YƆBƆ 8 - WE NU GALE 1995

Gale a ngbongbo wi bɔlɔ zu ngboo

¹ Yɔbɔ nɛa we da nu ɛ, nɛ Bildadɛ, wi kɔ le Suha tɔ̃ hã a na:

² Mɔ nɛ la fala kpe zala lɛ do lɛnggɛnɔ, kɛ ma do gulu nɛ bina gɛ soe ki nge nde?

³ Mɔ lengge na, Gale wia we zɔlɔ bɔlɔ zu nde? Gale kɛ a do nganda vɛ̃ ni, a wia we kpolo mbulanɔ nde?

⁴ Benɔ 'da mɔ wa dɛa 'dã mɔ gbali a, ma kɛ wa kpa etumbu olo 'dã mɛ 'da wa ni.

⁵ Nɛ nde fala kɛ mɔ fa Gale do sila mɔ kpo, fala kɛ mɔ sambala Gale, NWA ngɔ mɔ nyanga nza vɛ̃,

⁶ fala kɛ mɔ ɔ wi bɔlɔ zu, do sa wi li Gale, nɛ a tɛ sɛ we gala mɔ. Nɛ a gese sɛ mɛnɔ 'da mɔ vɛ̃ hã mɔ.

⁷ Kpamɛnɔ kɛ Gale a hã sɛ hã mɔ 'do gɛ, ma nɛ sɛ ngɔ kɛnɔ zi dati ni.

⁸ Mɔ áká okpasa winɔ zi dati gɛ, nɛ mɔ zélé wenɔ kɛ wa yambala zi ni.

⁹ Wa kua lɛ dɛ zɛ gɛ iko, nɛ lɛ ĩ̀ ti mɔ gɔ. Kɔ̃ tũnɔ 'da lɛ ngɔ nù gɛ, ma la dɔ̃ dɔ̃ ɔ nɛ bũ ni.

¹⁰ Mɔ kɔ̃́ na, okpasa winɔ wa be mɔ hã mɔ, nɛ wa tɔ̃ sɛ wenɔ wa yambala zi ni hã mɔ.

¹¹ Wa tɔ́a do gba we na: “Sala tɔ̃ ngálá ngɔ nga nù gɔ, wa kpa ma tati a zã 'bɛ̃tɛ̃.

¹² Gɛnɛ kɔ ma 'bana gã gã iko, kɔ ma tɛ wè li sɛlɛ nɛ gɔ, hã lì ɔ̃sɔ̃ ti ma do'do, nɛ ma kolo dati a gele wɔkɔsɔnɔ.”

¹³ Ma tɛ mɛ 'bɔ na mɛ ni we duzu winɔ, kɛ wa ĩ̀ ti Gale gɔ ni. Nɛ́ kɛ ta zu wa ila ngɔ Gale ni, nɛ linggamɔ zu wa ma busu do'do.

¹⁴ Wali 'da wa ma Sɔkpɔ sɛ, we kɛ ngawi 'da wa, ma ɔ nɛ fɛlɛ yakato ni.

¹⁵ Fala kɛ wele lɛ tɛ̃ a do fɛlɛ yakato, nɛ ma 'be sɛ a dɛ ngɔ nde? Fala kɛ wele kũ dɛ ngɔ fɛlɛ, nɛ ma gala sɛ a we yolo do nyanga a nde?

¹⁶ Wa ɔ nɛ tɔlɔ te kɛ nwá nɛ 'bɔ, nɛ nde ma dɛ li wese ni. Ma tata gbakɔ̃ nɛ dɛ kɔ ngboe vɛ̃.

¹⁷ Liã nɛ lia kɔ nga nùi gbaa, nɛ ma hɔ kɔ tanɔ i.

¹⁸ Nɛ nde fala kɛ wa zu'du ma di ni do'do, nɛ wele kpo ĩ sɛ 'bɔ na, ma zi di ni ni gɔ.

¹⁹ Gbãlã we, yangga 'da o'dã winɔ ma Sɔkpɔ dɛ di ni, nɛ ogele wele wa ba fala olo wa.

²⁰ Nɛ nde Gale a bɛ sɛ gɛnɛ wi bɔlɔ zu fala kpo gɔ, nɛ a gálá sɛ 'dã winɔ fala kpo gɔ.

²¹ A dɛ sɛ na, mɔ mɔmɔ 'bɔ mɔmu, nɛ mɔ ga zuma yangga.

²² Nɛ nde Owi sɛnɛ mɔ wa fe sɛ sape, nɛ wele zɔ̀ sɛ 'bɔ bili tɔa olo 'dã winɔ gɔ.