YONASI 2 - WE NU GALE 1995

Yonasi sambala Gale

¹ Wa da Yonasi 'dɔ gba lì ni, nɛ NWA tombo gã kɔyɔ, nɛ a yɔ'dɔ Yonasi. Nɛ Yonasi ɔa kɔ zã kɔyɛ ni, wese talɛ do tũ talɛ.

² Kɛ a kɔ zã kɔyɛ i ni, nɛ a ma ngɔ sambala NWA Gale 'da a na:

³ “Aa NWA, mi zi a kɔ ngamɔ, nɛ mi zɛa nu mi hã mɔ, nɛ mɔ gisa nu nɛ hã mi. Mi zi a fala 'da ofionɔ, nɛ mi sa mɔ hã mɔ, nɛ mɔ zila gɛlɛ mi.

⁴ Mɔ da zi mi 'dɔ gba lì, dɛ ti go'do lì i. Ngawi lì zĩ mi takpa. Ngele lìnɔ mɔ tombo ni fo do ngɔ mi.

⁵ Nɛ mi ma ngɔ lengge na: NWA, mɔ ndaka mi nyɛlɛ do mɔ ia. Nɛ mi zɔ́ sɛ 'bɔ Tɛmpɛlo santoe, fala wa dɔnggɔ do mɔ ni gɔ.

⁶ Hɛ̃a lì hɔa gbaa ti gɛlɛ mi, nɛ ma bindi mi. Tɔ̃mbɔlɔ 'dɔ lì kasa do zu mi.

⁷ Mi zĩlĩ gbaa kɔ gbangɔlɔ̃ ti lì, nɛ nu ngbo le 'da ofionɔ kpia dɛ ngɔ mi, nɛ ma hṹi gɔ fai. Nɛ nde mɔ NWA Gale 'da mi, mɔ gbɔta mi kɔ gbangɔlɛ̃ ni dɛ nza do tunu li mi.

⁸ 'Da fala fio tɛa we mi, nɛ mi lingga do mɔ NWA, nɛ sambala 'da mi ma hɔa 'da mɔ, tɛ Tɛmpɛlo santoe mɔ ɔ nɛ ni.

⁹ Wanɔ kɛ wa dɔnggɔ okpikimanɔ yala iko ni, wa siki 'do wa lua do mɔ, kɛ mɔ do kɔ̃a zã we wa wena ni.

¹⁰ Nɛ nde kɛ 'da mi, mi ga sɛ zuma, nɛ mi tɔ̃ iɔ̃nae hã mɔ. Mi gbɛ sɛ sa'de we dɔnggɔ do mɔ. Mi dɛ sɛ ombulunɔ mi kpua hã mɔ ni. Do gbãlã we, wi kpasa mi, wi a mɔ NWA.”

¹¹ Yonasi nɛa we da nu a tɛ sambala ni, nɛ nwa ba nu a hã gã kɔyɛ a yɔ'da Yonasi ni, nɛ a ɔ̃lɔ̃ a dɛ nu konggolo gba lì ni.