YƆBƆ 41 - WE NU GALE 1995

¹ Gɛnɛ kɔ linggamɔ zu mɔ ɔkɔlɔ mɔ na, mɔ wia we nɛ ngɔ a, kɔ mɔ nɛ zɔ a, nɛ mɔ mbɔkɔ, nɛ mɔ te bunya.

² Mɔ do bɔ zu mɔ sɛ nɛ mɔ tulu a de. Ní nɛ wi wia we yolo dati mi Gale a wio nde?

³ Wele do ku'da zu mi bina, mɛnɔ nyanga nza gɛ vɛ̃, wele nɛ a mɔ́ mi!

⁴ Mi nɛ tɔ̃ di ni lɛnggɛ ngɔ ngawi 'da nga'bala, do kili tɛ̃ a, do dia ndala tɛ̃ a.

⁵ Wi ɛ̃lɛ̃ mbe ndala tɛ nga'bala a wio nde? Wi fi kɔ ɛ kɔ nu a do dɛa sa a wio nde?

⁶ Wi 'bã mbe 'bangga a do nga nɛ, nɛ gogo a kɛ ma hã kili hã winɔ ni, ɔ dɛ nza, wi a wio nde?

⁷ Kɔa 'do a nɔa ngbɛ ɛ do lɔnggɔ nɛ, nɛ ma nganda ɔ nɛ ngele ni.

⁸ Ma na ngbɛ ɛ kpo do kpo, nɛ bũ wè tɛ la ngbala nɛ gɔ.

⁹ Kɔa tɛ̃ a nãlã dɛ tɛ ngbɛ ɛ kpo do kpo, nɛ ma mba vɛ̃ kpo, fo fala yala sanga nɛ bina.

¹⁰ A zafa, nɛ zɔ̃ a nyɛ we gai. Gbali a fele nɛ́ wese titole ni.

¹¹ Kɔ nu a nyɛ do we, nɛ be tolo we hɔ nza kɔ nɛ.

¹² Nɛ zɔ́ a kutu do gba zɛ̃ we tau tau, ɔ nɛ kpana kɛ wa ia li gba nyɛa we ni.

¹³ Bũ nu a ba we kpangbangba, ma te tɛ kalĩ, nɛ ma nyɛ we, nɛ kɔ nu a nyɛ we gai gai.

¹⁴ Gɛlɛ a do ngawi kɔ nɛ wena, mɔ zɔ a, nɛ mɔ gɔnɔ kili kɛ̃lɛ̃ iko.

¹⁵ Ndala tɛ̃ a dĩlĩ ngɔ ngbɛ ɛ wena, nɛ ma nãlã dɛ tɛ̃ a nganda nɛ mba mɔ ni, ma wè tɛ ɛ̃lɛ̃ nɛ gɔ.

¹⁶ Sila a nganda nɛ́ kpangba ta ni, a dɛ́ kili mɔ kpo gɔ.

¹⁷ Fala kɛ a kulu ngɔ, nɛ zu owi ngawinɔ vĩ, nɛ wa tana kili, nɛ wa yu.

¹⁸ Du kɔya wè tɛ le tɛ̃ a gɔ, nɛ sɛlɛ, tabi nge, tabi kpili é dani tɛ̃ a gɔ.

¹⁹ Mɔ bolo ɔ li a nɛ gbãlã zɔ̃ ni, nɛ tũ mɔ bolo ɔ nɛ mbulu te ni.

²⁰ Kpili wè tɛ ndaka a gɔ, nɛ a zɔ tanɔ wa lo do a ni ɔ nɛ bũ̀ ma ala dɛ tɛ̃ a ni.

²¹ Dɔnɔ ɔ li a nɛ 'bulu wɔkɔsɔ ni, nɛ a mɔmɔ zanɔ wa da hã a ni mɔma.

²² Kɔa ngɔ zã a nĩlĩ dɛ ngɔ ngbɛ ɛ nɛkpɛtɛ nɛkpɛtɛ, nɛ nu nɛ tɔ̃a nɛ́ nu kongo ni. A hala ngɔ 'bɛ̃tɛ̃, nɛ olo a ɔ nɛ wa gɔmɔ dɛ ngɔ gɔma ni.

²³ A le 'dɔ lì, nɛ ma anga sala sala, nɛ ma kutu nganda wena nɛ́ bawe kambili ni.

²⁴ A la, nɛ li wala olo a yele ngbaa, nɛ ngɔ lì kutu olo a kpurr.

²⁵ Fo mɔ we kɔ̃ do a ngɔ nu gɛ bina, mi dɛa a, nɛ mi è kili kɔ sila a gɔ.

²⁶ A zɔ odã sa'denɔ li a yala, we kɛ a a nwa ngɔ wa vɛ̃.