YƆBƆ 29 - WE NU GALE 1995

Yɔbɔ lingga kpasi 'da a zi dati ni

¹ Yɔbɔ hɔlɔ nu ɛ, nɛ a ala 'bɔ nu a na:

² Mi lengge ngba soe zi dati, kɛ Gale zɔ zi mɔ tɛ mi ni.

³ Mi lengge 'da fala a dɛa zi na, nyɛa we ma yele dɛ ngɔ mi, nɛ nyɛa we ni dɛ na, mi zɔ mɔ ti nyanga mi kɔ gba tũ ni.

⁴ 'Da fala ni, mi zi do nyɔngɔmɔ wena, nɛ Gale wila zi 'bɔ nu a tɛ tɔa 'da mi.

⁵ Gale kɛ a do nganda vɛ̃ zi do mi boe, nɛ obulu benɔ 'da mi wa zi dɛ kɛ zã mi.

⁶ Do 'da fala ni, dia nyɔngɔmɔ linggi zi mi takpa, nɛ nɔ fo zi ti sɔngga 'da mi ngbɛ'bɛ'bɛ.

⁷ Ngba soe kɛ mi le zi kɔ mba li ngba wi 'da okumunɔ, we 'bili we 'da owinɔ li fanda i,

⁸ hã obe zagbãlãnɔ wa zɔ mi ia, nɛ wa ngbɔ dɛ 'do, nɛ kpasa winɔ wa kulu ngɔ dati mi.

⁹ Nɛ ogã winɔ wa da nu wa tɛ wele we, nɛ wa e kɔ̃ wa nu wa na, winɔ vɛ̃ wa kpe nu wa.

¹⁰ Nɛ ogã winɔ wa wélé zi 'bɔ we gɔ, nɛ lɛfɛ wa nãlã dɛ kɔ langgala gɛlɛ wa.

¹¹ Owinɔ wa zele zi wenɔ mi tɔ̃ ni, do owanɔ wa zɔ zi mi do li wa ni, wa dɔnggɔ zi mi dɔngga.

¹² Mi gala zi wi 'bako kɛ a ala nu a hã mi, do be gula kɛ fo wi gala a bina ni.

¹³ Nɛ winɔ wa kɔlɔ do fio ni, wa wila zi nu wa tɛ mi. Mi gala owi fio wili, nɛ wa kpa yangga.

¹⁴ Mi dɛ fai a mɔ kɛ ma a bɔlɔ ni.

¹⁵ Mi gala wi lɔa li ɔ nɛ gbali a ni, nɛ mi ɔ nɛ nyanga wi mbi ku ni.

¹⁶ Mi ɔ nɛ baa Owi 'bakonɔ ni, nɛ mi hã tɛ mi vɛ̃ we gala ogele winɔ.

¹⁷ Nɛ nde mi 'danga ngawi 'da o'dã winɔ, nɛ mi kpasa owinɔ wa kpa zɛlɛ tɛ ti kɔ̃ wa ni.

¹⁸ Mi lengge zi na, mi ɔ sɛ gbaa, nɛ sabɛlɛ tɛ mi dɛlɛ nɛ́ gbãlã kɛnzɛ ni, nɛ mi fe sɛ fio tɔa.

¹⁹ Mi ɔ zi nɛ te kɛ liã nɛ lia gbaa 'dɔ lì, nɛ mbɔɛ ala dɛ tɛ gbakɔ̃ nɛ ni.

²⁰ Mi kpa zi dɔ̃lɔ̃ li kpa fai, nɛ ngawi 'da mi ma mbɔkɔ gɔ.

²¹ Do ngba soe ni, mi wele zi we, nɛ winɔ wa zele gbaa ndɔti nɛ. Wa dungu fio, nɛ wa gɛ zala wa we zele mbula 'da mi.

²² 'Da fala mi da nu mi tɛ wila we, nɛ nde fo mbé wi wele we bina, we kɛ wila we 'da mi lia wa vɛ̃ ia.

²³ Owinɔ wa 'bɔ zi 'da mi, nɛ́ kɛ wa 'bɔ 'da tɛa kolo ni.

²⁴ 'Da fala kɛ mi mɔmɔ dɛ 'da owi 'bakonɔ, nɛ ma nganda sila wa, nɛ ma hã yangga hã wa.

²⁵ Mi zi a wi kpe dati wa, we be li wala hã wa. Mi ɔ zi sanga wa nɛ nwa ngɔ soda ni, nɛ mi a mi ngo zi sila wa.