YONASI 3 - WE NU GALE 1995

Yonasi nɛa tɛ Ninivɛ

¹ NWA ba 'bɔ nu a hã Yonasi fala bɔa na:

² “Mɔ kúlú ngɔ, hã mɔ nɛ kɔ gã le Ninivɛ, kɔ mɔ mbese wa do we mi nɛ tɔ̃ hã mɔ gɛ.”

³ Nɛ Yonasi zila nu Gale tɛ kɛ gɛ, nɛ a nɛa tɛ Ninivɛ i. Le ni gã la li ngele. Mɔ ba 'da nɛ tũ talɛ vɛ̃, sɛ nɛ mɔ hɔ ndɔti nɛ de.

⁴ Yonasi ma ngɔ ba 'da le. A ba 'da le tũ kpo, nɛ a ma ngɔ mbese Owi Ninivɛ na: “Ma 'bana 'bu tũ nalɛ, nɛ NWA Gale a 'danga sɛ Ninivɛ.”

⁵ Owi Ninivɛ wa zila we nu Gale, nɛ wa kɔ̃a. Nɛ wa 'bili na, wele kpo tɛ nyɔngɔ mɔ gɔ. Nɛ wele do wele hé'dé saki, yolo tɛ gã winɔ we hɔ ngɔ Owi 'da lenɔ, we be na wa kifi sila wa ngɔ 'dã mɛ 'da wa.

⁶ 'Da fala nwa kɔ le Ninivɛ zila we mɛ ma la ni, nɛ a kulu ngɔ ngɔ kpongbo nwa 'da a, nɛ a hɔlɔ tulu nwa 'da a, nɛ a he'de saki, nɛ a dungu nù dɛ zã bũ.

⁷ Nɛ a tombo winɔ 'da a we sa mbula hã winɔ tɛ le Ninivɛ vɛ̃ na: “Nwa do ogã wi ti nu a, wa ba nu wa na, owinɔ do onadalamɛnɔ, ogã sa'de do obe wanɔ, da dɛ kɔ nyɔngɔmɔ kpo tabi lì gbó nu wa gɔ.

⁸ Winɔ vɛ̃ wa hé'dé saki, nɛ wa he'de 'bɔ ma tɛ onadalamɛnɔ. Wele do wele sámbálá Gale do nga. Nɛ wele kpo do kpo lá fala 'dã dungu 'da a, do e bolo tɛ ngba a.

⁹ Lɛ ĩ̀ gɔ, mbe gɔ, kɔ lɛ dɛ ni, nɛ Gale a kpolo sɛ nu a, nɛ a la sɛ fala nɔ̃lɔ̃ zã 'da a, nɛ lɛ fé sɛ gɔ.”

¹⁰ Nɛ Gale zɔa mɛnɔ vɛ̃ kɛ owi Ninivɛ wa dɛa, do kɛ wa la fala 'dã mɛnɔ 'da wa ni, nɛ a kpula linggamɛ kɛ a lengge zi we dɛ wa 'danga ni, nɛ a dɛ̀ ma gɔ.