YƆBƆ 36 - WE NU GALE 1995

Elihu tɔ̃a lɛnggɛ 'da Gale

¹ Nɛ Elihu lɔ̃ 'bɔ na:

² Aa Yɔbɔ, mɔ mbɔ́kɔ́ mi be sĩ, hã mi be 'bɔ tala gulu we 'da Gale hã mɔ.

³ Mi nɛ fa 'du gulu lɛnggɛ ngboo, we be do dia gulu we 'da Gale, kɛ a dɛa mi ni dɛ nza.

⁴ Lɛnggɛ kɛ mi nɛ tɔ̃ ma gɛ, mɛ a bɛlɛ gɔ, mi ĩ ti nɛ de wena, mɛ a gbãlã we ngboo.

⁵ Lɛ ĩ de wena na, Gale do nganda vɛ̃, a wè tɛ mɔmɔ wele gɔ. A a nwa ngɔ mɛnɔ vɛ̃, a 'bili we, nɛ ma 'bana do olo nu a ni fai.

⁶ A gbɛ Owi dɛ 'dã mɛnɔ, nɛ a dɛ bɔlɔ zu dɛa mɔ hã owi sãnɔ.

⁷ Gale bɛ̃́ gɛnɛ Owi bɔlɔ zunɔ gɔ. A hã dɔ̃lɔ̃ li hã wa ɔ nɛ onwa ni, nɛ a kɔ̃ na, owinɔ wa dɔnggɔ wa.

⁸ Kɔ fala kɛ owinɔ wa kpa ngamɔ, kɔ ogele wele wa kala wa, hã wa fi dɔkpɔ gɛlɛ wa tɛ zɛlɛ tɛ wa,

⁹ nɛ nde mɛ ni ma dɛ tɛ̃ ɛ, we kɛ Gale kɔ̃a we be 'dã mɛ 'da wa, do tɛlɛ tɛ kɛ wa bɛ̃a do we nu a ni hã wa.

¹⁰ Nɛ a yaka zala wa na wa zele we, kɔ wa la fala dɛ 'dã mɔ.

¹¹ Fala kɛ wa zele mbula 'da Gale, kɔ wa dɛ olo nu a, nɛ a hã sɛ dia dungu do yangga hã wa.

¹² Kɔ ní gɔ, nɛ wa kpa sɛ fio, nɛ nde wa ĩ sɛ ti gulu nɛ gɔ.

¹³ Owi bɛ̃ gɛnɛ Gale wa e mãlã hã a. Nɛ gɛnɛ kɔ wa kpa ngamɔ, nɛ nde wa kɔ̃̀ we ala nu wa hã Gale gɔ.

¹⁴ Owinɔ ni wa fe sɛ ngɔ nga tɛ wa, ɔ nɛ Owi yɛnggɛ vĩ zu yali ni.

¹⁵ Nɛ nde Gale fĩ li wi 'bakonɔ, do wala 'bakoe wa kpa ni, nɛ wa kpasa.

¹⁶ Zi dati, Gale fua zi mɔ kɔ 'bako, nɛ a hã yangga do dia dungu hã mɔ, nɛ mɛsa 'da mɔ dunu zi do omulu sa'de ngurr.

¹⁷ Nɛ nde da dɔ̃ gɛ, a 'bili 'dã gulu we hã mɔ, nɛ a hã etumbu hã mɔ, nɛ ma nɛa ngɔ mɔ.

¹⁸ Kɔ mɔ mbɔ́kɔ́ sila mɔ kɔ etumbui gɛ, nɛ zã mɔ tɛ nɔ̃̀lɔ̃̀ we nɛ gɔ. Mɔ tɛ lènggè na, mɔ wia we 'dɔlɔ dia mɔ hã Gale, nɛ sila a gɛ̃ dɛ tɛ mɔ gɔ.

¹⁹ Kpamɛnɔ do mɔ mbalinɔ 'da mɔ, ma wé sɛ we dɛ ki ni gɔ, nɛ ngawi 'da mɔ wè 'bɔ tɛ dɛ ma gɔ.

²⁰ Mɔ tɛ 'bã̀ kɔ̃ tũ 'bili ngbangga, kɛ Gale a hã sɛ do etumbui hã ogele winɔ ni gɔ.

²¹ Mɔ ngándá sila mɔ, nɛ mɔ tɛ dɛ̃ 'dã mɔ gɔ, we kɛ mɔ kpa ngamɛ gɛ olo 'dã mɛ 'da mɔ.

Gale a nwa ngɔ mɛnɔ vɛ

²² Gale do nganda vɛ̃, a a nwa ngɔ mɛnɔ vɛ̃. Nɛ a ĩ ti be mɔ nɛa ngɔ winɔ vɛ̃.

²³ Wi wia we e mbula ngɔ Gale a wio nde? Nɛ wi wia we kɔ'dɔ a a wio nde?

²⁴ Mɔ dɔ́nggɔ́ Gale we mɛnɔ a dɛa ni, ɔ nɛ kɛ owinɔ wa ga zɛ ma do zuma, we dɔnggɔ do a fai ni.

²⁵ Owinɔ vɛ̃ wa yolo nu ndũu, nɛ wa ka mɔ tɛ mɛnɔ a dɛa ni, nɛ wa ɔngbɔ ma.

²⁶ Gbãlã we, Gale gã wena, a gã la ngɔ hã zã 'da lɛ do'do, lɛ wè we ĩ ti sabɛlɛ 'da a gɔ.

²⁷ A dɛ na, lìnɔ ma kutu dɛ 'da a i, nɛ ma kifi kolo, nɛ ma tɛ.

²⁸ Lì kole yolo kɔ otũ kolonɔ ngɔ i, nɛ ma ala kpo kpo dɛ ngɔ owinɔ nu nga.

²⁹ Wele kpo ĩ̀ ti tɛlɛ tɛ kɛ tũ kole yɛnggɛ nɛ, do tɛlɛ tɛ kɛ kole o do dã li ngɔ gɛ ni gɔ.

³⁰ Mɔ ĩ de wena na, Gale dɛa nyɛa li kolonɔ li nza i, nɛ a 'bɔ a a dɛa go'do gba 'du lìnɔ.

³¹ A tombo kole dɛ nù nga, nɛ ma hã nyɔngɔmɔ hã owinɔ, nɛ wa kpasa do ma.

³² A kala onyɛa li kolonɔ dɛ kɔ̃ a, nɛ a da, nɛ ma to mɛnɔ ɔ nɛ kpili ni.

³³ Ua dã kole ma be na, gba kolo nɛ tɛ tɛa, nɛ osa'denɔ wa ĩ we nɛ.