YƆBƆ 6 - WE NU GALE 1995

Yɔbɔ kɔ̃a sɔ na Gale gbɛ ɛ

¹ Nɛ Yɔbɔ gese na:

² Mi kɔ̃a sɔ na wa kala ngamɛnɔ do 'bakonɔ 'da mi, kɔ wa a ma ngɔ kilo we ĩ ti dĩ nɛ.

³ Nɛ wa zɔ sɔ na, ma dĩlĩ nɛa ngɔ kɛnzɛ 'dɔ gba lìnɔ. Gulu nɛ hã mi tɔ̃ zã zu mi ni.

⁴ Mba gɔ, Gale kɛ a do nganda vɛ̃, a ndɔlɔ mi do a li kpilinɔ 'da a, nɛ dã ina nɛ ma lia tɛ mi vɛ̃. Gale lɔnggɔ ngamɛnɔ vɛ̃ dɛ 'do ngbɛ ɛ, nɛ a tombo ma dɛ ngɔ mi.

⁵ Mɔ zɔa mbe punda zamɔ tabi ngɔmbɔ kɛ wa kpa dia wɔkɔsɔ ia, nɛ wa dúngú fio we nyɔngɔ ma gɔ, nɛ wa te tɛ he 'bɔ mɔ ni nde?

⁶ Wi wia tɛ nyɔngɔ mɔ gɛ̃a lì, nɛ nde a á tɔ̃ tɛ nɛ gɔ ni a wio nde? Nɛ wi wia tɛ nyɔngɔ tɔlɔ kuli kɔla, nɛ ma de tɛ̃ a ni a wio nde?

⁷ Mi gɛ, mi wè we nyɔngɔ mɔ ɔ ni gɔ. Mi nyɔngɔ ma, nɛ mi ngbuku sɛ olã.

⁸ Gulu kɛ Gale gésé nu aka we 'da mi gɔ we ge nde? Gulu kɛ a hã mɛ mi gɔ kɔ a ni hã mi gɔ we ge nde?

⁹ Gale kɔ̃, nɛ a da kɔ̃ a tɛ mi do'do, nɛ a gbɛ mi fala kpo iko.

¹⁰ Gale santo dɛ sɔ ni, nɛ gɛnɛ kɔ zɛlɛ tɛ boe, nɛ mi dɛ sɔ yangga wena, nɛ sila mi ma gɛ̃ sɔ, we kɛ mi bɛ mbulanɔ 'da a gɔ.

¹¹ Nɛ nde mi 'bɔ do mbé ngawi bina. Ní a gulu 'bana nza, tabi e sila mi ngɔ kpasi ni 'bɔ bina.

¹² Mi a kpangba ta gɔ, nɛ wa dɛ̀ kili tɛ mi do tũ mɔ bolo gɔ, mi wè tɛ kunu sila mi ngɔ mɛnɔ vɛ̃ gɔ.

¹³ Mi do be ngawi be sĩ takɔ mi kpasa do kili tɛ mi ni bina. Nɛ wele kpo kɛ a wia we gala 'bɔ mi ni bina.

¹⁴ Fala kɛ wele kpa ngamɔ, nɛ ma wia na, ongba a wa ĩ mbe 'bako hã a. Ní gɔ, nɛ ta zu a ele ngɔ Gale do'do.

¹⁵ Nɛ nde nɛ, oyali ngba mi, nɛ ɔkɔlɔ li mi, ɔ nɛ fua lì kɛ ma ɔ̃sã 'da fala sabɛlɛ ni.

¹⁶ Do zɔlɔ lì kole, nɛ kolo gbãlã mũlũ tɛ, nɛ fua lìnɔ hɛ̃.

¹⁷ Kɔ ma hɔ zɔlɔ sabɛlɛ, nɛ lìnɔ ni ɔ̃sɔ̃, nɛ olo nɛ kolo vɛ̃.

¹⁸ Owi gɔnɔ walanɔ wa nɛ, hã wa nɛ zɔ ma, nɛ wa kpolo tɛ wa 'do, we fa mbe lì, nɛ wa yɔ, nɛ wa yɛnggɛ do li gba zɔ̃ɛ ni gbaa, nɛ wa fe.

¹⁹ Owi gɔnɔ walanɔ kɛ wa yolo kɔ le Tema do ngɔ nù Saba wa fa ma do li wa zãa.

²⁰ Wa nɛ kɔ wa nɛ hɔ nu lì, nɛ nde ma ɔ̃sɔ̃ do'do, nɛ gbãlã zã wa bi tũi.

²¹ Nɛ ɔ tɛ mɛ 'bɔ nɛ fua lìnɔ ni we duzu mi! Nɛ zɔa ngamɛ 'da mi, nɛ nɛ dɛa kili.

²² Mi aka wá nɛ na, nɛ hã mɔ hã mi nde? Nɛ mi tɔ̃a wá hã nɛ na, nɛ kala mbe zu kpamɛnɔ 'da nɛ,

²³ kɔ ma gɔnɔ zu mi ti kɔ̃ wi sɛnɛ mi, do ti mbula 'da 'dã nwa nde?

²⁴ Ma a dia! Nɛ tɔ̃́ mbula hã mi! Nɛ bé 'dã mɛnɔ 'da mi hã mi, nɛ mi kpe sɛ nu mi we zele nɛ.

²⁵ Gbãlã we lɛnggɛ ma zɛ́lɛ́ sila wele gɔ. Nɛ nde kɛnɔ nɛ tɔ̃ gɛ, ma do gulu nɛ bina.

²⁶ Nɛ lengge na mi tɔ̃ yia lɛnggɛ, kɔ gulu kɛ nɛ gese nu ma we ge nde?

²⁷ Nɛ wia we to kuka ngɔ obe gula, takɔ wa hɔ ongbánɔ 'da nɛ nde? Nɛ wia we 'dɔlɔ ngbongbo yali ngba nɛ nde?

²⁸ Nɛ ká mɔ dɛ li mi! Nɛ lengge na, mi 'bili bele nde?

²⁹ Lɛnggɛ nu mi, mɛ a lɛnggɛ nu wi 'bili bɛlɛ nde? Nɛ lengge na, mi yɔa ti ngamɔ nde? Nɛ tɛ kɔ̀'dɔ̀ mi gɔ! Gbãlã nɛ a mɔ́ mi!

³⁰ Nɛ nde nɛ lengge na, mi 'bili bɛlɛ. Nɛ zɔ na, kɔ ngamɛ mi do ma gɛ, mi wè we tɔ̃ saka we gɔ.