YƆBƆ 40 - WE NU GALE 1995

¹ Nɛ NWA sa mɔ hã Yɔbɔ, nɛ a aka a na:

² Mɔ, kɛ mɔ ba kafi nu mi Gale, kɛ mi do nganda vɛ̃ ni, mɔ do mbé we we gese hã mi boe nde?

Yɔbɔ gisa nu we hã Gale

³ Nɛ Yɔbɔ gese hã NWA Gale na:

⁴ Mi gɛ a mɔ gɔ, kɔ mi nɛ gese hã mɔ na ge nde? Mi kpia nu mi ia, mi tɔ̃ sɛ mbé we gɔ.

⁵ Mi tɔ̃a wenɔ vɛ̃ ia, mi é sɛ 'bɔ mbé we ngɔ nɛ gɔ.

Gale wila we hã Yɔbɔ

⁶ Nɛ NWA Gale tɛa dɛ kɔ gba bũ kamba, nɛ a sa 'bɔ mɔ hã Yɔbɔ, nɛ a tɔ̃ hã a na:

⁷ Ngangga ni, mɔ ngo tɛ mɔ, nɛ mɔ yolo nganda, nɛ mɔ gésé nu wenɔ mi nɛ aka do mɔ gɛ.

⁸ Mɔ kɔ̃a we 'danga 'bili we 'da mi nde? Mɔ kɔ̃a we be na mi do 'dã gulu we, nɛ mɔ do dia gulu we nde?

⁹ Mɔ nganda wia kɔ̃ do mi nde? Mɔ wia we o dã ɔ nɛ mi ni nde?

¹⁰ Ma ɔ na mɛ nɛ̀ nɛ mɔ kúlú ngɔ, nɛ mɔ kálá dɔ̃lɔ̃ li do gã wi 'da mɔ dɛ tɛ mɔ,

¹¹ nɛ mɔ siki li mɔ dɛ tɛ Owi gã zunɔ, nɛ mɔ be nɔ̃lɔ̃ zã 'da mɔ hã wa, nɛ mɔ hã sape hã wa.

¹² Mɔ á li mɔ ngɔ o'dã winɔ ni, nɛ mɔ fo dĩ zu wa, nɛ mɔ mbɔtɔ wa dɛ fala wa nɛ ni.

¹³ Mɔ ílí wa dɛ kɔ le 'da ofionɔ, nɛ mɔ mi wɔlɔ wa fala nɛ kpo. Nɛ mɔ kpe nu le 'da ofionɔ dɛ ngɔ wa, nɛ ta zu wele ele ngɔ wa.

¹⁴ Mɔ dɛ ni, nɛ mi dɔnggɔ sɛ mɔ, nɛ mi kɔ̃ sɛ na, mɔ nɛa ngɔ wa do ngawi 'da mɔ.

Wi dɛa ngu'bu wi a Gale

¹⁵ Mɔ ká mɔ hã mɔ zɔ gba sɔ̃ ngu'bu! Mi a mi dɛa a ɔ nɛ kɛ mi dɛa do mɔ ni. A nyɔngɔ wɔkɔsɔ ɔ nɛ ngɔmbɔ ni,

¹⁶ nɛ nde a do ngawi wena, nɛ tɛ̃ a sɔ̃a nɛ mba mɔ ni.

¹⁷ A ngo do a, nɛ ma nganda nɛ́ te ni, nɛ nĩ nyanga a kulu ngɔ zagba'da zagba'da.

¹⁸ Gbãlã tɛ̃ a nganda nɛ́ tũ mɔ bolo, nɛ gbãlã ngu'du a ɔ nɛ kili mɔ bolo ni.

¹⁹ A nɛa ngɔ osa'denɔ mi dɛa wa ni vɛ̃, nɛ mi kɛ mi dɛa a ni, mi wia we e mbula ngɔ a.

²⁰ A kũ, nɛ a nyɔngɔ wɔkɔsɔ ngo kalanɔ i, tɛ fala osa'de zamɛnɔ wa dɛ do sa 'da wa ni.

²¹ A ɔ nù ti onwá kɔakonɔ nu lì i, nɛ a usu tɛ̃ a ti sala tɔ̃nɔ.

²² A kpe tɛ̃ a ti onwá gbazalanɔ, do ti tenɔ kɛ zã nu lì ni.

²³ Gɛnɛ kɔ lĩ fo nganda wena, tabi ngele lì go'do gbaa ti gɛlɛ a, nɛ nde kili bá a gɔ.

²⁴ Wi wia we tɛ do ngɔ li a, nɛ a ba a, nɛ a gbo zɔ̃ a, nɛ a fi fɛlɛ tɛ nɛ, wi a wio nde?

Wi dɛa nga'bala tabi gba sɔ̃ sa'de wi a Gale

²⁵ Mɔ wia we da nga'bala do galĩ nde? A wia we ba galĩ 'da mɔ nde?

²⁶ Mɔ wia we gbo 'bangga a do mɔ bolo, nɛ mɔ fi te nu a nde?

²⁷ Mɔ lengge na, a wia we 'bɔndɔ mɔ, nɛ a ala nu a hã mɔ nde?

²⁸ A wia we kpo mbulu hã mɔ, nɛ a dɛ to hã mɔ fai ndɔti nɛ a fio nde?

²⁹ Mɔ wia we kpo fɛlɛ tɛ̃ a nɛ́ be nɔɛ ni, nɛ mɔ la a hã oboko benɔ 'da mɔ na, wa dɛ sa do a nde?

³⁰ Owi da galĩnɔ wa wia we mba li ngba wa, nɛ wa ba a, nɛ wa be gole a nde? Wa wia we gɔmɔ sa'de a dɛ kɔ̃ owi be golenɔ nde?

³¹ Mɔ wia we zɛ a do mɔ bolo, nɛ ndala tɛ̃ a 'bili, tabi zu a o nde?

³² Fala kɛ mɔ e kɔ̃ mɔ tɛ̃ a we bi do a, nɛ nde ta zu mɔ élé sɛ ngɔ nɛ gɔ, nɛ mɔ dɛ́ sɛ 'bɔ mbé nɛ gɔ!