YƆBƆ 30 - WE NU GALE 1995

Yɔbɔ na kpasi 'dɛ ɛ ngangga gɛ ma 'danga do'do

¹ Nɛ nde di ngangga ni, obenɔ kɛ sabɛlɛ 'da mi la wa ni, wa tɛ mɔmɔ mi. Baa wa zi a Owele yala iko, nɛ nde mi kɔ̃̀ zi we a wa fala nɛ kpo do otolonɔ 'da mi, kɛ wa ngɛmɛ li onadalamɛnɔ 'da mi ni gɔ.

² Mi zi do mɔ we kpa kɔ̃ wa bina, we kɛ wa do ngawi bina.

³ Wa ɔkɔ tɛ wɛ do'do, nɛ wa fa zi nyɔngɔmɔ tɛ li gba zɔ̃, tɛ fala kɛ wele wa hɔ se'de gɔ ni.

⁴ Wa fa zi ofã nwá tenɔ zamɔ i, nɛ wa nyɔngɔ oliã nɛ.

⁵ Wi kɔ lenɔ wa zɔ zi wa, nɛ wa zɛ nu wa kpu kpu kpu, nɛ wa ndaka wa ɔ nɛ owi zũ ni.

⁶ Oyɔndɔ winɔ ni wa ɔ zi kɔ gbangɔlɔ̃, tabi ti nù, tabi kɔ kpangba ta.

⁷ Wa sɔ̃ɛ zi ngba wa dɛ zã wɔkɔsɔ, nɛ wa he mɔ nɛ́ osa'de zamɔ ni.

⁸ Wa ɔ zi nɛ Owi bɔ, kɛ wele ĩ̀ ti wa gɔ ni. Nɛ winɔ wa ndaka wa do gã dɔ te kɔ̃ wa.

⁹ Di dɔ̃ ni, obenɔ 'da wa wa fi zuma do zu li mi, nɛ mi hɔa wi gbɔlɔ mɔmu gbali wa.

¹⁰ Wa bɛ̃a gɛnɛ mi, nɛ wa yu mi ndũu. Wa nɛ tufu sa nu wa sanga li mi, nɛ nde wa dá'bá gɔ.

¹¹ Yolo do ngba soe kɛ Gale dɛa na mi mbɔkɔ, nɛ dɔ̃lɔ̃ li 'da mi e ni, wa zɛlɛ tɛ mi nɛ́ kɛ zã wa kɔ̃a ni.

¹² Ogili Owele wa kulu ngɔ we fi mi li ngbangga, wa ndɔa bili na ma ba nyanga mi, nɛ wa fi dolo dɛ tɛ mi we bi mi.

¹³ Wa kila wala ti mi vɛ̃ na, da dɛ kɔ mi yú gɔ. Nɛ wele do wele fa we dɛ mi 'danga, nɛ nde fo wi 'bɔ 'da ngbɛ ɛ bina.

¹⁴ Wa fi usu wala, we tɛ dɛ 'da mi, takɔ wa zɛlɛ do tɛ mi.

¹⁵ Mi kpa ngamɔ kpi do kpi, nɛ ma fua dɔ̃lɔ̃ li 'da mi do'do. Nɛ dia dungu 'da mi pɛsɛ ɔ nɛ gba kutu ni.

¹⁶ Mi di dɔ̃ ni kɔ 'bako, nɛ ma gulu zu mi fɛɔɔ.

¹⁷ Do tũi, nɛ tɛ mi zɛlɛ do kɔ gbãlã ĩ vɛ̃, nɛ zɛlɛ nɛ kpé mbe tɛ̃ ɛ gɔ, nɛ ma kala yala li mi.

¹⁸ Gale fua tulu tɛ mi, a sanga gɛlɛ mi dɛ ti kɔ̃ a.

¹⁹ Nɛ a da mi zã 'bɛ̃tɛ̃, nɛ tɛ mi kpa do 'bɛ̃tɛ̃ vɛ̃.

²⁰ Aa Gale 'da mi, mi sa mɔ hã mɔ, nɛ nde mɔ kɔ̃́ nu mi gɔ. Mi yula dɛ dati mɔ, nɛ nde mɔ zɔ́ mi gɔ.

²¹ Sila mɔ 'danga dɛ tɛ mi, nɛ mɔ zɛa mi nganda wena.

²² Mɔ dɛa na gba bũ kamba ba mi, nɛ ma yaka mi gbirr, nɛ ma da mi si falanɔ vɛ̃.

²³ Mi ĩ na, mɔ kɔ̃a we kã mi dɛ kɔ le 'da fionɔ. I mɔ, mɛ a fala kɛ ma 'bɔ 'da winɔ vɛ̃.

²⁴ 'Da fala kɛ wele kɔ ngamɔ, nɛ ma wia na, a ala nu a, nɛ a ɛ́fɛ́ kɔ a hã ongba a na wa gala a gɔ nde?

²⁵ Mi he zi kɔ̃a wi 'bakonɔ, nɛ 'bako ngamɛ 'da wa ba zi li mi wena fai.

²⁶ Mi lengge zi na, mi kpa sɛ dia dungu, nɛ nde mi kpa 'bako.

²⁷ Yolo do ngba soe kɛ mi lia kɔ 'bakoe gɛ, sila mi 'bɔ dɛ dati 'bɔa fai iko.

²⁸ Mi yɛnggɛ kɔ gba tũ, nɛ mi zɔ́ li wese gɔ. Mi hɔ sanga Owele, nɛ mi sa mɔ na wa gala mi.

²⁹ Mi he mɔ nɛ́ ogbokologboe tɛ li gba zɔ̃ ni.

³⁰ Wa zɔ ndala tɛ mi, nɛ nde ma tũ vɛ̃, nɛ ma 'bɛ 'bɛ̃lã, nɛ tɛ mi ba we kpangbangba.

³¹ Kundu 'da mi zɛ tati a zuma 'bako, nɛ gaga 'da mi dama zuma kɔ̃a fio.