YƆBƆ 42 - WE NU GALE 1995

Sɔkpɔ lɛnggɛnɔ 'da Yɔbɔ

¹ Nɛ Yɔbɔ gese hã NWA Gale na:

² Aa NWA, mi ĩ na mɔ do nganda vɛ̃, nɛ mɔ kpo wè tɛ gana mɔ go.

³ Mɔ tɔ̃a hã mi na, gulu kɛ mi ba kafi hã zã 'da mɔ, nɛ mi tɔ̃ lɛnggɛ kɛ mi ĩ̀ ti gulu nɛ gɔ ni we ge nde? Gbãlã we, mi tɔ̃a lɛnggɛ mɔ kɛ mi ĩ̀ ti gulu nɛ gɔ, nɛ ma gã nɛa ngɔ linggamɔ zu mi nɛ̀

⁴ Mɔ tɔ̃a 'bɔ na, mi gɛ́ zala mi, hã mi gese nu wenɔ mɔ aka do mi ni.

⁵ Ĩ na, mi zele zi sako 'da mɔ zila iko, nɛ mi ĩ̀ zi ti mɔ ngboo gɔ, nɛ nde ngangga ni, mi zɔa mɔ do gbali mi ngboo.

⁶ Nɛ sape ba li mi olo wenɔ vɛ̃ mi tɔ̃a ni, nɛ mi kpolo nu mi, nɛ mi te dɛ bulu nù, nɛ mi so bũ dɛ zu mi.

GALE HA DIA MƆ HA YƆBƆ NƐA NGƆ NƐ ZI DATI NI

⁷ NWA Gale wila we do Yɔbɔ ia do'do, nɛ a tɔ̃ hã Elifazɛ, be Temanɛ na: “Zã mi NWA nɔ̃lɔ̃ dɛ tɛ mɔ do oyali ngba mɔ bɔa ni. Mba gɔ, nɛ tɔ̃̀ we 'da mi do gbãlã we ɔ nɛ wi toe 'da mi Yɔbɔ gɔ.

⁸ Kɔ di dɔ̃ ni, nɛ kálá owili ngɔmbɔ sambo do owili bata sambo, hã nɛ nɛ́ nɛ 'da wi toe 'da mi Yɔbɔ. Nɛ nɛ dɔ́ osa'denɔ ni do dɔnggamɔ hã mi Gale, we duzu 'dã mɛ 'da nɛ, nɛ wi toe 'da mi Yɔbɔ a sambala sɛ we nɛ. Nɛ mi zele sɛ sambala 'da a do dia nɛ. Nɛ gɛnɛ kɔ nɛ tɔ̃̀ zi gbãlã we 'da mi ɔ nɛ kɛ Yɔbɔ tɔ̃a ma ni gɔ, nɛ nde mi ha sɛ etumbu hã nɛ olo yɔndɔ dɛa mɔ tɛ nɛ gɔ.”

⁹ Elifazɛ be Temanɛ, do Bildadɛ be Suha, do Sofarɛ be Nama, wa nɛa, nɛ wa dɛa nɛ́ kɛ NWA Gale tɔ̃a hã wa ni. Nɛ NWA zila sambala 'da Yɔbɔ.

¹⁰ Yɔbɔ sambala we duzu oyali ngba a do'do, nɛ NWA gese kpamɛnɔ 'da a zi dati ni hã a. Nɛ a a 'bɔ mbe kpamɔ ngɔ kɛ Yɔbɔ zi do ma dati ni fala bɔa.

¹¹ 'Do ki ni, nɛ onya Yɔbɔ vɛ̃, Owi wili nɛ do owuko nɛ, do owinɔ vɛ̃ kɛ wa ĩ zi ti a dati ni, wa tɛa, nɛ wa nyɔngɔ mɔ do a fala nɛ kpo. Nɛ wa hã kpã sila hã a olo 'bakonɔ vɛ̃ kɛ NWA hã zi ma hã a ni. Nɛ wele do wele 'dɔlɔ fɛ̃a mɔ bolo do pɛtɛ mɔ mbali hã a.

¹² Nɛ NWA wila 'bɔ nu a tɛ Yɔbɔ nɛa ngɔ kɛ zi dati ni. Nɛ a kpa obata koto 'bu ngɔ nɛ nalɛ, nɛ osamo koto gazɛlɛ, nɛ ongɔmbɔ koto bɔa, nɛ opunda koto kpo.

¹³ Nɛ a ko 'bɔ obulu be sambo, do oboko be talɛ.

¹⁴ A ia li kuti boko be 'da a ni na Yɛmima, nɛ li bɔa wele kɛ a Kɛsia, nɛ li talɛ wele kɛ a Kerɛnɛ-Hapukɛ

¹⁵ Ngɔ nùi ni vɛ̃, wa kpà zi mbe odia wuko ɔ nɛ be zɔnga benɔ 'da Yɔbɔ gɔ. Nɛ baa wa Yɔbɔ kɛ̃a kpamɛ 'da a hã wa wia kɔ̃ do kɛ 'da obulu nya wa.

¹⁶ Nɛ Yɔbɔ ɔa 'bɔ olo ngamɛ a zɔa zi ni sabɛlɛ kama kpo do 'bu nɛ nalɛ. Nɛ a zɔa benɔ 'da a, do obe yaa a, okaka a, do okanggadɔkɔ a vɛ̃.

¹⁷ Yɔbɔ dungu zi nza gbaa, nɛ a dɛ gbɛlɛ kpɔkɔɔ, nɛ a fe.