YONASI 4 - WE NU GALE 1995

Yonasi yambala gulu 'bako 'da Gale

¹ Yonasi nɛa we zɔ na, Gale dɛ̀ mɔ do Owi Ninivɛ gɔ ni, nɛ sila a zɛlɛ wena, nɛ zã a nɔ̃lɔ̃.

² Nɛ a tɔ̃ hã Gale na: “Aa NWA, dati kɛ na mi la le 'da mi ni, mi ĩ zi na, mɔ dɛ sɛ mɛ kɛ mɔ dɛa gɛ. Gulu nɛ a mi fa zi we yu dɛ Tarsisi i ni. Mi ĩ zi na, mɔ a Gale mbɔkɔ li, mɔ 'bɔ do dia zã wena. Mɔ a wi du sila, nɛ kɔ̃a zã 'da mɔ la mɔ vɛ̃. Mɔ kpolo linggamɛ 'da mɔ ngɔ etumbui mɔ kɔ̃a sɔ we hã hã owinɔ ni dɔ̃ iko.

³ Aa NWA, fe fio ma dia tɛ mi nɛa ngɔ dungu nza.”

⁴ Nɛ NWA tɔ̃ hã a na: “Gulu kɛ zã mɔ nɔ̃lɔ̃ gɛ bina.”

⁵ Nɛ Yonasi hɔa nza kɔ le, nɛ a nɛ, nɛ a dungu do 'do ngbo le, si 'biti gba wese, nɛ a dɛ da, nɛ a dungu nù dɛ ti gɔ̃lɔ̃ nɛ, we 'bɔ we zɔ mɛ kɛ ma dɛ sɛ le Ninivɛ ni.

⁶ Nɛ NWA Gale dɛa na, be te hɔ, kɔ ma ngala, nɛ ma kele zu Yonasi, nɛ ma hã gɔ̃lɔ̃ hã a, takɔ tɛ̃ a ma gɛ̃. Nɛ be te ni dia tɛ Yonasi wena.

⁷ Nɛ nde ma ɔa tũ kpo, kɔ fala nɛa we sa nɛ, nɛ Gale dɛa na, dɔkɔ nyɔngɔ gulu be te ni, nɛ ma kolo.

⁸ Fala wese hɔa ngɔ, nɛ Gale fi bawe bũ, nɛ ma yolo do si 'biti gba wese, nɛ wese dɔa zu Yonasi nganda wena. Nɛ ma 'bana sĩ na, li a tũ. Nɛ a kɔ̃a na ɛ fe do'do, nɛ a tɔ̃ na: “Fe fio dia tɛ mi nɛa ngɔ dungu nza.”

⁹ Nɛ Gale aka Yonasi na: “Gulu nɔ̃lɔ̃ zã 'da mɔ we kɛ be te gɛ kula ni boe nde?” Nɛ a gese na: “Ĩi, gulu nɛ boe. Zã mi nɔ̃lɔ̃ wena, nɛ mi kɔ̃a we fe nɛ.”

¹⁰ Nɛ Gale tɔ̃ hã a na: “Mɔ zélé! Mɔ dɛ̀ mɔ kpo we duzu te gɛ gɔ. Nɛ mɔ a mɔ mì ma gɔ. Ma gã 'do tũ kpo, nɛ tũi olo nɛ ni, nɛ ma fe. Nɛ nde mɔ hia 'bako tɛ nɛ.

¹¹ Ní a mɔ kɔ̃̀ sɔ tɛ mɛ 'bɔ na, mi ɔ do 'bako we le Ninivɛ gɔ nde? Mɛ a gã le, nɛ owinɔ kɔ nɛ kɛ wa ĩ̀ ti gɔnɔ sanga dia mɔ do 'dã mɔ gɔ ni, wa la ngɔ koto kama do 'bu wa bɔa. Nɛ gba gili osa'de kɔ le ni 'bɔ boe. Ní a mi tɛ ɔ̃ do 'bako we le ni gɔ nde?”