YƆBƆ 7 - WE NU GALE 1995

Yɔbɔ zɔ Gale nɛ́ wi zɛlɛ tɛ̃ a ni

¹ Dungu nza 'da Owele ngɔ nù gɛ ma a nga, ɔ nɛ toe 'da osoda likili ni. Nɛ ma ɔ 'bɔ nɛ kɛ 'da wi dɛ to kolofe ni.

² Ma wia kɔ̃ do toe 'da ngbá tɛ li tua wese, a dɛ ma, nɛ a wè tɛ si ti gɔ̃lɔ̃ gɔ. Ma wia 'bɔ kɔ̃ do kɛ 'da wi dɛa to, kɛ a 'bɔ ndɔti zɛkɛ ni.

³ Tɛlɛ tɛ dungu nza 'da mi ma ɔ ni. Kɔ̃ tũnɔ 'da mi, mɛ a kɔ̃ tũ zɛlɛ tɛ, nɛ fo fala na, mi ɔ yala do tũ ni bina.

⁴ Mi ɔ nù ia, nɛ linggamɔ zu mi kpo na, mi nɛ kulu ngɔ soe ki nge nde? Nɛ sila mi ɔ ngɔ gbaa sa fala. Kɔ mi kulu ngɔ do titole ia, nɛ mi aka na, tũi tɛ tũ̀ gɔ nde?

⁵ Tɛ mi ma dunu do odɔkɔ. Katolo lɔ'ba tɛ mi pilii, nɛ li daninɔ tɛ mi ma fo do mã ngbɛ'bɛɛ.

⁶ Kɔ̃ tũnɔ 'da mi ma la dɔ̃ dɔ̃, nɛ ma kɔlɔ fala e nɛ, ɔ nɛ kɛ 'busu e go'do tonga fulu tulu ni.

⁷ Aa Gale, ta zu mɔ tɛ èlè na, kɔ̃ tũnɔ 'da mi ma la nɛ́ bũ iko ni gɔ, nɛ mi kpá sɛ 'bɔ yangga fala kpo gɔ.

⁸ Mɔ zɔ mi ngangga ni zɔa, nɛ nde mɔ zɔ́ sɛ 'bɔ mi gɔ. Nɛ fala kɛ mɔ fa mi, nɛ nde mɔ kpá sɛ 'bɔ mi gɔ.

^9-10 Wele fe ia, nɛ nde a kpóló 'bɔ tɛ̃ a gɔ. A ɔ nɛ gba kutu kɛ ma pɛsɛ, nɛ ma bisi ni. Nɛ ta zu Owi nanɔ 'da a ma ele ngɔ a.

¹¹ Gulu nɛ a mi wè 'bɔ we kpe nu mi gɔ. Gɛnɛ kɔ hi mi gɔ gɔna, nɛ mi wele sɛ we. Mi he sɛ kɔ̃a tɛ mi, we kɛ sila mi 'danga do'do.

¹² “Mɔ lengge na, mi a gba sɔ sa'de 'dɔ gba lì, takɔ mɔ e wele 'do mi we zɔ mɔ tɛ mi nde?

¹³ Mi ɔ nù do linggamɔ kpe tɛ mi, takɔ ta zu mi ele ngɔ zɛlɛ tɛnɔ,

¹⁴ nɛ mɔ tɛ do 'dã yalɛ, nɛ ma a kili tɛ mi. Mɛnɔ mɔ be hã mi li yalɛ ni, ma hã kili hã mi wena.

¹⁵ Fala kɛ mɔ 'bili sɔ gɛlɛ mi, nɛ ma de sɔ tɛ mi wena! Sanga fio do zɔ ngamɔ, mi saka fio.

¹⁶ Mi kɔ̃a we fe nɛ, we kɛ dungu nza ngba mi do'do. Mɔ lá mi ní, gulu dungu nza 'da mi bina.

¹⁷ Gulu kɛ mɔ zɔ wele li mɔ gã wena ni we ge nde? Gulu kɛ mɔ e li mɔ ngɔ mɛnɔ a dɛ ni we ge nde?

¹⁸ Mɔ zɔ mɔ tɛ̃ a titole kpo kpo, nɛ mɔ yamba sila a 'da fala fai!

¹⁹ Mɔ nɛ la fala e li mɔ ngɔ mi soe ki nge nde? Mɔ nɛ la mi, kɔ mi gulu sã nu mi soe ki nge nde?

²⁰ Fala kɛ mi dɛ 'dã mɔ dɛa nde, nɛ mɔ, wi ngɛ'dɛ winɔ, mɔ tɔ̃́ hã mi. Mɛ mi dɛa do mɔ ni a ge nde? Gulu kɛ mɔ handa tati a mi, we tombo ngamɛnɔ dɛ ngɔ mi we ge nde? Ní a mi a dĩ tole we duzu mɔ nde?

²¹ Gulu kɛ mɔ bɛ̃ we ele 'dã mɛnɔ 'da mi we ge nde? Gulu kɛ mɔ bɛ̃ we fo ku'da nɛ zu mi we ge nde? Mɔ zɔ́ kɛ mi tɛ gbɔtɔ gɔgɔ fie dɛ zã butu kɛnzɛ gɛ. 'Da fala kɛ mɔ ma sɛ ngɔ fa mi ni, nɛ nde mi fia wá ia.