Yozue 10 - WE NU GALE 1995

Obe Israɛlɛ wa bi Oamori, nɛ wa nɛ ngɔ wa

¹ Do 'da fala ni, Adoni-Sedɛkɛ zi a nwa ngɔ le Yeruzalɛmɛ. Nɛ a zila na, Yozue do owinɔ 'da a, wa ba le Ai, nɛ wa 'danga ma vɛ̃, nɛ́ kɛ wa dɛa zi do le Yeriko ni. Wa dɔa ma, nɛ wa gbɛ winɔ kɔ nɛ ni, do nwa ngɔ wa vɛ̃. Nɛ a zele 'bɔ na, owi Gabaoni wa dɛa na do obe Israɛlɛ, kɔ wa ɔ dɛ sanga wa.

² Nɛ sakoe ni hã kili hã owi Yeruzalɛmɛ wena. Mba gɔ, le Gabaoni gã zi nɛa ngɔ Ai. Nɛ mbe gele le nwa kɛ ma gã zi nɛa ngɔ Gabaoni ni bina. Nɛ owi wili Gabaoni wa nganda zi li bolo wena.

³ Adoni-Sedɛkɛ zila ní, nɛ a tombo to hã Hohamɛ, nwa ngɔ Hebroni, do Piramɛ, nwa ngɔ Yarmutɛ, do Yafia, nwa ngɔ Lakisi, do Dɛbirɛ, nwa ngɔ Egloni na,

⁴ wa tɛ, kɔ wa gala ɛ we bi owi Gabaoni, we kɛ wa dɛa na do Yozue do obe Israɛlɛ.

⁵ Na mɛ ni, nɛ onwa ngɔ nù Amori mɔlɔ ni, wa mba li ngba wa. Wi zi a nwa ngɔ Yeruzalɛmɛ, Hebroni, Yarmutɛ, Lakisi do Egloni. Wa ba zã zu owi Gabaoni, nɛ wa mba do ogili sodanɔ 'da wa vɛ̃, nɛ wa linggi owi Gabaoni we bi wa.

⁶ Kɔ owi Gabaoni wa nɛa we zɔ ní, nɛ wa tombo to hã Yozue tɛ fala ɔi 'da a tɛ Gilgalɛ i na: “Mɔ tɛ èlè lɛ owi dɛa tonɔ 'da mɔ gɔ. Mɔ tɛ́ dɔ̃, kɔ mɔ kpásá lɛ, we kɛ onwa Amori vɛ̃ kɛ wa ɔ ngɔ kalanɔ i ni, wa ba zã zu bi lɛ.”

⁷ Yozue nɛa we zele ní, nɛ a kulu ngɔ do onwa bolonɔ, do osodanɔ 'da a vɛ̃ do ti, we nɛ we bi Oamori.

⁸ Nɛ nwa tɔ̃ hã a na: “Tɛ dɛ̃ kili wa gɔ! Mi 'dɔlɔ sɛ wa hã mɔ. Wele kpo kɔ wa yóló sɛ dati mɔ gɔ.”

⁹ Yolo tɛ Gilgalɛ, Yozue do osodanɔ 'da a wa nɛa do tũ, nɛ wa hɔ Gabaoni i, nɛ wa bi Oamori do gbanga nɛ.

¹⁰ Nɛ NWA dɛa na zu Oamori vĩ. Nɛ obe Israɛlɛ wa nɛa ngɔ wa dɛ Gabaoni ni, nɛ wa ndaka 'do wa tɛ kũ kala dɛ tɛ le Bɛtɛ-Horoni. Nɛ wa bi wa fai, nɛ wa kã wa gbaa we hɔ tɛ le Azeka do Makeda.

¹¹ Fala Oamori wa yu obe Israɛlɛ, nɛ wa zĩlĩ kala 'do le Bɛtɛ-Horoni, nɛ NWA tumba gba kolo gbãlã mũlũ dɛ ngɔ wa, nɛ ma ma wa gbaa we hɔ tɛ Azeka. Nɛ gbãlã mũlĩ gbɛa Oamori nɛa ngɔ kɛ obe Israɛlɛ wa gbɛa do wa ni.

¹² Do ngba soe kɛ NWA dɛa na, obe Israɛlɛ wa nɛ ngɔ Oamori ni, nɛ Yozue yula dɛ dati obe Israɛlɛ, nɛ a tɔ̃ hã NWA na: “NWA, mɔ dɛ́ na, wese yolo nù dɛ ngɔ Gabaoni, nɛ zɛkɛ yolo nù dɛ ngɔ gbangɔlɔ̃ Ayaloni.”

¹³ Nɛ wese yula nù dɛ gbogbo li nza, nɛ ma là gɔ 'do tũ kpo. Nɛ zɛkɛ yɛ̀kɛ̀ tɛ̃ ɛ gɔ gbaa na, obe Israɛlɛ wa nɛ ngɔ owi sɛnɛ wa. Lɛnggɛ gɛ, nɛ wia we tɔlɔ ma kɔ 'buki kɛ li nɛ a “'Buku 'da Wi bɔlɔ zu” ni.

¹⁴ Zɔ kɛ na NWA zele nu wele li nù gɛ nɛ́ kɛ a zila nu Yozue ni, ma dɛ̃ zɛ́ mbe tɛ̃ ɛ dati gɔ, nɛ ma dɛ̀ 'bɔ mbé tɛ̃ ɛ 'do nɛ gɔ. NWA zi fala nɛ kpo do obe Israɛlɛ, we bi owi sɛnɛ wa.

¹⁵ 'Do kɛ Yozue do owinɔ 'da a wa nɛa ngɔ Oamori ni, nɛ wa si dɛ fala ɔi 'da wa tɛ Gilgalɛ i.

Yozue gbɛa onwa ngɔ nù Amori do mɔlɔ nɛ

¹⁶ Do 'da fala ni, onwa ngɔ nù Amori do mɔlɔ nɛ wa yu, nɛ wa usu tɛ wa kɔ ta tɛ le Makeda.

¹⁷ Nɛ wele kpo kpa wa i mɔ, nɛ a nɛ, nɛ a tɔ̃ we nɛ hã Yozue.

¹⁸ Yozue nɛa we zele ní, nɛ a tombo owinɔ 'da a na wa nɛ, hã wa kimili ta, hã wa kpe nu wa dɛ kɔ ta ni, nɛ wa a Owele we zɔ mɔ tɛ nɛ.

¹⁹ Nɛ Yozue tɔ̃ hã wa na: “We duzu nɛ, nɛ tɛ 'bànà dɛ di ni gɔ, nɛ ndáká 'do tala owi sɛnɛ lɛ. Nɛ nɛ tɛ hã̀ wala hã wa we hɔ kɔ lenɔ 'da wa gɔ. Mba gɔ, NWA Gale 'da lɛ, a 'dɔlɔ wa hã lɛ.”

²⁰ Na mɛ ni, Yozue do obe Israɛlɛ wa gbɛ owi sɛnɛ wa wena. Winɔ kɛ wa fè gɔ tati a ombe kpo kpo sanga wa, kɛ wa yu, nɛ wa hɔ kɔ lenɔ 'da wa kɛ gba ngboe zĩ wa takpa ni.

²¹ Obe Israɛlɛ wa gbɛa owi sɛnɛ wa wena do'do, nɛ wa vɛ̃ wa kpolo tɛ wa dɛ 'da Yozue tɛ fala ɔi 'da wa tɛ Makeda i do lɔa tɛ wa. Nɛ kili ba tala winɔ ngɔ nùi ni vɛ̃, nɛ wele kpo wè zi 'bɔ we tulu wa gɔ.

²² Dɛ 'do nɛ, nɛ Yozue ba nu ɛ na, wa fĩ nu kɔ ta, hã wa fo onwa ngɔ nù Amori mɔlɔ ni dɛ nza, kɔ wa tɛ do wa hã ɛ.

²³ Wa dɛa nɛ́ kɛ Yozue tɔ̃a ni, nɛ wa nɛa do Onwanɔ ni hã a. Wi zi a nwa ngɔ Yeruzalɛmɛ, Hebroni, Yarmutɛ, Lakisi do Egloni.

²⁴ Wa tɛa do wa hã Yozue, nɛ a sa mɔ hã obe Israɛlɛ vɛ̃, nɛ a tɔ̃ hã owi ngɔ sodanɔ na, wa tɛ, hã wa ma ti gɛlɛ Onwanɔ ni.

²⁵ Wa dɛa nɛ kɛ Yozue tɔ̃a ni, nɛ a tɔ̃ hã wa na: “Nɛ tɛ mbɔkɔ gɔ, nɛ nɛ tɛ dɛ̃ kili gɔ. Nɛ ɔ́ do ngawi, nɛ nɛ kpã́lã́ sila nɛ! We kɛ NWA a dɛ sɛ ní do owi sɛnɛ nɛ vɛ̃.”

²⁶ 'Do nɛ, nɛ Yozue ba nu ɛ na, wa gãlã Onwanɔ ni nu ote mɔlɔ, nɛ wa gbɛ wa, nɛ wa la wa dɛ di ni gbaa gɛa wese.

²⁷ Wese lia nù, nɛ Yozue ba nu ɛ na, wa zumu wɔlɔ wa, kɔ wa da ma dɛ kɔ ta wa usu zi tɛ wa kɔ nɛ ni. Wa dɛa ni, nɛ wa kpe nu nɛ do ga ta, nɛ ma 'bana dɛ di ni fai.

Yozue do obe Israɛlɛ wa ba tala nù Amori

²⁸ Do kpo tũi ni, Yozue do owinɔ 'da a wa ba le Makeda. Nɛ wa gbɛ nwa ngɔ nɛ, do owinɔ vɛ̃. Nɛ wele kpo 'bànà do tunu li ɛ gɔ. Yozue dɛa do nwa ngɔ Makeda nɛ́ kɛ a dɛa zi do nwa ngɔ Yeriko ni.

²⁹ 'Do nɛ, nɛ Yozue do obe Israɛlɛ wa kulu ngɔ Makeda, nɛ wa la dɛ kɔ le Libna, nɛ wa bi ma.

³⁰ Nɛ nwa 'dɔlɔ 'bɔ le ni, do nwa ngɔ nɛ hã wa. Wa gbɛa owi kɔ nɛ, nɛ wa là wele kpo gɔ. Wa gbɛa nwa ngɔ nɛ, nɛ́ kɛ wa gbɛa zi do nwa ngɔ Yeriko ni.

³¹ 'Do ki ni, nɛ Yozue do obe Israɛlɛ wa kulu ngɔ Libna, nɛ wa la dɛ kɔ le Lakisi, nɛ wa linggi le, nɛ wa bi ma.

³² Wa bi fai, nɛ fala sa 'do ki ni, nɛ NWA 'dɔlɔ le Lakisi hã wa. Nɛ obe Israɛlɛ wa gbɛa owinɔ vɛ̃, nɛ́ kɛ wa gbɛa zi do owi Libna ni.

³³ Horamɛ, nwa ngɔ Gezɛrɛ nɛa we zɔ ní, nɛ a tɛ we gala owi Lakisi, nɛ Yozue gbɛa a do sodanɔ 'da a vɛ̃, nɛ wele kpo kpàsà li bole ni gɔ.

³⁴ 'Do ki ni, nɛ Yozue do obe Israɛlɛ wa kulu ngɔ Lakisi, nɛ wa la dɛ kɔ le Egloni, nɛ wa linggi le, nɛ wa bi ma.

³⁵ Nɛ wa ba le do kpo tũi ni, nɛ wa kumu owinɔ vɛ̃, nɛ́ kɛ wa kumu zi do owi Lakisi ni.

³⁶ 'Do ki ni, nɛ Yozue do obe Israɛlɛ wa kulu ngɔ Egloni, nɛ wa kũ gbaa tɛ Hebroni, nɛ wa bi ma.

³⁷ Wa ba le, nɛ wa gbɛ nwa ngɔ nɛ do owinɔ 'da a vɛ̃. Nɛ wa ba 'bɔ lenɔ kɛ zã nɛ ni, nɛ wa gbɛ owinɔ vɛ̃. Nɛ wa 'danga le vɛ̃, nɛ́ kɛ wa 'danga zi do le Egloni ni. Nɛ wa kumu owi kɔ nɛ, nɛ wa là wele kpo gɔ.

³⁸ Dɛ 'do nɛ, nɛ Yozue do obe Israɛlɛ wa kpolo tɛ wa, nɛ wa nɛ tɛ Dɛbirɛ, nɛ wa bi ma.

³⁹ Wa ba le ni do nwa ngɔ nɛ, fala nɛ kpo do be lenɔ kɛ zã nɛ ni vɛ̃. Nɛ wa gbɛ owi kɔ nɛ vɛ̃, nɛ́ kɛ wa gbɛa zi do owi Hebroni ni. Nɛ wa dɛ 'bɔ do le Dɛbirɛ do nwa ngɔ nɛ nɛ́ kpo mɛ wa dɛa zi do le Libna do nwa ngɔ nɛ ni.

^40-41 Yozue bi lenɔ si ngɔ kalanɔ, do lenɔ tɛ li gba zɔ̃ Negɛvɛ, do lenɔ nyanga kalanɔ si 'biti gɛ̃a wese, do lenɔ nu gã lì vɛ̃, nɛ a nɛ ngɔ onwa ngɔ lenɔ ni, nɛ a ba lenɔ ni vɛ̃. Yozue kpia ti sodanɔ 'da a yolo Kadɛsɛ-Barnea do Gaza, si ba gɔtɔ gbaa we hɔ ngɔ nù Gosɛnɛ do Gabaoni, si gbãlã ngɔ. Nɛ a là wele kpo do tunu li a gɔ, nɛ a kumu winɔ do onadalamɛnɔ vɛ̃, we kɛ NWA Gale ba zi nu a na wa dɛ ni.

⁴² Yozue do obe Israɛlɛ wa ba nùnɔ vɛ̃, nɛ wa gbɛ onwa ngɔ nɛ. Wa dɛa zi ni, we kɛ NWA Gale zi do wa fala nɛ kpo, nɛ a bi zu wa.

⁴³ Dɛ 'do nɛ, nɛ wa si dɛ fala ɔi 'da wa tɛ Gilgalɛ.