YƆBƆ 38 - WE NU GALE 1995

GALE GESE NU WE HÃ YƆBƆ

¹ NWA Gale tɛa dɛ kɔ gba bũ kamba, nɛ a sa mɔ hã Yɔbɔ, nɛ a tɔ̃ hã a na:

² Mɔ a wio nde? Gulu kɛ mɔ ba kafi hã zã 'da mi, nɛ mɔ tɔ̃ lɛnggɛ kɛ mɔ ĩ̀ ti gulu nɛ gɔ ni we ge nde?

³ Ngangga ni, mɔ ngo tɛ mɔ, nɛ mɔ yóló nganda, nɛ mɔ gésé nu wenɔ mi nɛ aka do mɔ gɛ.

Gale dɛa ogba mɛnɔ nyanga nza gɛ vɛ

⁴ Fala kɛ mɔ ĩ ti mɔ wena nde, nɛ mɔ tɔ̃́! 'Da fala kɛ mi dɛa zi do nùi gɛ, mɔ zi boe nde?

⁵ Mɔ ĩ ti wi kɛ a ia 'da gã li nùi, do 'da du nɛ ni nde? Nɛ wi wia ma do fɛlɛ a wio nde?

⁶ Nyanga nùi yolo dɛ ngɔ ge nde? Nɛ wi zĩ zi bɛlɛduma nùi a wio nde?

⁷ Do 'da fala ni, osɔla titolenɔ wa ga zi zuma nzɛmbɔɔ, nɛ oanzɛnɔ li ngɔ i, wa he zi hiamɔ yangga.

⁸ Wi kpia zi nu tɔa dɛ ngɔ ngele gba lì, do 'da fala ma go'do zi zã nùi dɛ nza ni, wi a wio nde?

⁹ Mi a mi fi zi tũ kolo na, ma kele ngɔ gba lì, nɛ mi gu gba kutu ngɔ nɛ ɔ nɛ tulu ni.

¹⁰ Mi zĩ zi ngbala sanga gba lì do nùi na, ma 'bana dɛ 'do ngbala ni.

¹¹ Nɛ mi tɔ̃ hã gba lì na: “Mɔ yɛnggɛ gbaa, nɛ mɔ Sɔkpɔ dɛ dɛ. Gɛnɛ kɔ mɔ dɛ ngele wena, nɛ mɔ tɛ kṹ ngɔ ngbala gɛ gɔ.”

¹² Kɔ dungu nza 'da mɔ, mɔ ba mbe nu mɔ na, fala sa, nɛ fala sa do olo nu mɔ ni nde? Mɔ hã mbe to hã sa fala ni na,

¹³ ma sala nyanga nùi, nɛ ma zɛgɛ'dɛ o'dã winɔ nde?

¹⁴ Wese gba, nɛ mɛnɔ nu gɛ be tɛ̃ ɛ ɔ nɛ dã tɛ kpana ni, nɛ wa zɔ ma. Nɛ mɛnɔ ngɔ nùi gɛ vɛ̃ ɔ dɛ wila fala ɔ nɛ dã tɛ tulu ni.

¹⁵ Ki ni, nɛ o'dã winɔ wa mbɔkɔ vɛ̃, nɛ wa 'bɔ do ngawi we dɛ 'dã mɔ bina.

¹⁶ Mɔ nɛa mbe, nɛ mɔ hɔ zu gba lì, nɛ mɔ zɔ ma nde? Mɔ yɛnggɛ mbe ti go'do gba lìnɔ nde?

¹⁷ Wa bia mbe nu ngbo 'da ofionɔ hã mɔ, nɛ mɔ zɔ ma nde?

¹⁸ Mɔ ĩ ti 'da gã li nùi gɛ nde? Mɔ ĩ ti mɛnɔ ni ĩ ngboo, nɛ mɔ be gulu nɛ hã mi.

¹⁹ Sa fala yula do nde? Nɛ gba tũi ɔ do nde?

²⁰ Mɔ wia we hɔ nu tɔa 'da wa i, nɛ mɔ gese wa dɛ olo wa nde?

²¹ Mɔ gɛ, wa kua mɔ zɛ́ belee, nɛ mɔ ɔ ngɔ nùi gɛ wena, mɔ ĩ ti mɛnɔ ni vɛ̃ gɔ nde?

²² Mɔ nɛa mbe, nɛ mɔ hɔ nu kɔ̃ɛ, kɛ mi usu do gbãlã mũlũnɔ ni nde?

²³ Mi usu ma we 'bɔ do 'da ngba soe ngamɔ, do ngba soe kɛ bolo nɛ te nɛ ni.

²⁴ Mɔ hɔa fala wese kulu nɛ ngɔ ni nde? Mɔ hɔa fala kɛ bũi yolo nɛ si 'biti gba wese, nɛ ma fi, nɛ ma yɛ'bɛ ngɔ nùi ni nde?

²⁵ Wi gba wala hã kole li ngɔ gɛ a wio nde? Wi fi wala hã tũ kole ma o dã gɛ a wio nde?

²⁶ Wi dɛ na, kolo tɛ li go i, tɛ fala wele ɔ́ tɛ nɛ gɔ ni,

²⁷ nɛ onga kula nùnɔ ma kpa lì, nɛ owɔkɔsɔ ma hɔ ngɔ nɛ ni, wi a wio nde?

²⁸ Baa kole ma tɛ gɛ boe nde? Wi kua ombɔɛnɔ a wio nde?

²⁹ Mɔ ĩ ti naa gbãlã mũlũ nde? Mɔ ĩ ti fala gɛ̃ yolo tɛ nɛ ni nde?

³⁰ Do zɔlɔ gɛ̃, nɛ lì ngo gbo'do, nɛ ma nganda nɛ́ ta ni, nɛ ma kele ngɔ ogba lìnɔ vɛ̃.

³¹ Mɔ ká mɔ hã mɔ zɔ́ ngɔ gili osɔlanɔ. Mɔ wia we ɛnzɛ Takula dɛ tɛ ngbɛ ɛ nde? Tabi mɔ wia we bulu fɛlɛ tɛ Sɛto do Be Zɔnga Benɔ 'da a nde?

³² Mɔ wia we dɛ na, gbandolo hɔ do 'da fala nɛ ngboo nde? Mɔ wia we kã Kungguwala do obenɔ 'da a nde?

³³ Mɔ ĩ ti mbula kɛ wa ia ma hã omɛnɔ li nza gɛ nde? Nɛ mɔ a mɔ be tonɔ wa dɛ ma ngɔ nùi gɛ hã wa nde?

³⁴ Mɔ wia we ba nu mɔ hã tũ kolonɔ, nɛ kolo tɛ, nɛ ma lɔ'bɔ mɔ nde?

³⁵ Mɔ wia we sa mɔ hã nyɛa li kolonɔ, nɛ mɔ tombo wa, nɛ wa zele we nu mɔ nde?

³⁶ Wi fi hã zã gbombe we i na, lì Nilɛ ndua hɛ̃ nɛ ia ni, wi a wio nde? Wi kɛ a tɔ̃ hã onɔɛ ngelenɔ na wa la, we kɛ zɔlɔ lì kole hɔa ia ni, wi a wio nde?

³⁷ Wi kɛ a do hã zã we tɔlɔ otũ kolonɔ, nɛ a tɛnɛ lì kole kɔ nɛ dɛ nù,

³⁸ nɛ kɛnzɛnɔ ma 'bɔ, nɛ ma 'bo ngbɛ ɛ ni, wi a wio nde?

Gale a nwa ngɔ osa'denɔ

³⁹ Mɔ a mɔ gbɛ sa'de hã ogbɔgbɔnɔ na, wa nyɔngɔ ma, nɛ zã wa hɛ̃ nde?

⁴⁰ 'Da fala kɛ wa usu tɛ wa kɔ kɔ̃ tabi zã lu'du, nɛ wa wɛ sa'denɔ we ba wa ni, nɛ wi hã sa'de hã wa, wi a wio nde?

⁴¹ Wi fa nyɔngɔmɔ hã oganakelenɔ, do 'da fala kɛ wɛ mbɔkɔ wa, nɛ benɔ 'da wa wa he kɔ̃a wɛ gboo ni, wi a mi Gale gɔ nde?