Yozue 11 - WE NU GALE 1995

Obe Israɛlɛ wa bi owi sɛnɛ wa tɛ Merɔmɛ

¹ Yabinɛ, nwa ngɔ le Hasɔrɛ nɛa we zele na, Yozue nɛa ngɔ owi sɛnɛ a vɛ̃ ni, nɛ a tombo hã onwa ngɔ lenɔ kɛ zã a ni na, wa ngɛmɛ li ngba wa do sodanɔ 'da wa we bi obe Israɛlɛ. Yabinɛ tumba toe ni hã Yobabɛ, nwa ngɔ le Madoni, nɛ a tombo 'bɔ hã nwa ngɔ le Simroni, do nwa ngɔ le Akɛsafɛ,

² do onwa ngɔ lenɔ tɛ ngɔ kala si gbãlã ngɔ, do wanɔ ngɔ lenɔ kɔ gbangɔlɔ̃ lì Yɔrdanɛ, kɛ mɔ yolo nu gã lì Genezarɛtɛ, nɛ nde ma si ba gɔtɔ, do wanɔ ngɔ lenɔ nyanga kalanɔ, do wanɔ nu gã lì dɔ̃ɔ do Dɔrɛ, si 'biti gɛ̃a wese ni.

³ Yabinɛ tumba 'bɔ to hã Okanana, kɛ wa zi tɛ kulu lì Yɔrdanɛ si 'biti gba wese, do wanɔ tɛ kulu lì Yɔrdanɛ si 'biti gɛ̃a wese. Wi zi a Oamori, Ohiti, Opɛrizi, Oyebuzi kɛ wa ɔ ngɔ kalanɔ, do Ohivi kɛ wa ɔ ti nyanga kala Hɛrmoni, kɛ ma ngɔ nù Mispa ni.

⁴ 'Da fala Onwanɔ ni vɛ̃ wa kpa toe ni, nɛ wa le wala do gili osodanɔ 'da wa kɛ wa dɛlɛ ɔ nɛ gbãlã kɛnzɛ nu gba lì ni. Nɛ wa kala 'bɔ ogili ngilingili do ombalata we gbɔtɔ ma.

⁵ Onwanɔ ni vɛ̃ wa ngɛmɛ li osodanɔ 'da wa, nɛ wa 'dafa tɛ wa tɛ nu be lì Merɔmɛ, we bi obe Israɛlɛ.

⁶ Nɛ NWA Gale tɔ̃ hã Yozue na: “Mɔ tɛ dɛ̃ kili wa gɔ. We kɛ bindɛ do sa gɛ, nɛ mi 'dɔlɔ sɛ wa vɛ̃ hã nɛ obe Israɛlɛ. Nɛ mi gbɛ sɛ wa vɛ̃. Nɛ 'do nɛ, nɛ mɔ 'bili sɛ fɛlɛ nzabele nyanga mbalatanɔ 'da wa, nɛ mɔ fi we tɛ ongilingilinɔ 'da wa.”

⁷ Na mɛ ni, Yozue do owinɔ 'da a wa nɛa nu be lì Merɔmɛ, nɛ wa bi Onwanɔ ni do gbanga nɛ.

⁸ Nɛ NWA Gale dɛa na, obe Israɛlɛ wa nɛ ngɔ owi sɛnɛ wa. Nɛ obe Israɛlɛ wa gbɛa wa, nɛ wa ndaka wanɔ si gbãlã ngɔ gbaa, we hɔ tɛ gã le Sidoni, do Misrɛfɔtɛ-Maimɛ. Nɛ wa ndaka 'bɔ wanɔ si 'biti gba wese, we hɔ tɛ kɔ gbangɔlɔ̃ lì Mispe. Wa gbɛa wa vɛ̃, nɛ wele kpo kɔ wa kpàsà gɔ.

⁹ Nɛ Yozue 'bili fɛlɛ nzabele nyanga ombalatanɔ, nɛ a fi we tɛ ngilingilinɔ 'da wa nɛ́ kɛ NWA Gale ba zi do nu ɛ hã a ni.

Obe Israɛlɛ wa ba le Hasɔrɛ

¹⁰ Bole ni ia do'do, nɛ Yozue do owinɔ 'da a wa kpolo tɛ wa, nɛ wa nɛ we bi le Hasɔrɛ. Ĩ na, do 'da fala ni, nɛ nde le Hasɔrɛ zi a gã le nwa ngɔ gele lenɔ vɛ̃ si gbãlã ngɔ i ni. Nɛ Yozue do owinɔ 'da a wa bi ma, nɛ wa ba ma, nɛ wa gbɛ nwa ngɔ nɛ,

¹¹ do owinɔ kɔ le ni vɛ̃. Wa dɔa le vɛ̃, nɛ wa là wele tabi sa'de kpo do tunu li a gɔ.

¹² Yozue do owinɔ 'da a, wa kala olenɔ 'da Onwanɔ vɛ̃ kɛ wa ngɛmɛ ngba wa ni, nɛ wa gbɛ Onwanɔ do owi kɔ lenɔ ni vɛ̃. Wa dɛa nɛ́ kɛ Mɔizɛ, wi dɛa toe 'da NWA Gale ba zi do nu ɛ ni.

¹³ Nɛ nde wa dɔ̃ lenɔ ngɔ kalanɔ ni gɔ. Wa dɔa tati a Hasɔrɛ iko.

¹⁴ Nɛ wa kala onadalamɛnɔ, do mɛnɔ kɔ lenɔ ni vɛ̃ do mɔ wa. Nɛ wa gbɛ owinɔ vɛ̃, nɛ wa là wele kpo do tunu li a gɔ.

¹⁵ Mɛ zi a mbula kɛ NWA Gale ba hã Mɔizɛ, nɛ Mɔizɛ tɔ̃ zi ma hã Yozue, nɛ Yozue dɛa ma vɛ̃.

Yozue kala nùnɔ vɛ kɛ NWA Gale tumba a na a kala ni

¹⁶ Yozue do owinɔ 'da a wa ba nùi vɛ̃, yolo si gbãlã ngɔ gbaa we hɔ si ba gɔtɔ. Wa ba nù ngɔ kalanɔ i, do kɛ tɛ li gba zɔ̃ Negɛvɛ, do nù Gosɛnɛ, do nyanga kalanɔ si 'biti gɛ̃a wese, do kɔ gbangɔlɔ̃ lì Yɔrdanɛ.

^17-18 Wa kala 'bɔ nùnɔ vɛ̃ ngbala kala Halakɛ, kɛ ma dɔ̃ɔ do Seirɛ si ba gɔtɔ ni, do Bala-Gadɛ kɔ gbangɔlɔ̃ Libanɛ, tɛ nyanga kala Hɛrmoni, si gbãlã ngɔ. 'Do bole kɛ obe Israɛlɛ wa bi do gele Onwanɔ ni nyɛlɛ zi wena, nɛ nde wa nɛa ngɔ Onwanɔ ni, nɛ wa gbɛ wa vɛ̃.

¹⁹ Nɛ wa la tati a Ohivi kɛ wa ɔ tɛ Gabaoni, we kɛ wa dɛa na do wa ni. Nɛ nde tala lenɔ vɛ̃ kɛ obe Israɛlɛ wa bi zi ma ni, wa ba ma.

²⁰ Mba gɔ, NWA Gale dɛa zi na, owinɔ ni vɛ̃ wa ɔ do nga zu we bi do obe Israɛlɛ. Na mɛ ni, obe Israɛlɛ wa wè zi we ĩ 'bako hã wa gɔ. Ma hã wa kumu zi wa vɛ̃, ɔ nɛ kɛ NWA Gale do tɛ̃ a ba zi do nu a hã Mɔizɛ ni.

²¹ Do kpo 'da fala ni, nɛ Yozue do owinɔ 'da a, wa nɛ zi we bi ogba du winɔ, kɛ wa sa li wa na Oanakɛ. Owinɔ ni wa ɔ zi tɛ ngɔ kalanɔ tɛ Hebroni, Dɛbirɛ do Anabɛ, nɛ ombee nɛ wa ɔ zi tɛ ngɔ kalanɔ ngɔ nù Yuda do Israɛlɛ. Nɛ obe Israɛlɛ wa kumu wa, nɛ wa 'danga lenɔ 'da wa vɛ̃.

²² Nɛ Anakɛ kpo 'bànà ngɔ nù Yuda do Israɛlɛ gɔ. Be tala wa 'bana zi tati nɛ dɛ kɔ le Gaza, Gatɛ do Asdɔdɛ iko.

²³ Na mɛ ni, Yozue ba nùi vɛ̃, nɛ́ kɛ NWA Gale ba zi do nu a hã Mɔizɛ ni. 'Do nɛ, nɛ Yozue kɛ̃a sanga nùi dɛ kɔ̃ nu kpala obe Israɛlɛ do mɔ́ wa. Nɛ wa kpia tɛ wa olo bolonɔ kɛ wa bi ni.