YƆBƆ 5 - WE NU GALE 1995

¹ Aa Yɔbɔ, gɛnɛ kɔ mɔ sa mɔ, nɛ wi nɛ kɔ̃ nu mɔ a wio nde? Nɛ anzɛ kɛ mɔ nɛ ala nu mɔ hã a ni, a a wio nde?

² Do gbãlã we, kɔ sila bɔnɛ ma gbɛ wi kɛ a zɔlɔ hã zã ni, nɛ yia wi fe fio nɔ̃lɔ̃ zã 'da a.

³ Mi zɔa mbe yia wi, kɛ a ma ngɔ kpa dia dungu ni ia. Nɛ do kɔ̃ tũi ni, nɛ mi kana nu mi tɛ nu fɛlɛ kula 'da a do ti na:

⁴ Obenɔ 'da a wa kpá sɛ wi gala wa gɔ, nɛ wele kpo yóló sɛ gba sala 'do wa tɛ li ngbangga gɔ!

⁵ E kɔ owi wɔnɔ wa nyɔngɔ mɔ li fɔnɔ olo a! E kɔ wa dolo zu kpalɛnɔ kɛ a zĩ zi ngbo tɛ̃ dɛ tɛ nɛ ni! Nɛ e kɔ owi nga'banɔ wa dungu ngɔ kpamɛnɔ 'da a!

⁶ Mba gɔ, 'dã mɔ ma yóló ti nù gɔ, nɛ ngamɔ ma gbálá do zã nù gɔ.

⁷ Nɛ nde wa ko wele, nɛ a zɔ́lɔ́ kpa ngamɔ gɔ, ɔ nɛ kɛ be tolo we zɔ́lɔ́ we za'da kɔ nyɛa we gɔ ni.

⁸ Wi sɔ a mi, nɛ mi sambala sɔ Gale, nɛ mi tɔ̃ sɔ gulu we 'da mi hã a.

⁹ Lɛ wè we zele gulu gba sɔ̃ mɛnɔ kɛ a dɛ ni gɔ. Nɛ lɛ wè we tɔlɔ oɔngbamɛnɔ 'da a vɛ̃ gɔ.

¹⁰ Wi a a hã a tombo kole dɛ ngɔ nùi, nɛ a 'bɔ a a hã lì hã okpalɛ li fɔnɔ.

¹¹ Gale zɔ winɔ kɛ wa ba tɛ wa dɛ nù ni, nɛ a 'be wa dɛ ngɔ, nɛ a hã 'bɔ yangga hã owi 'bakonɔ.

¹² Nɛ nde a 'danga linggamɔ zu o'dã winɔ, nɛ mɛnɔ wa 'dafa we dɛ ma ni, ma dɛ́ 'bɔ tɛ̃ ɛ gɔ.

¹³ Bili 'da a ma kala owi hã zãnɔ do wala 'dã hã zã 'da wa wele nɛ. Nɛ mɛnɔ wa dɛ ni, ma gálá 'bɔ wa gɔ.

¹⁴ Do nga kula gba wese gɛ, nɛ nde wa kɔ gba tũ, nɛ gɛnɛ kɔ do midi, nɛ nde wa tamba mɔ, ɔ nɛ kɛ wa a kɔ gba tũ ni.

¹⁵ Nɛ nde Gale gbɔtɔ wi sã ti kɔ̃ owi hã ngamɔ hã a, nɛ a kpasa a kɔ fio.

¹⁶ Nɛ Gale hã 'bɔ mbé linggamɔ kpasi hã Owi sãnɔ, nɛ a kpe nu Owi dɛ 'dã mɛnɔ.

¹⁷ Na mɛ ni, mɛ a yangga we wele kɛ Gale dãlã we dɛ tɛ a ni! Kɔ mɔ Yɔbɔ, mɔ tɛ ɔ̃ do mãlã we etumbu kɛ Gale, kɛ a do nganda vɛ̃ hã hã mɔ gɛ gɔ!

¹⁸ Gale hã ngamɔ hã wele, nɛ a 'bɔ a a kpasa wi ni. Fala kɛ a e dani tɛ wele, nɛ a 'bɔ hã a a dani ni do tɛ̃ a.

¹⁹ A kpasa sɛ mɔ kɔ ngamɔ fala dɛlɛ wena, nɛ nde mbé ngamɔ kpá sɛ 'bɔ mɔ gɔ.

²⁰ Do 'da fala gba wɔ, nɛ a dɛ sɛ na mɔ tɛ fè gɔ. Nɛ do 'da fala bolo, nɛ a kpasa sɛ mɔ.

²¹ 'Dã kɔa nu 'da winɔ ma dɛ́ sɛ mɔ tɛ mɔ gɔ, nɛ 'da fala ngamɔ, nɛ nde mɔ dɛ́ sɛ kili gɔ.

²² Mɔ zɔ sɛ ngamɔ do gba wɔ li mɔ yala, nɛ mɔ dɛ́ sɛ kili osa'de zamɔ gɔ.

²³ Tanɔ ma 'dángá sɛ fɔnɔ 'da mɔ gɔ, nɛ gɛnɛ kɔ osa'de zamɔ, nɛ nde wa zɛ́lɛ́ sɛ tɛ mɔ gɔ.

²⁴ Mɔ kpa sɛ dungu fio kɔ tɔa 'da mɔ. Nɛ fala kɛ mɔ tɔlɔ osa'denɔ 'da mɔ, nɛ nde mbe kpo yɔ́ sɛ gɔ.

²⁵ Mɔ zɔ sɛ na, nu fɛlɛ kula 'da mɔ ma gã gã, nɛ obe zã mɔ wa dɛlɛ sɛ dɛ dati ɔ nɛ owɔkɔsɔ li fɔ ni.

²⁶ Mɔ le sɛ kɔ, nɛ nde mɔ 'bana do ngawi, ɔ nɛ kpalɛ kɛ wa kala do li zɔlɔ nɛ ni.

²⁷ Aa Yɔbɔ, lɛ yambala gulu wenɔ ni vɛ̃, nɛ lɛ kpa na, ma na mɛ ni. Kɔ mɔ kɔ gɛnɛ nɛ, sɛ a ma gala mɔ de!