YƆBƆ 4 - WE NU GALE 1995

Lɛ gbini zã lɛ do Gale

¹ Yɔbɔ nɛa we da nu ɛ, nɛ Elifazɛ, wi kɔ le Temanɛ, tɔ̃ hã a na:

² Aa Yɔbɔ, fala kɛ mi wele we hã mɔ, nɛ mɔ zele sɛ nde? Mi wè 'bɔ we kpe nu mi dɛ ngɔ ma fai gɔ.

³ Mɔ gala zi gba gili Owele do mbulanɔ 'da mɔ, nɛ mɔ nganda sila owanɔ wa mbɔka ni.

⁴ Tati a do lɛnggɛ nu mɔ iko, nɛ mɔ kala owinɔ wa kɔ zu nyanga wa, do owanɔ wa te ti dĩ tole ni, nɛ mɔ zĩ wa do nyanga wa.

⁵ Kɔ ngangga ni, ngamɔ kpa mɔ, nɛ mɔ kùnù sila mɔ gɔ, nɛ gbãlã zã mɔ bi vɛ̃.

⁶ Mɔ kɔ̃a zi zu li Gale, nɛ mɔ dɛa zi mɔ tɛ mɔ do dia nɛ gbali a. Ní a ma wia na mɔ gbini zã mɔ do a, nɛ mɔ e sila mɔ ngɔ a.

⁷ Mɔ lénggé sɛ! Wele dɛ̃ 'dã gɔ, nɛ a kpa ngamɔ iko, nɛ a fe nde? Mɔ zɔa mbe na, wi bɔlɔ zu fia kɔ ngamɔ nde?

⁸ Mi gɛ, mi zɔa mɛ na: Wanɔ kɛ wa dɛ 'dã mɔ tabi wa zɛlɛ tɛ onya wa ni, nɛ wa kpa si olo mɛnɔ wa dɛa ni.

⁹ Nɛ gã nɔ̃lɔ̃ zã 'da Gale ma tɛ ɔ nɛ gba bũ kamba ni, nɛ ma kumu winɔ ni vɛ̃.

¹⁰ Gɛnɛ ko wa he mɔ tabi wa ngbu dã ɔ nɛ ogbɔgbɔ ni, nɛ Gale kpe nu wa, nɛ a gbini gogo wa vɛ̃.

¹¹ O'dã winɔ ni wa ɔ nɛ gbɔgbɔ kɛ a zɔlɔ sa'de nyɔngɔ nɛ, nɛ a fe, nɛ obenɔ 'da a wa pɛsɛ ndũu ni.

¹² Mbe sako kpo ma tɛ la do usu nɛ, nɛ wana nɛ gbua zala mi be sĩ.

¹³ Mi yala zu mi do tũ, nɛ yalɛ ni ma kala yala li mi.

¹⁴ Kili ba mi nganda wena, nɛ tɛ mi vɛ̃ tana.

¹⁵ Be mɔ pɛpɛ ngɔ li mi ɔ nɛ bũ ni, nɛ ma a kulu gɛ̃ tɛ mi vɛ̃.

¹⁶ Mi zɔa wele kpo, a yula dɛ dati mi, mi suka a, nɛ mi ĩ̀ ti a gɔ. Fo zi wila we kpo bina, nɛ dɛ 'do nɛ, nɛ mi zele gɛlɛ a na:

¹⁷ “Wele wia we nɛ ngɔ Gale do bɔlɔ zu nde? Wele wia 'bɔ we sa nɛ ngɔ Gale, wi dɛ a nde?

¹⁸ Gɛnɛ kɔ Owi tonɔ 'da a li nza i, nɛ nde Gale do kafi kɔ sila a dɛ ngɔ wa boe. Gɛnɛ kɔ oanzɛnɔ, nɛ nde wa yɔ 'bɔ yɔa,

¹⁹ tɔlɔ do Owele nde! Gale dɛa Owele do gili iko, a wia we gbini zã a do wa nde? Wa a 'bua nu iko, a o wa nɛ́ kɛ wele o do 'bisi ni.

²⁰ Wa wia we ɔ do tunu li wa do titole, kɔ wese nɛ gɛ̃ nɛ, nɛ nde wa fia ia. Wa fe, nɛ wa 'bana do zu wa, nɛ fo wi lengge 'bɔ do wa bina.

²¹ Mɔ olo wa 'danga vɛ̃, nɛ li wa mbiti ngɔ nù gɛ do'do, nɛ nde wa tɛ kpà gulu dungu nza gɔ.”