sɔkpɔ do le Arɔɛrɛ tɛ nu fua lì Arnoni, do le kɛ ma dɛ gbogbo gbangɔlɛ̃ ni. Nɛ ma mba do mbɛ nùi ngɔ kala kɛ zã le Medɛba.

¹⁷ Nɛ Hɛsɛboni do lenɔ vɛ̃ tɛ mbɛ nùi ngɔ kala ni, mɛ zi 'bɔ a nùi 'da wa. Lì lenɔ ni ma kɛ: Diboni, Bamɔtɛ-Bala, Bɛtɛ-Bala-Meoni,

¹⁸ Yahasi, Kɛdemɔtɛ, Mefatɛ,

¹⁹ Kiriataimɛ, Sibma, Serɛtɛ-Saharɛ, kɛ ngɔ 'dingba tɔ̃ɛ kɔ gbangɔlɛ̃,

²⁰ do Bɛtɛ-Peorɛ kɛ ma kpɔa nu ngbɛ ɛ do kala Pisga, do Bɛtɛ-Yɛsimɔtɛ.

²¹ Nɛ nùi 'da Sihoni, nwa ngɔ Oamori, kɛ a ɔ zi tɛ Hɛsɛboni ni, zi vɛ̃ a kɛ 'da wa. Sihoni zi do 'bili tɛ nù mɔlɔ, kɛ ogã wi ngɔ Omadianɛ wa zɔ zi mɔ tɛ nɛ hã a ni. Lì ogã winɔ ni zi a: Evi, Rekɛme, Surɛ, Hurɛ do Reba. Mɔizɛ nɛa ngɔ nwa Sihoni, do Omadianɛ mɔlɔ ni, nɛ a ba le 'da wa.

²² Balamɛ, wi tɔ̃ wenɔ ma dɛ sɛ tɛ̃ ɛ do 'do, kɛ li baa a a Beɔrɛ ni, a zi kɔ owinɔ kɛ obe Israɛlɛ wa gbɛa wa ni.

²³ Li ngbala nù 'da nu kpala Rubɛnɛ, si 'biti gɛ̃a wese, zi a lì Yɔrdanɛ. Gã lenɔ, do be lenɔ vɛ̃ kɛ wa sa li nɛ di ni ni, mɛ a nù kɛ Mɔizɛ ba hã owi nu kpala Rubɛnɛ do mɔ́ wa.

Nùi kɛ Mɔizɛ ba hã nu kpala Gadɛ

²⁴ Mɔizɛ hã mbee tɛ nùnɔ kɛ a ba zi ma ni, hã nu kpala Gadɛ.

²⁵ Nùi 'da wa mba zi le Yazɛrɛ, do lenɔ ngɔ nù Galadɛ ni vɛ̃, do kpo mbee bɔa 'bili tɛ nùi 'da Amoni, gbaa we hɔ tɛ Arɔɛrɛ, dɔ̃ɔ do Raba.

²⁶ Nùi 'da wa ndua yolo tɛ Hɛsɛboni, gbaa we hɔ tɛ Ramatɛ-Mispe, do le Bɛtonimɛ, nɛ ma yolo tɛ Mahanaimɛ gbaa we hɔ tɛ Lo-Dabarɛ.

²⁷ Nɛ dɛ ngɔ ki ni, nu kpala Gadɛ kpa 'bɔ nùi kɔ gbangɔlɔ̃ Yɔrdanɛ, si 'biti gba wese gbaa we hɔ tɛ gã Ndɔ Genezarɛtɛ si gbãlã ngɔ. Li lenɔ kɔ 'bili tɛ nùi ni a: Bɛtɛ-Harmɛ, Bɛtɛ-Nimra, Sukɔtɛ do Safoni. Mɛ a tala lenɔ 'da Sihoni, nwa 'da Oamori.

²⁸ Gã lenɔ do be lenɔ vɛ̃, kɛ wa sa li nɛ di ni ni, mɛ a nùi kɛ Mɔizɛ ba hã owi nu kpala Gadɛ do mɔ́ wa.

Nùi kɛ Mɔizɛ ba hã mbee nu kpala Manase

^29-30 Mɔizɛ hã nùi si gbãlã ngɔ, gbaa we hɔ tɛ Mahanaimɛ, hã mbee nu kpala Manase. Nùi ni ma mba do 'bili tɛ nù Basanɛ, do 'bu lenɔ gazɛlɛ kɛ Yairɛ ba zi ma dati ni. Nwa ngɔ nùi ni zi a Ɔgɛ.

³¹ Nɛ Omanase, wa kpa 'bɔ nù Galadɛ, do le Asɛtarɔtɛ, do Edrei. Lenɔ bɔa ni, mɛ a ã gbɛlɛ gã lenɔ 'da nwa Ɔgɛ. Nɛ Mɔizɛ hã nùi ni vɛ̃ hã mbee nu kpala Manase, kɛ yaa wa zi a Makirɛ, be 'da Manase ni.

³² Mɔizɛ kɛ̃a nùnɔ vɛ̃, kɛ si 'biti gba wese tɛ nu lì Yɔrdanɛ do Yeriko, hã ombe nu kpala Israɛlɛ. Do 'da fala ni, nɛ nde a zi a ngɔ mbɛ nù Moabɛ.

³³ Nɛ nde Mɔizɛ hã̀ zi nù hã nu kpala Levi gɔ. Nɛ a tɔ̃ hã wa na, wa kpa sɛ mbee tɛ dɔnggamɛnɔ kɛ obe Israɛlɛ wa hã hã NWA Gale 'da wa ni.