YONASI 1 - WE NU GALE 1995

Yonasi yu nyɛlɛ do Gale

¹ Mbe 'da fala kpo, nɛ NWA Gale wila we hã Yonasi, be 'da Amitai. A na:

² “Mɔ kúlú ngɔ, kɔ mɔ nɛ́ dɛ kɔ gã le Ninivɛ. Mɔ hɔ i mɔ, nɛ mɔ tɔ̃ hã winɔ kɔ le ni na, mi nɛ gɔnɔ ngbangga 'da wa, we kɛ 'dã mɛ 'da wa ma ngba mi do'do.”

³ Yonasi nɛa we zele ni, nɛ a fa we yu dɛ kɔ le Tarsisi, takɔ a nyɛlɛ do NWA. A nɛa, nɛ a hɔ Yafa, nɛ a kpa masua, kɛ ma 'bɔ we la dɛ Tarsisi. A futa ma, nɛ a kũ kɔ nɛ fala nɛ kpo do owi dɛa tonɔ kɔ nɛ ni, nɛ wa la. A lengge zi na, ɛ hɔ i mɔ, nɛ nde NWA kpá sɛ 'bɔ ɛ gɔ.

⁴ Kɔ NWA nɛa we zɔ ni, nɛ a fi gba bũ kamba ngɔ gba lì ni. Nɛ gba lì yaka nganda wena, nɛ masua dɛa ɔ nɛ kɛ ma nɛ gbini, nɛ ma bindi ni.

⁵ Nɛ Owi tonɔ kɔ masua ni wa gɔnɔ kili, nɛ wele do wele sa mɔ hã gale 'da a na a gala ɛ. Nɛ wa da mbe tolenɔ 'dɔ lì na, masua hãsã. Nɛ nde do 'da fala ni, Yonasi zĩlĩ sɔ kɛ 'da a dɛ go'do masua i belee, kɔ a ɔa nù, nɛ yala nɛ ngɔ a wena.

⁶ Nwa ngɔ owinɔ kɔ masua tɛa, nɛ a kpa a, nɛ a aka a na: “Aa mɔ gɛ, kɛ mɔ ɔ ni a yala ge nde? Mɔ kúlú ngɔ, kɔ mɔ aka gale 'da mɔ. Mbe gɔ, nɛ ta zu a ma gba nɛ ngɔ lɛ, nɛ lɛ fé sɛ gɔ.”

⁷ Nɛ wi dɛ tonɔ wa tɔ̃a hã ngba wa na: “Lɛ 'bɛ́nɛ́ mɔ, takɔ lɛ ĩ ti wi kɛ ngamɛ gɛ kpa lɛ we duzu a ni.” Wa 'bɛnɛ mɛ, nɛ ma te ngɔ Yonasi.

⁸ Nɛ wi tonɔ wa tɔ̃ hã Yonasi na: “Ngamɛ gɛ ma kpa lɛ we duzu mɔ. Mɔ tɔ̃́ gulu mɔ hã lɛ. Mɔ yula do nde? Le 'da mɔ a do nde? Mɔ a be 'bo gɛ nde?”

⁹ Nɛ a gese hã wa na: “Mi a be hebre, mi dɔnggɔ NWA Gale tɛ li nza i, kɛ a dɛa gba lìnɔ do nga nùi ni.”

¹⁰ Nɛ a tɔ̃ 'bɔ gulu mɛnɔ vɛ̃ ma la do a ni. Nɛ Owi tonɔ kɔ masua wa dɛa kili wena, we kɛ a tɔ̃a hã wa na, ɛ yu nyɛlɛ do NWA ni. Nɛ wa aka a na: “Gulu kɛ mɔ dɛa ni we ge nde?”

¹¹ Do 'da fala ni, ngawi 'da yaka lì, ma kũ zi kũ iko. Nɛ wa aka 'bɔ a na: “Mɛ ngboo lɛ nɛ dɛ do mɔ, takɔ gba lì tɛ yàkà 'bɔ gɔ ni a ge nde?”

¹² Nɛ Yonasi gese hã wa na: “Nɛ bá mi, kɔ nɛ da mi 'dɔ lì, nɛ yaka lì ma gɛ̃ sɛ. Mi ĩ na, gba bũi gɛ ma dɛ we mi.”

¹³ Mɛ ni, nɛ nde Owi tonɔ kɔ masua, wa lu nganda wena we hɔ nu kolo lì i, nɛ nde ma wè zi do wa gɔ, we kɛ ngele lì ma yaka dɛ dati nganda wena.

¹⁴ Kɔ wa nɛa we zɔ ni, nɛ wa ala nu wa hã NWA na: “Aa NWA, mɔ tɛ dɛ̃ na, lɛ fe we wi gɛ gɔ. Nɛ mɔ tɛ è we fie 'da a zu lɛ gɔ, we kɛ wi a mɔ NWA, mɔ a mɔ dɛa mɛnɔ gɛ vɛ̃, ɔ nɛ kɛ zã mɔ kɔ̃a ni.”

¹⁵ 'Do nɛ, nɛ wa ba Yonasi, nɛ wa da a 'dɔ lì, nɛ yaka lì gɛ̃a nzĩi.

¹⁶ Owinɔ wa zɔa ni, nɛ wa dɛa kili NWA Gale wena, nɛ wa hã mɔ hã a we dɔnggɔ do a, nɛ wa kpua mbulu hã a.