YƆBƆ 39 - WE NU GALE 1995

¹ Mɔ ĩ ti zɔlɔ kula 'da odua zamɛnɔ nde? Mɔ zɔa mbe zambɛlɛ tɛ ko nɛ ia nde?

² Mɔ tɔla mbe zɛkɛ zã 'da wa, nɛ mɔ ĩ ti ngba soe wa ko sɛ nɛ ni nde?

³ Onaa wanɔ wa gu nù, nɛ wa ɔmɔ, nɛ benɔ wa hɔ nza kɔ zã wa dɛ nù.

⁴ Kɔ 'da fala kɛ tɛ benɔ ni nganda hã wa gã, nɛ wa la naa wa fai, nɛ wa kpóló 'bɔ mbé tɛ wa gɔ.

⁵ Wi kɛ a yala fɛlɛ tɛ punda zamɛnɔ, nɛ a da kɔ̃ a tɛ wa na wa yɛnggɛ ni, wi a wio nde?

⁶ Mi tombo wa dɛ li futu i, nɛ wa ɔ dɛ ngɔ nùi kɛ ma do tɔ̃ tɛ nɛ ni.

⁷ Wa kɔ́lɔ́ do lenɔ kɛ giti kɔ nɛ wele sɔ̃ɛ ni gɔ, nɛ wa zélé gɛlɛ wele tɛ he mɔ zu wa gɔ.

⁸ Fala nyɔngɔmɛ 'da wa, mɛ a ngɔ kalanɔ wa yɛnggɛ nɛ ni, nɛ wa fa otɔlɔ nwánɔ dɛ di ni, nɛ wa nyɔngɔ.

⁹ Yele wia we kɔ̃ na, ɛ dɛ to hã mɔ nde? A wia we ɔ kɔ ba'de 'da mɔ nde?

¹⁰ Mɔ wia we kpo mɔ bolo tɛ̃ a na a gbɔtɔ ma, nɛ ma 'bili fɔ 'da mɔ kɔ gbangɔlɔ̃ i ni nde?

¹¹ Mɔ wia we a tɛ mɔ do gã ngawi 'da a, nɛ mɔ la toe 'da mɔ hã a na a dɛ ma nde?

¹² Mɔ wia we gbini zã mɔ do a na, a yɔnggɔ kpalɛ li fɔ 'da mɔ dɛ le nde?

¹³ Gba nɔɛ li goe kɛ li a a otrisɛ ni, a yu, nɛ a fi 'baka a de wena, nɛ sala tɛ̃ a dia 'bɔ nɛ́ mba mɔ ni.

¹⁴ Nɛ nde gba nɔɛ ni ko kuli ɛ dɛ zã kɛnzɛ, nɛ a la ma dɛ zã kɛnzɛ ni na, ma ba we se'de,

¹⁵ nɛ a lénggé mbe na, wele tabi sa'de zamɔ wia tɛ ma ma, nɛ ma o ni gɔ.

¹⁶ A kɔ̃̀ gɛnɛ obenɔ 'da a gɔ, a zɔ wa nɛ́ ogele be ni, nɛ ngamɛ kɛ a kpa we ko wa ni, a zɔ ma li a yala iko.

¹⁷ A dɛ ní we kɛ mi ha hã zã hã a gɔ, nɛ a ĩ̀ ti mɔ gɔ.

¹⁸ Nɛ nde fala kɛ a ndo yu nɛ, nɛ a la mbalata do wi kũ ngɔ a do 'do a, ɔ nɛ dɛa sa ni.

¹⁹ Mɔ a mɔ hã ngawi hã mbalata, nɛ mɔ dɛ na, sala 'do gɛlɛ a ɔ du,

²⁰ nɛ a bũlũ ɔ nɛ nga'di ni, nɛ hiamɔ gɛlɛ a hã kili hã wele nde?

²¹ A ma nùi kɔ gbangɔlɔ̃ i do ngawi vɛ̃, nɛ a yu dɛ dati ogele sodanɔ we bi do wa.

²² Fo mɔ hã kili hã a bina, nɛ a yú dati du kɔya gɔ.

²³ Wa gãlã okpili, do sɛlɛ, do za tɛ zã a. Okpilinɔ ni ma zɛ ngbɛ ɛ kɔ ndele ngbɛnggɛ ngbɛnggɛ, nɛ li za do sɛlɛ to vɛ vɛ vɛ ni.

²⁴ A yu dɛ dati, nɛ sila a ndɔ́ nu gɔ, a zele giti mɔtũlũ bole, nɛ nde a mbɔkɔ sila a gɔ,

²⁵ nɛ a kɔ̃ nu nɛ do hiamɔ. A 'bana ndũu, nɛ fala tɛ bolo unu a, nɛ a zele gɛlɛ ogã wi ngɔ sodanɔ tɛ he mɔ.

²⁶ Mɔ a mɔ hã hã zã hã ngo'be na, a bũlũ, nɛ a la si ba gɔtɔ nde?

²⁷ Mɔ a mɔ ba nu mɔ hã ziki na, a bũlũ dɛ ngɔ nyɛlɛ wena, nɛ a dɛ tɔa zu gba ngala kalanɔ i nde?

²⁸ A ɔ ndũu kɔ tanɔ ngɔ i, nɛ wele wè tɛ hɔ fala ɔi 'da a gɔ.

²⁹ A 'bana dɛ ngɔ mɔ, nɛ a fa sa'de we nyɔngɔ a, nɛ a ka mɔ, nɛ a zɔ a ndũu.

³⁰ Obe zikinɔ wa nɔ tɔkɔ. Nɛ fala wɔlɔ tɛ nɛ ni, nɛ oziki wa ngɛmɛ dɛ di ni.