Yozue 1 - WE NU GALE 1995

NWA ia Yozue na a kpe ti obe Israɛlɛ

¹ Mɔizɛ, wi dɛa to 'da NWA Gale, zi do wi ti nu a, li a a Yozue, be 'da Nunɛ. Nɛ 'do kɛ Mɔizɛ fia ni, nɛ NWA tɔ̃ hã Yozue na:

² “Wi dɛa to 'da mi, Mɔizɛ fia. Kɔ ma wia na, mɔ kulu ngɔ do obe Israɛlɛ vɛ̃, hã nɛ kũ lì Yɔrdanɛ, we le ngɔ nùi kɛ mi hã ma hã nɛ ni.

³ Mi tɔ̃a zi hã Mɔizɛ na, fala vɛ̃ kɛ nɛ e sɛ nyanga nɛ tɛ nɛ ni, nɛ mi hã sɛ ma hã nɛ.

⁴ Nùi 'da nɛ ma yolo sɛ tɛ li gba zɔ̃ kɛ si ba gɔtɔ, gbaa we hɔ tɛ kalanɔ tɛ Libanɛ do si gbãlã ngɔ. Li ngbala nùi ma to sɛ nu gã fua lì Efratɛ, tɛ si 'biti gba wese, nɛ nùi 'da nɛ ma yolo sɛ di ni, nɛ ma ba nùi 'da Ohiti, gbaa we hɔ nu gã lì kɛ si 'biti gɛ̃a wese. Nùi ni vɛ̃ sɛ a mɔ́ nɛ.

⁵ Nɛ mɔ Yozue, kɔ dungu nza 'da mɔ vɛ̃, wele yóló sɛ ti mɔ gɔ, we kɛ mi sɛ fala nɛ kpo do mɔ, nɛ́ kɛ mi zi fala nɛ kpo do Mɔizɛ ni. Mi lá sɛ mɔ gɔ, nɛ mi élé sɛ mɔ fala kpo gɔ.

⁶ Mɔ kpã́lã́ sila mɔ, nɛ mɔ ó do ngawi, we kɛ mɔ a mɔ kpe sɛ ti winɔ gɛ, we ba nùi kɛ mi kpua zi mbulu nɛ hã oyaa nɛ ni.

⁷ Ma wia na, mɔ kpãlã sila mɔ, nɛ mɔ ɔ do ngawi, nɛ mɔ dɛ mbulanɔ vɛ̃ kɛ wi dɛa to 'da mi, Mɔizɛ, hã zi hã mɔ ni. Mɔ tɛ èlè mɔ kpo kɔ nɛ gɔ, sɛ nɛ mɛnɔ vɛ̃ kɛ mɔ kɔa we dɛ nɛ ni, mɔ dɛ sɛ ma do li nɛ de.

⁸ Mɔ tɔ́lɔ́ 'buku mbula tũ kpo kpo, mɔ tɛ èlè ma gɔ, nɛ mɔ yámbálá ma tũ do gba wese, nɛ mɔ dɛ mbula kɛ wa kɔma kɔ 'buki ni vɛ̃. Kɔ mɔ dɛ ní, nɛ mɔ kpo gáná sɛ mɔ gɔ, nɛ mɛnɔ vɛ̃ kɛ mɔ lengge we dɛ nɛ ni, mɔ dɛ sɛ ma do li nɛ.

⁹ Mi ba nu mi hã mɔ na, mɔ kpã́lã́ sila mɔ, nɛ mɔ ɔ́ do ngawi. Mɔ tɛ mbɔ̀kɔ̀ gɔ, nɛ mɔ tɛ dɛ̃ kili gɔ, we kɛ mi NWA Gale 'da mɔ, mi sɛ do mɔ falanɔ vɛ̃ kɛ mɔ nɛ sɛ nɛ ni.”

Obe Israɛlɛ wa 'dafa tɛ wa we kũ lì Yɔrdanɛ

¹⁰ Nɛ Yozue ba nu a hã ogã wi ngɔ obe Israɛlɛ na,

¹¹ wa yɛnggɛ fala ɔi, nɛ wa mbese winɔ na: “Nɛ 'dáfá ombɔkɔ nyɔngɔmɔ, we kɛ 'do tũ talɛ, nɛ nɛ kũ sɛ lì Yɔrdanɛ, nɛ nɛ ba sɛ nùi kɛ NWA Gale 'da nɛ hã ma hã nɛ ni.”

¹² Nɛ Yozue tɔ̃ hã owi nu kpala Rubɛnɛ, do Gadɛ, do mbee nu kpala Manase na:

¹³ “Ta zu nɛ tɛ èlè ngɔ lɛnggɛ kɛ Mɔizɛ, wi dɛa to 'da NWA Gale tɔ́a zi hã nɛ ni gɔ. A tɔ́a zi na: ‘NWA Gale 'da nɛ hã nùi kulu lì Yɔrdanɛ, kɛ si 'biti gba wese nga hã nɛ na, nɛ dɛ tɔa tɛ nɛ.’

¹⁴ We duzu ki ni, owukonɔ, do obenɔ, do onadalamɛnɔ 'da nɛ, wa 'bana sɛ dɛ ngɔ nùi kɛ Mɔizɛ hã ma hã nɛ gɛ. Nɛ nɛ, owi bolonɔ, nɛ kálá bolo dɛ kɔ̃ nɛ, nɛ nɛ kpe dati onya nɛ obe Israɛlɛ we kũ lì. Nɛ gala sɛ wa

¹⁵ gbaa na, wa ba nùi kulu lì Yɔrdanɛ si 'biti gɛ̃a wese, kɛ NWA Gale 'da lɛ hã ma hã wa ni. Kɔ fala kɛ Gale hã fala kpe tɛ wi hã onya nɛ, otala nu kpala Israɛlɛ vɛ̃ do'do, sɛ nɛ nɛ kpolo tɛ nɛ dɛ ngɔ nùi 'da nɛ kulu lì Yɔrdanɛ si 'biti gba wese nga de. Mɛ a nùi kɛ Mɔizɛ, wi dɛa to 'da NWA hã zi ma hã nɛ do mɔ́ nɛ ni.”

¹⁶ Owi nu kpala Rubɛnɛ, do Gadɛ, do mbee nu kpala Manase, wa zila we kɛ Yozue tɔ́a hã wa ni, nɛ wa gisa na: “Mbula kɛ vɛ̃ mɔ hã sɛ hã lɛ ni, nɛ lɛ dɛ sɛ ma. Falanɔ vɛ̃ kɛ mɔ tombo do lɛ ni, nɛ lɛ nɛ sɛ.

¹⁷ Lɛ dɛ sɛ olo nu mɔ, nɛ́ kɛ lɛ dɛ zi do kɛ 'da Mɔizɛ ni. E kɔ NWA Gale 'da lɛ, ɔ fala nɛ kpo do mɔ, nɛ́ kɛ a zi fala nɛ kpo do Mɔizɛ ni.

¹⁸ Kɔ fala wele bɛ̃ we dɛ mbula olo nu mɔ, nɛ lɛ gbɛ sɛ a. Nɛ nde we duzu mɔ, mɔ kpãlã sila mɔ, nɛ mɔ ɔ́ do ngawi.”