YƆBƆ 32 - WE NU GALE 1995

WILA WE 'DA ELIHU

¹ Elifazɛ, Bildadɛ do Sofarɛ wa gèsè 'bɔ mbé we hã Yɔbɔ gɔ, we kɛ wa zɔa na, a lengge fai na ɛ do 'dã mɔ bina.

² Nɛ Elihu, be 'da Barakɛlɛ, wi nu kpala Buzɛ, kɔ nu fɛlɛ Ramɛ nɛa we zɔ ni, nɛ ma hã nɔ̃lɔ̃ zã hã a wena. Nɛ a bɛ̃ we nu Yɔbɔ, we kɛ Yɔbɔ lengge zi na, ɛ a wi bɔlɔ zu li Gale.

³ Nɛ zã Elihu nɔ̃lɔ̃ 'bɔ dɛ tɛ oyali ngba a talɛ ni, we kɛ wa fa we gese nu we hã Yɔbɔ zãa, nɛ wa gbɛ 'dã we hã Gale ni.

⁴ Fala kɛ ongba Elihu wa zi tɛ wele we do Yɔbɔ, nɛ nde a fì zi nu a tɛ nɛ gɔ, we kɛ wa zi a okpasa wi.

⁵ Kɔ a nɛa we zɔ na, ma ba we nu wa do'do ni, nɛ zã a nɔ̃lɔ̃ wena.

Elihu tɔ̃a gulu kɛ a kɔ̃a we wele we ni

⁶ Nɛ Elihu na: Mi a be zagbãlã, nɛ nɛ a okpasa nɛ. Gulu nɛ a mi dɛa kili be linggamɛ 'da mi dati ni.

⁷ Nɛ mi tɔ̃ zi na, we gɛ ma wia do okpasa wi, e kɔ wa a wa tɔ̃!

⁸ Nɛ nde wi hã hã zã hã wele, wi a Hi Wi 'da Gale kɛ a do nganda vɛ̃ ni.

⁹ Takɔ wele kpa hã zã, nɛ a ĩ ti mɔ kɛ ma a bɔlɔ ni, ma zɔ̃ dɔa sabɛlɛ, tabi mbu zu wi gɔ.

¹⁰ Ma kɛ mi aka nɛ na, nɛ zélé mi, hã mi tɔ̃ tɛ mɛ 'bɔ linggamɔ zu mi hã nɛ.

¹¹ Fala kɛ nɛ sɔ tɛ wele we ni, nɛ mi gɛa zala mi tɛ nɛ, nɛ mi yamba we zele we kɛ nɛ kɔ̃a we tɔ̃ nɛ ni.

¹² Mi zila vɛ̃, nɛ mi zɔa na, nɛ kɔ'dɔ Yɔbɔ tɛ wenɔ a wila ni gɔ.

¹³ Nɛ tɛ tɔ̃̀ na, lo kpa hã zã ia, we gɛ ma wè do lo gɔ, nɛ nde Gale zu ɛ kpo a gese sɛ nu nɛ hã a ni gɔ.

¹⁴ Yɔbɔ wèlè we hã mi gɔ, a wila we hã nɛ. Ɔ sɔ do mi, nɛ nde mi gésé sɔ we hã a ɔ nɛ kɛ nɛ gisa ni gɔ.

¹⁵ Wila we 'da Yɔbɔ vĩ zu nɛ, nɛ nɛ wè tɛ 'bã nu nɛ ngɔ we hã a gɔ.

¹⁶ Mi zɔa na, nɛ ka mɔ dɛ tɛ̃ a iko, nɛ nɛ do ngawi we gese nu nɛ hã a bina ni,

¹⁷ ma kɛ mi kɔ̃a we wele we. Mi kɔ̃a we tɔ̃ tɛ mɛ 'bɔ linggamɛ 'da mi.

¹⁸ Kɔ zã mi dunu do wila we, nɛ sila mi tombo mi na, mi tɔ̃ ma dɛ nza.

¹⁹ Ma anga zã mi nɛ́ mbé dɔ̃, kɛ wa a kɔ mbé daka ndala, nɛ ma hana, nɛ ma ɛ̃ daka ni.

²⁰ Kɔ nɛ e mi, hã mi wele we, hã sila mi gɛ̃. Mi nɛ 'bã nu mi, hã mi gese we hã nɛ.

²¹ Mi sí sɛ 'do wele gɔ, nɛ mi tɔ̃́ sɛ 'bɔ ɛ̃fɛ̃ lɛnggɛ hã wele gɔ.

²² We kɛ mi ĩ̀ ti tɛmbɛlɛ wele gɔ. Mi dɛ sɔ ní, nɛ Gale wele kɛ a dɛa mi ni, a gbɛ sɔ mi do ti.