YƆBƆ 9 - WE NU GALE 1995

Wele wè tɛ ba kafi do Gale gɔ

¹ Nɛ Yɔbɔ gese na:

² Mi ĩ na, ma ní do gbãlã we, nɛ nde wele wia tɛ ba kafi do Gale nde?

³ Fala kɛ wele handa we aka a do olɛnggɛ koto, nɛ nde a gésé sɛ nu we kpo hã a gɔ.

⁴ A do hã zã wena, nɛ a nganda la li. Kɔ wele lakala we nu a ia, nɛ a kpa ngamɔ.

⁵ A fo kalanɔ dɛ gele fala, nɛ a ili ma dɛ nù do nɔ̃lɔ̃ zã 'da a, nɛ nde ma ĩ́ mɔ kpo gɔ.

⁶ A yaka nùi gbirr, nɛ obɛlɛduma nɛ ma tana.

⁷ A ba nu a, nɛ wese gbá 'bɔ gɔ, nɛ osɔlanɔ li nza i ma tó 'bɔ gɔ.

⁸ A zu a kpo a yala li nza vɛ̃, nɛ a yɛnggɛ do ngɔ ngele gba lìnɔ.

⁹ A dɛa ngɔ gili sɔlanɔ gɛ: Kungguwala, Sɛto do Be Zɔnga Benɔ 'da a, do Takula.

¹⁰ A dɛa ogã ɔngbamɛnɔ kɛ lɛ fa gulu nɛ zãa, nɛ a dɛa ogba sɔ̃ mɔ dɛlɛ wena.

¹¹ Fala kɛ Gale la kɛ zã mi, nɛ nde mi zɔ́ a gɔ, nɛ gɛnɛ kɔ a ngbɛlɛ do kɛ zã mi, nɛ nde mi ĩ́ fala a gɔ.

¹² A dolo zu mɔ ia, nɛ wi wia we ba ma kɔ a a wio nde? Wi aka sɛ a na, mɔ dɛ ni we ge nde ni, wi a wio nde?

¹³ Zã Gale nɔ̃lɔ̃, nɛ nde fo wi amba a bina. Nɛ a kala wanɔ kɛ wa bɛ̃a nu a ni, nɛ a mba wa fala nɛ kpo do gba sɔ sa'de 'dɔ gba lì, nɛ a ma wa ti nyanga a.

¹⁴ Na mɛ ni, nɛ mi gɛ, mi wia we ba kafi do a, nɛ mi fa we gese we hã a nde?

¹⁵ Gɛnɛ kɔ gulu we 'da mi a de, nɛ nde mi wè tɛ gese we hã a gɔ. A a wi gɔnɔ we 'da mi, nɛ ma wia na, mi ala nu mi hã a iko.

¹⁶ Fala kɛ mi sa mɔ hã a, kɔ a kɔ tabi nu mi kɔ̃a nde, nɛ nde mi wè we ĩ na, a zila ala nui 'da mi do dia nɛ ni gɔ.

¹⁷ A zɛlɛ tɛ mi mba iko, nɛ a hã ngamɔ hã mi 'do ngbɛ ɛ do 'do ngbɛ ɛ.

¹⁸ Fala kɛ a ndo zɛlɛ tɛ mi ia, nɛ nde a kɔ na mi ama gɔ.

¹⁹ Ma wia wá na, mi bi do a bi nde? Gɔ! A nganda nɛa ngɔ mi! Ma wia wá na, mi fi a li ngbangga nde? Gɔ! Wi kɛ a wia we fi Gale li ngbangga ni, a bina!

²⁰ Gɛnɛ kɔ mi do dia gulu we, nɛ a gɔnɔ sɛ 'dã we hã mi! Nɛ gɛnɛ kɔ mi dɛ̃ 'dã mɔ gɔ, kɔ mi tɔ̃ olo nu mi nɛ nde, nɛ a gɔnɔ sɛ tɛ mɛ 'dã gulu we hã mi iko!

²¹ Ĩ na, mi dɛ̃ 'dã mɔ gɔ! Ma kɛ mi 'bɔ do wɔ tɛ dungu nza bina.

²² We duzu mi, mɛnɔ vɛ̃ ma wia kɔ̃, gulu nɛ hã mi tɔ̃a na: Gɛnɛ kɔ wele a dia wi tabi 'dã wi, nɛ Gale gbɛ tɛ mɛ a gbɛa iko!

²³ 'Da fala kɛ ngamɔ hɔ kpiti, hã ma gbɛ odia wele, nɛ Gale mɔmɔ 'bakoe 'da wa mɔma iko!

²⁴ 'Da fala kɛ 'dã wi ba to nwa ngɔ nù gɛ iko, nɛ Gale kpe nu owi gɔnɔ wenɔ 'da a dɛ ngɔ 'dã mɛ 'da wi ni. Mba gɔ, fala kɛ wi dɛ mɛnɔ ni a Gale gɔ, nɛ nde mbé wi dɛa ma a wio nde?

²⁵ Kɔ̃ tũnɔ 'da mi ma la dɔ̃ dɔ̃, ɔ nɛ wi yu yu ni. Mi kɔlɔ do fio ia, nɛ nde mi tɛ kpà mbe dungu fio gɔ.

²⁶ Dungu nza 'da mi ma la dɔ̃ dɔ̃ ɔ nɛ kɛ ga zĩlĩ ngɔ fua lì ni, tabi ɔ nɛ kɛ ziki zĩlĩ nɛ dɛ ngɔ nyɔngɔmɔ nu a ni.

²⁷ Mi fa na ta zu mi ele ngɔ zɛlɛ tɛ mi, kɔ mi 'dafa bula li mi we dɛ yangga,

²⁸ nɛ nde mi wè tɛ dɛ ni gɔ, we kɛ zɛlɛ tɛnɔ 'da mi ma hã 'bako hã mi fai, nɛ mi ĩ na, Gale ba mi do wi 'dã gulu we.

²⁹ Nɛ kɛ mi a wi ngbangga mɔ́ a ni, gulu kɛ mi wia 'bɔ we fa na, mi be hã winɔ na, mi a dia wele ni we ge nde?

³⁰ Gɛnɛ kɔ mi fɔlɔ tɛ mi do sa'buni, nɛ nde ma fó ndi 'dã mɛnɔ 'da mi gɔ. Gɛnɛ kɔ mi fɔlɔ kɔ̃ mi do lì mbɔɛ, nɛ nde ma dɛ́ sɛ mɔ gɔ.

³¹ Mba gɔ, a ba sɛ 'bɔ mi, nɛ a da mi dɛ zã 'bɛ̃tɛ̃, nɛ tɛ mi ma hɔ́ sɛ 'bɔ kɛ na, mi he'de tulunɔ 'da mi dɛ ngɔ nɛ ni gɔ.

³² Gale a ngba mi wele do kɛ na, lɛ yolo sɛ li ngbangga do a we tɔ̃ gulu we gɔ.

³³ Wi kɛ a wia we zele gulu we 'da lɛ bɔa nɛ, nɛ a gɔnɔ ma ni bina.

³⁴ Nɛ wi kɛ a wia we dɛ na, Gale da zufa 'da ɛ nù, nɛ a la fala a kili tɛ mi ni 'bɔ bina.

³⁵ A ɔ sɔ boe, nɛ mi dɛ́ sɔ kili wele we hã Gale gɔ. Nɛ nde mɛ ma kpa mi gɛ, ma si do tɛ̃ ɛ.