YƆBƆ 37 - WE NU GALE 1995

¹ Mi zɔ gba kole kɛ ma tɛ ni, nɛ sila mi tana, nɛ ma to kpu kpu kpu.

² Aa nɛ, nɛ zélé giti gɛlɛ Gale! Nɛ zélé ua dã 'da a.

³ Gale da onyɛa li kolonɔ li nza i, nɛ ma nyɛ, nɛ ma hɔ gbaa ndɔti nùi.

⁴ 'Do nɛ, nɛ wa zele gɛlɛ a tɛ o dã do ngawi, nɛ do 'da fala ni, nɛ kole nyɛ li ɛ nyɛa fai.

⁵ A o dã, nɛ omɔ ɔ ɔngba ma dɛ tɛ̃ ɛ, nɛ lɛ wè tɛ ĩ ti gulu mɛnɔ ni gɔ.

⁶ A ba nu a hã gbãlã mũlũ na, ma ala, nɛ a tombo gba kolo 'butu dɛ ngɔ nù nga.

⁷ Na mɛ ni, a dɛ na, owinɔ wa da kɔ̃ wa tɛ tonɔ 'da wa, nɛ wa lengge do mɛnɔ a dɛ ma ni, nɛ wa tɛ bà 'bɔ kafi ngawi 'da a gɔ.

⁸ Nɛ osa'denɔ wa yu dɛ kɔ kɔ̃nɔ 'da wa, nɛ wa hɔ́ 'bɔ nza gɔ.

⁹ Nɛ gba bũ kamba fi, nɛ gɛ̃ɛ yolo si gbãlã ngɔ, nɛ ma ba.

¹⁰ Gale ufu bũ nu ɛ dɛ ngɔ lìnɔ, nɛ ma gɛ̃, nɛ ma ngo nɛ́ mɔ bolo ni.

¹¹ A dɛ na, otũ kolonɔ ma dunu do lì, nɛ a tombo ma fala nɛ kpo do onyɛa li kolonɔ,

¹² nɛ ma yɛnggɛ falanɔ kɛ a kɔ̃a ni vɛ̃. Nɛ ma dɛ mɛnɔ nyanga nza gɛ vɛ̃, ɔ nɛ kɛ a ba do nu a hã ma ni.

¹³ Gale tombo kolo tɛ ngɔ nù nga na ma tɛ. Kɔ ma tɛ 'bana sanga, nɛ ma be dia zã 'da a hã owinɔ, hã ma tɛ gã wena, nɛ ma hã etumbu hã wa.

¹⁴ Aa Yɔbɔ, mɔ zɔ́ ɔngbamɛnɔ kɛ Gale dɛa ni do sɔ̃a li, nɛ mɔ yámbálá ngɔ nɛ sɛ.

¹⁵ Mɔ ĩ ti tɛlɛ tɛ kɛ Gale ba do nu a, nɛ kole nyɛ li ɛ dɛ kɔ tũ kole ni nde?

¹⁶ Mɔ ĩ ti tɛlɛ tɛ kɛ tũ kole yɛnggɛ do li ngɔ gɛ, nɛ nde ma té gɔ ni nde? Ĩ na, Gale a dɛa mɛnɔ ni vɛ̃ do gã hã zã 'da a.

¹⁷ 'Da fala bawe bũi yolo si ba gɔtɔ, kɔ ma fi dɛ ngɔ nùi nga, nɛ mɔ bi na, tɛ mɔ ba we kpangbangba.

¹⁸ 'Da fala kɛ Gale dɛa zi li nza, nɛ ma nganda nɛ́ mɔ bole ni, mɔ gala zi a tɛ nɛ nde?

¹⁹ Mɔ bé lɛnggɛ lɛ wia we tɔ̃ hã Gale ni hã mi. We kɛ lɛ a kɔ gba tũ, nɛ fo dia lɛnggɛ nu lɛ bina.

²⁰ Wele wia we mbese Gale na, ɛ tɔ̃ lɛnggɛ do a nde? Wele wia we tɔ̃ gulu we hã a nde?

²¹ 'Da fala kpo, nɛ tũ kolo kele li wese, nɛ wese bi tũ, nɛ wele zɔ́ 'bɔ mɔ do dia nɛ gɔ. 'Do nɛ, nɛ bũi fi, nɛ li nza sa.

²² Nɛ yele ngbala yele do si gbãlã ngɔ, nɛ dɔ̃lɔ̃ li 'da Gale hã kili hã lɛ.

²³ Gale do nganda vɛ̃, lɛ wè tɛ kɔlɔ do a gɔ. Gbãlã we 'da a, do nganda 'da a ma la mɔ vɛ̃. Nɛ a zɛ́lɛ́ tɛ wi bɔlɔ zu gɔ.

²⁴ Gulu nɛ a owinɔ wa yu kili a ni. Hã fala kɛ wele ba tɛ̃ ɛ na, gbãlã zã ɛ siki wena, nɛ nde Gale lénggé do a gɔ.