YƆBƆ 34 - WE NU GALE 1995

Elihu tɔ̃a ngbangga dɛ ngɔ Yɔbɔ

¹ Nɛ Elihu tɔ̃ 'bɔ na:

² Aa nɛ, owi hã zãnɔ gɛ, nɛ ĩ ti mɔ wena, kɔ nɛ gɛ́ zala nɛ, hã nɛ zele mi sɛ.

³ Zala wi zele we, nɛ ma gɔnɔ sanga nɛ, ɔ nɛ kɛ nu wi yamba nyɔngɔmɔ, nɛ ma ĩ ti ɛ̃fɛ̃ nɛ ni.

⁴ Kɔ ma wia na, lɛ lengge ngɔ we gɛ, hã lɛ fa we ĩ ti gbãlã we kɔ nɛ.

⁵ Yɔbɔ tɔ̃a na, ɛ a wi bɔlɔ zu, nɛ nde Gale lénggé do bɔlɔ zu 'da ɛ gɔ.

⁶ Nɛ a 'bílí we 'da ɛ nɛ́ kɛ ma wia ni gɔ. Gɛnɛ kɔ gbãlã we a mɔ́ ɛ, nɛ a zɛlɛ tɛ̃ ɛ 'danga wena fai.

⁷ Andaka Yɔbɔ ɔ nɛ nde? A wele 'dã we hã Gale, ɔ nɛ kɛ a nɔ lì iko ni.

⁸ A mba ngɔ we do o'dã winɔ, nɛ a si 'do Owi dɛ 'dã mɔ.

⁹ Mba gɔ, a na: “Gɛnɛ kɔ mɔ fa na, mɔ de li Gale, nɛ nde mɔ kpá sɛ si mɔ olo nɛ gɔ.”

¹⁰ Nɛ, owinɔ kɛ gbãlã zã nɛ boe ni, nɛ zélé mi sɛ! Gale wia tɛ dɛ 'dã mɔ nde? NWA kɛ a do nganda vɛ̃, a wia tɛ dɛ yɔa ti dɛa mɔ nde?

¹¹ Ɔ̃ ɔ̃, Gale zɔ dɛa mɔ tɛ wele do wele, nɛ a si olo nɛ ɔ nɛ kɛ ma wia ni.

¹² Mɛ a gbãlã we na, Gale kɛ a do nganda vɛ̃, a wè tɛ dɛ 'dã mɔ gɔ, nɛ a 'dángá we 'da wi dɛ mbula fala kpo gɔ.

¹³ Wi hã nùi gɛ hã Gale a wio nde? Nɛ wi ia a do nwa ngɔ nùi gɛ a wio nde?

¹⁴ Gale lengge sɔ do kili tɛ̃ ɛ zu ɛ kpo, hã a fo sɔ bũ kpasi 'da a kɔ wele do'do,

¹⁵ nɛ winɔ vɛ̃ wa kumu sɔ fala kpo, nɛ wa kpolo sɔ tɛ wa dɛ tɛ nù.

¹⁶ Aa Yɔbɔ, mɔ ɔ do gbãlã zã mɔ boe nde, nɛ mɔ gɛ́ zala mɔ, hã mɔ zele we mi nɛ tɔ̃ ma gɛ.

¹⁷ Ɔ do kɛ Gale sɔ a wi dɛ mbula gɔ, nɛ a dungu sɔ nwa ngɔ nyanga nza vɛ̃ nde? Mɔ wia we 'bili 'dã we hã wele bɔlɔ zu nde?

¹⁸ Gale zu a kpo a wia tɔ̃ hã mbe nwa na: “Mɔ a yɔndɔ wi.” Nɛ a tɔ̃ hã ogã wi na: “Nɛ a o'dã wi.”

¹⁹ A sí 'do ogã wi gɔ, nɛ a kɔ̃̀ gɛnɛ wi kpamɔ nɛ ngɔ wi sã gɔ. We kɛ wi dɛa winɔ vɛ̃ wi a a.

²⁰ Fio gbanga winɔ ni, nɛ ma gbɛ wa. Do gbogbo zã tũ, nɛ Owele wa dɛ kili, nɛ wa fe, nɛ wa fo o'dã nwanɔ do mbɔkɔ tɛ.

²¹ Mba gɔ, Gale zɔ dɛa mɔ tɛ winɔ, nɛ a a li a ngɔ mɛnɔ wa dɛ ni vɛ̃.

²² Nɛ fo gba tũ we kele li a na, a tɛ zɔ̃ 'dã mɛnɔ 'da winɔ gɔ ni bina.

²³ Wele wè tɛ tɔ̃ ngbangga dati Gale, sɛ nɛ Gale ĩ ti gulu we 'da a de gɔ.

²⁴ A nɛ fo gã wi tɛ to we e gele wele olo a, nɛ nde a aka we ngɔ a aka gbaa gɔ.

²⁵ Mba gɔ, Gale zɔ dɛa mɔ tɛ gã winɔ zɔa. A gbanga wa do gbogbo zã tũ, nɛ a gbɛ wa.

²⁶ Gale hã ngamɔ hã wa dɛ li owinɔ vɛ̃, nɛ́ kɛ a dɛ do o'dã winɔ ni.

²⁷ Mba gɔ, ogã winɔ ni wa siki 'do wa lua do a, nɛ wa zɔ mbulanɔ 'da a li wa yala iko.

²⁸ Wa zɛlɛ tɛ wi 'bakonɔ do owi sãnɔ gbaa, nɛ owi 'bakonɔ ni wa ala nu wa hã Gale, nɛ a zele hiamɔ gɛlɛ wa.

²⁹ Kɔ fala kɛ Gale kɔ̃̀ we dɛ mɔ gɔ, nɛ wi nɛ tɔ̃ sɛ na a dɛ̀ de gɔ ni a wio nde? Fala kɛ Gale da li ɛ gele fala, nɛ wi nɛ kɔ'dɔ sɛ a a wio nde? Nɛ nde a fɔmɔ nu kɔnggɔ owinɔ vɛ̃ na,

³⁰ da dɛ kɔ 'dã nwa tabi wi 'bili bɛlɛ dúngú nwa ngɔ nùi gɔ.

³¹ Fala kɛ wele tɔ̃ hã Gale na: “Mi dɛa 'dã mɔ, mi dɛ́ sɛ 'bɔ mbé nɛ gɔ.

³² Nɛ 'dã mɛ kɛ mi dɛa, nɛ nde mi ĩ̀ we nɛ gɔ ni, mɔ bé ma hã mi. Hã fala kɛ mi dɛ 'dã mɔ dɛa nde, nɛ nde mi dɛ́ sɛ 'bɔ mbé nɛ gɔ.”

³³ Nɛ mɔ lengge na, Gale wia we hã etumbu hã a nde? Ɔ nɛ kɛ mɔ kɔ'dɔ Gale ni, mɔ tɔ̃̀ linggamɔ zu mɔ, hã lɛ zele, we kɛ wi 'bili we ni, wi a mɔ, wi a mi gɔ.

³⁴ Owinɔ kɛ gbãlã zã wa boe ni, do Owi hã zãnɔ wa zele we nu mi gɛ, nɛ wa tɔ̃ sɛ na,

³⁵ gbãlã zã Yɔbɔ bina, a ĩ̀ ti gulu we a wele gɛ gɔ.

³⁶ Mi kɔ̃a na lɛ aka a gbaa na, a la fala 'dã wenɔ a tɔ̃ nu a gɛ.

³⁷ Mba gɔ, Yɔbɔ do 'dã gulu we, nɛ a dɛ 'bɔ nga zu dɛ ngɔ nɛ. A wele o'dã we hã Gale, nɛ a mɔmɔ a dati lɛ.