YƆBƆ 33 - WE NU GALE 1995

Elihu tɔ̃a linggamɔ zu a ngɔ Gale

¹ Aa Yɔbɔ, mɔ gɛ̃ zala mɔ, hã mɔ zele wenɔ mi nɛ tɔ̃ hã mɔ gɛ.

² Mi wè 'bɔ tɛ kpe nu mi gɔ, mi kɔ̃a we tɔ̃ linggamɛ 'da mi dɛ nza.

³ Nɛ we mi nɛ tɔ̃ hã mɔ gɛ, mɛ a gbãlã we ngboo, mi 'bílí sɛ bɛlɛ gɔ.

⁴ Gale kɛ a do nganda vɛ̃ a dɛa mi, nɛ a ufu bũ nu a dɛ kɔ mi, nɛ ma hã kpasi hã mi.

⁵ Fala kɛ mɔ wia we ba kafi we mi tɔ̃ gɛ nde, nɛ mɔ 'dafa nu mɔ we tɔ̃ ngbangga do mi.

⁶ Lɛ wia kɔ̃ do mɔ dati Gale, a 'bua zi lɛ bɔa nɛ do nù.

⁷ Mɔ tɛ dɛ̃ kili mi gɔ, nɛ mi dɛ́ sɛ mɔ do mɔ gɔ.

⁸ Mi gɛa zala mi tɛ wenɔ mɔ wila ni, nɛ mi zila kɛ mɔ tɔ̃a na,

⁹ mɔ a wi bɔlɔ zu, mɔ dɛ̃ 'dã mɔ gɔ, nɛ mɔ dɛ̀ nga zu dɛ 'da Gale gɔ ni.

¹⁰ Nɛ nde Gale 'bana tɛ kɔ'dɔ mɔ fai, nɛ a zɔ mɔ nɛ́ wi sɛnɛ a ni.

¹¹ Nɛ a kɔ̃̀ we e mɔ ni iko gɔ, a soko mɛnɔ mɔ dɛ ni vɛ̃ suka.

¹² Yɔbɔ, gulu we 'da mɔ dè tɛ kɛ gɛ gɔ. Gale gã wena, nɛ a wè tɛ tɔ̃ lɛnggɛ do wele gɔ.

¹³ Gulu kɛ mɔ kɔ'dɔ a na, wele aka a do we, nɛ nde a gésé nu nɛ gɔ we ge nde?

¹⁴ Gale wele we do wala kpi do kpi, nɛ nde fo wi lènggè do ma bina.

¹⁵ Do tũi, nɛ owinɔ wa ɔ nù, nɛ yala nɛ ngɔ wa, nɛ Gale wele we hã wa kɔ yalɛ.

¹⁶ Do 'da fala ni, nɛ Gale be mɔ hã wa, nɛ a mbese wa do Sɔkpɔ mbisa we na,

¹⁷ wa la fala 'dã dɛa mɔ tɛ wa, nɛ wa tɛ dɛ̃ gã zu gɔ.

¹⁸ Na mɛ ni, nɛ Gale kpasa wele na, a tɛ tè li ngbangga kɔ a fe gɔ.

¹⁹ Ngba soe kpo, nɛ Gale hã etumbu hã wele, nɛ a fi a ngɔ tangge zɛlɛ. Nɛ tɛ̃ a vɛ̃ ba we kpangbangba, nɛ ma tana tuku tuku tuku gbaa,

²⁰ nɛ nyɔngɔmɔ 'danga nu a. Nɛ gɛnɛ kɔ nyɔngɔmɔ kɛ a kɔ̃a wena ni, nɛ ma dé 'bɔ nu a gɔ.

²¹ A ba zɛlɛ, nɛ a ɔkɔ gbaa, nɛ a ɔ nɛ gbãlã ni, nɛ fo 'bɔ wi ĩ ti a bina.

²² A kɔlɔ do fio dɔ̃ɔ, nɛ a 'bɔ we la dɛ kɔ le 'da ofionɔ i iko.

^23-24 Nɛ nde fala kɛ mbe kpo sanga odɛlɛ anzɛnɔ kɛ wa be bɔlɔ wala hã Owele ni, a ĩ 'bako hã a, nɛ a tɔ̃ sɛ we ngɔ a hã Gale na: “Mɔ tɛ tòmbò a dɛ kɔ le 'da ofionɔ i gɔ, we kɛ mi kpa wala we gɔnɔ zu a ia.”

²⁵ Nɛ wi ni kpa mbé ngawi, ɔ nɛ be zagbãlã ni.

²⁶ Kɔ 'da fala kɛ a sambala, nɛ Gale zele a, nɛ a ga zuma yangga hã Gale, we kɛ Gale hã dia dungu kɛ ma wia do a ni hã a.

²⁷ Nɛ a ga zuma dɛ sanga owinɔ, nɛ a tɔ̃ na: “Mi tia zi do ngbangga, we kɛ mi dɛ̀ zi mbula 'da Gale gɔ. Nɛ nde Gale mbɔkɔ mi, nɛ a ha etumbu hã mi gɔ.

²⁸ A fua mi kɔ fio, nɛ mi 'bana dungu nza.”

²⁹ Na mɛ ni, Gale kpasa Owele fala dɛlɛ wena, ɔ nɛ kɛ ma wia li a ni.

³⁰ Gale kpasa wa kɔ fio, nɛ a dɛ na, wa zɔ 'bɔ li wese.

³¹ Yɔbɔ, mɔ kpé nu mɔ, nɛ mɔ gɛ́ zala mɔ tɛ we mi wele gɛ.

³² Mɔ do we tɔ̃ tɔ̃a boe nde, nɛ mɔ tɔ̃, we kɛ mi kɔ̃a we zɔ na, gbãlã we a mɔ́ mɔ nde.

³³ Kɔ mɔ do we tɔ̃ tɔ̃a bina, nɛ mɔ dúngú fio, hã mɔ zele mi. Mi nɛ be hã zã hã mɔ.