YƆBƆ 3 - WE NU GALE 1995

YƆBƆ TƆ̃A LƐNGGƐ DO OYALI NGBA A TALƐ Yɔbɔ ala nu ɛ hã Gale

^1-2 Dɛ 'do nɛ, nɛ Yɔbɔ ma ngɔ wele we, nɛ a kana nu a tɛ kɔ̃ tũ kula 'da a na mɛ gɛ:

³ Aa Gale, mɔ gbɛ́ kɔ̃ tũi kɛ wa kua zi do mi ni! Nɛ mɔ gbɛ́ 'bɔ kɔ̃ tũi kɛ naa mi ba zi do zã mi ni.

⁴ Aa Gale, mɔ dɛ́ na, kɔ̃ tũi ni ma kifi gba tũ. Da dɛ kɔ ta zu mɔ gbá 'bɔ ngɔ nɛ gɔ, nɛ wese tɛ tò 'bɔ dɛ ngɔ nɛ gɔ!

⁵ Mɔ dɛ́ na gba tũi kɔ le 'da fionɔ ma kele ngɔ kɔ̃ tũi ni. Mɔ kélé ma do gba kutu, tabi mɔ bísí wese ngɔ ma do'do!

⁶ Mɔ gbɛ́ kɔ̃ tũi ni zã sabɛlɛnɔ do'do, nɛ da dɛ kɔ wa tɔlɔ 'bɔ ma sanga kɔ̃ tũ zɛkɛnɔ gɔ!

⁷ Mɔ dɛ́ na, wa tɛ kò 'bɔ wele do kɔ̃ tũi ni gɔ, nɛ hiamɔ yangga tɛ dɔ̃̀lɔ̃̀ 'bɔ gɔ.

⁸ Mɔ sá mɔ hã owi tunumɛnɔ kɛ wa ĩ ti tɛlɛ tɛ kɛ, wa wia tɛ tunu do gba sɔ̃ sa'de 'dɔ lì ni, kɔ wa kana nu wa tɛ kɔ̃ tũi ni.

⁹ Mɔ dɛ́ na, do kɔ̃ tũi ni, nɛ osɔla titolenɔ wa bisi do'do, nɛ tũi ma tũ tɛ mɛ tũ fai, nɛ wese tɛ gbà gɔ.

¹⁰ Mba gɔ, tũi ni ma bɛ zi zu kula 'da mi gɔ, ma kɛ mi zɔ ngamɛ gɛ.

¹¹ Ma dia sɔ fɛ̃ na, mi fe dɛ kɔ zã naa mi i, tabi 'da fala kɛ a kua mi ni, nɛ hi mi la sɔ do ti.

¹² Gulu kɛ naa mi ba zi mi dɛ ngɔ ku a we ge nde? Nɛ gulu kɛ a dala zi mi do li bele a we ge nde?

¹³ Fala kɛ mi fe zi, nɛ sɔɛ gɛ, mi sɔ do gɛ̃a dungu

¹⁴ fala nɛ kpo do Onwanɔ do ogã winɔ, kɛ wa zĩ zi ã tɔa nwanɔ 'da wa dɛ olo nɛ ni.

¹⁵ Tabi mi sɔ fala nɛ kpo do obenɔ 'da nwanɔ, kɛ tɔanɔ 'da wa ma dunu zi do mɔ mbali, do fɛ̃a mɔ bolo ni.

¹⁶ Tabi wa mi sɔ mi, ɔ nɛ wɔlɔ be kɛ naa a kpɔ̃lɔ̃ a, nɛ a zɔ̀ nza gɔ ni.

¹⁷ Tɛ kɔ zununɔ i, o'dã winɔ wa la fala mbananɔ 'da wa, nɛ owinɔ kɛ wa mbɔka ni, wa tɛ ɔmɔ tɛ wa.

¹⁸ Owi bɔlɔkɔnɔ wa kpa tɛ mɛ 'bɔ gɛ̃a dungu, nɛ wa zélé 'bɔ giti gɛlɛ Owi zɔ mɔ tɛ wa gɔ.

¹⁹ Ngbá hɔa nza ti kɔ̃ wele a. Nɛ gɔnɔ sanga be wi do gã wi 'bɔ bina.

²⁰ Aa Gale, gulu kɛ mɔ dɛ na, owi 'bakonɔ wa zɔ nza ni we ge nde? Gulu kɛ mɔ dɛ na, wa ko mbe winɔ we kpa ngamɔ ni we ge nde?

²¹ Wa 'bɔ 'da fio, nɛ nde ma tɛ́ gɔ. Nɛ fe fio dia tɛ wa nɛa ngɔ fa kpamɔ.

²² Wa kɔ̃a na lo fe hã wa mi lo do'do, sɛ nɛ sila lo gɛ̃ de.

²³ Nɛ nde mi ɔ nɛ wi kɛ a ĩ̀ ti mɛ kɛ a wia we dɛ ma gɔ, nɛ mɔ Gale, mɔ kpia 'bɔ wala ti a vɛ̃ ni.

²⁴ Gɛnɛ kɔ 'da fala nyɔngɔ mɔ, nɛ mi te ngɔ kɔ̃a iko. Nɛ mi wè we ɔmɔ tɛ mi fala kpo gɔ.

²⁵ Fala kɛ mi dɛ kili mɔ kpo, nɛ mɛ ni ma dɛ tɛ̃ ɛ. Nɛ mɛnɔ vɛ̃ kɛ mi dɛa zi kili ma ni, ma kɛ ma dɛ mi gɛ.

²⁶ Fo 'bɔ mbé dungu fio, do ɔmɔ tɛ wi we duzu mi bina, tati a ngamɔ do ngamɔ iko.