YƆBƆ 31 - WE NU GALE 1995

Yɔbɔ na ɛ dɛ 'dã mɔ gɔ

¹ Mi 'bili zi do kɔ sila mi nganda wena na, mi tɛ bà wɔ tɛ be zɔnga dɛ kɔ sila mi gɔ.

² Wele dɛ mɔ na mɛ ni ia, nɛ mɔ kɛ a wia we gbini zã a nɛ na, a kpa sɛ kɔ̃ Gale kɛ a do nganda vɛ̃ tɛ li nza i ni a ge nde?

³ Gale hã etumbu hã o'dã winɔ, nɛ wa kpa ngamɔ wena.

⁴ Gale zɔ yali 'da mi zɔa, nɛ a ĩ ti olo nyanga mi vɛ̃.

⁵ Mi 'bili bɛlɛ, tabi mi zũ mɔ mɔ wele nde?

⁶ E kɔ Gale 'bili we hã mi do bɔlɔ nɛ, nɛ a zɔ sɛ na, mi a wi bɔlɔ zu ngboo.

⁷ Mi ɛlɛ tɛ mi ngɔ wala 'da Gale, tabi mi ba wɔ tɛ mɔ kɛ mi zɔa, tabi mi dɛ 'dã mɔ nde,

⁸ nɛ e kɔ gele wele dungu sɛ ngɔ kpalɛnɔ 'da mi, tabi Owele wa 'danga sɛ mɔ li fɔ 'da mi vɛ̃.

⁹ Fala kɛ mi ba wɔ tɛ wuko mɔ́ wili, hã mi fa nganda na mi kpa a nde,

¹⁰ nɛ e kɔ wuke 'da mi to tula hã gele wili, nɛ ogele wi wilinɔ wa yɛnggɛ do a.

¹¹ We kɛ ki ni sɔ a gã 'dã mɔ, nɛ wi 'bili we a hã sɔ etumbu hã mi.

¹² Nɛ 'dã mɛ 'da mi ma ɔ sɔ nɛ nyɛa we, nɛ ma bɛlɛ sɔ mi do kpalɛnɔ 'da mi, nɛ lɛ liti vɛ̃.

¹³ Fala kɛ mi dɛ̀ bɔlɔ zu dɛa mɔ do wi toe 'da mi, wi wili nɛ tabi wuko nɛ gɔ,

¹⁴ kɔ Gale tɛ we zɔ mɛnɔ 'da a, kɔ a aka mi, nɛ mi gese sɛ hã a na ge nde?

¹⁵ We kɛ kpo Gale kɛ a dɛa mi ni a dɛa 'bɔ wa. Wi ia zi kuli lɛ do wa kɔ zã onaa lɛ, wi a a gɔ nde?

¹⁶ Mi bɛ̃a mbe we nu wi 'bako, nɛ mi la wi fio wili dɛ kɔ ngamɔ nde?

¹⁷ Mi nyɔngɔ mbe mɔ zu mi kpo, nɛ mi la obe gulanɔ do wɔ nde?

¹⁸ Yolo do ngɔ zagbãlã tɛ mi, mi ɔ nɛ baa wa ni, nɛ wa gã dɛ ti kɔ̃ mi, nɛ wi tɔ̃ zi mbula hã wi fio wili fai, wi a mi.

¹⁹ Mi zɔ zi wi sã, nɛ mi hã tulu hã a, nɛ a gu ngɔ a tɛ gɛ̃,

²⁰ nɛ mi hã 'bɔ gã tulu 'da mi, kɛ wa dɛa ma do sala batanɔ ni hã a, nɛ a hã iɔ̃nae hã mi.

²¹ Fala kɛ mi hã ngamɔ hã be gula, we kɛ mi lengge na owi 'bili wenɔ wa si sɛ 'do mi nde,

²² nɛ e kɔ 'baka mi kpɔ̃lɔ̃ nɛ ma te, tabi ma 'bili dɛ li gbili nɛ ngboo!

²³ Mi dɛ̃ 'dã mɔ gɔ, mi dɛ kili etumbu 'da Gale na, mi dɛ 'dã mɔ, nɛ nde mi yóló sɛ dati a gɔ.

²⁴ Fala kɛ mi gbíní zã mi do mɔ mbali 'da mi,

²⁵ hã mi dɛ yangga kpamɛnɔ 'da mi,

²⁶ tabi fala kɛ mi zɔ wese tabi zɛkɛ tɛ to nɛ,

²⁷ nɛ sila mi ɔlɔ mi na, mi ba ma nɛ́ galenɔ 'da mi we dɔnggɔ ma nde,

²⁸ nɛ Owi 'bili wenɔ wa hã sɔ etumbu hã mi, we kɛ ki ni nɛ nde mi kafa sɔ Gale tɛ li nza i.

²⁹ Fala kɛ mi zɔ owi sɛnɛ mi kɔ ngamɔ, nɛ mi dɛ yangga dɛa nde?

³⁰ Mi sambala mbe na, Gale fɔmbɔ wa, nɛ a gbɛ wa nde?

³¹ Sanga ogɛnɛnɔ wa hɔ 'da mi fai ni, wele kpo tɔ̃a mbe na, ɛ nyɔ̀ngɔ̀ mulu sa'de, nɛ ma hɛ̃ zã ɛ gɔ nde?

³² Nɛ wi la wala kɛ a tɔ̃ sɛ na, ɛ ɔa dɛ 'do nu tɔa 'da mi, nɛ mi fĩ̀ nu tɔa hã ɛ gɔ ni a wio nde?

³³ Mi dɛa mbe 'dã mɔ, nɛ mi kafa ma, nɛ mi usu zu nɛ ɔ nɛ kɛ 'da mbe winɔ ni nde?

³⁴ Mi dɛa mbe kili winɔ na, mi dungu dɛ kɔ tɔa, da dɛ kɔ wa hé mɔ zu mi gɔ nde?

³⁵ Ee! Mi kɔ̃a na Gale zele mi, mi wila tala we 'da mi ia, kɔ Gale kɛ a do nganda vɛ̃, a wia we gese nu nɛ hã mi. Nɛ wenɔ kɛ Owi sɛnɛ mi wa da do mi ni,

³⁶ sape nɛ ma bá sɛ li mi gɔ. Mi ba sɛ mbɛti kɛ wa kɔma we da do mi ni, nɛ mi gu zu mi nɛ́ ndasa ni.

³⁷ Mi tɔ̃ sɛ gulu mɛnɔ mi dɛa ni vɛ̃ hã Gale, nɛ mi yolo sɛ dati a do kpã sila ɔ nɛ gã wi ni.

^38-39 Fala kɛ mi zu zi mbe kpalɛ mɔ wele, nɛ mi nyɔngɔ kpalɛ li fɔnɔ 'da a yala iko, nɛ nde mi sì olo nɛ hã wele nɛ gɔ nde,

⁴⁰ nɛ e kɔ o'dã kpalɛ do tɛ̃, ma hɔ kɔ fɔɛ 'da mi, olo li odia kpalɛ ɔrzɛ do ble. Kɛ gɛ a ndɔti wila we 'da Yɔbɔ.