YƆBƆ 28 - WE NU GALE 1995

Lɛnggɛ ngɔ hã zã

¹ Lɛ ĩ ti nu kɔ̃ sɛ̃a, fala kɛ wa zã do fɛ̃a mɔ bolo ni. Nɛ lɛ ĩ 'bɔ ti falanɔ kɛ wa yaka do fũ ta we kpa mɔ mbali kɔ nɛ ni.

² Ĩ na, tũ mɔ bolo ma yolo ti nù, nɛ fila mɔ bolo yolo kɔ kpangba ta. Wa o kpangba ta, hã wa a li we, nɛ fila mɔ bolo hɔ kɔ nɛ.

³ Owi zã sɛ̃a wa zã 'du kɔ̃, nɛ wa ba mwinda dɛ kɔ̃ wa, nɛ wa le gbaa kɔ gba tũ ti nù i we zã otũ kpangba tanɔ dɛ nza.

⁴ Wa gba owala ti nu i, nyɛlɛ do fala ɔinɔ 'da winɔ, nɛ gele wele wè tɛ la wala ni gɔ. Wa kpo nga gbãlã fɛlɛ 'da tili wa, nɛ wa zumu do wa dɛ kɔ kɔ̃ i. Nɛ wa dɛ tonɔ 'da wa, nɛ nde nyanga wa gbó nù gɔ.

⁵ Nyɔngɔmɔ hɔ ngɔ nùi, nɛ nde ti nù i, mɛnɔ vɛ̃ ɔ nɛ kɛ we bɛlɛ ma bɛla ni.

⁶ Wa kpa ta safirɛ kɔ kpangba tanɔ, nɛ wa kpa fũ mɔ mbali kɔ nɛ.

⁷ Ta zu ziki ngɔ walanɔ ti nù gɛ bina, nɛ gbali ngo'be zɔ̃ mbe ma fala kpo gɔ.

⁸ Osa'de zamɔ wa si mbe walanɔ ni gɔ, nɛ gbɔgbɔ hɔ̀ mbe 'bɔ i mɔ fala kpo gɔ.

⁹ Nɛ nde wele yamba we 'donggo kɔ ta ni, nɛ a sala kɔ kɔ̃ɛ ti nyanga kalanɔ ni gbaa ndɔti nɛ i.

¹⁰ Wa gba wala kɔ tanɔ, nɛ wa zɔ ota olo gã golenɔ i mɔ ni do gbali wa.

¹¹ Wa nɛ gbaa, nɛ wa kpe zu lìnɔ ti nù mɔ ni vɛ̃, nɛ wa kala kpamɛnɔ ma usu tɛ̃ ɛ i mɔ ni dɛ nza.

¹² Nɛ nde Owele wa fa hã zã do nde? Nɛ wa kpa ĩ ti mɔ do nde?

¹³ Owele wa ĩ̀ ti gole hã zã gɔ, nɛ wa wè tɛ kpa ma sanga wa gɔ.

¹⁴ Gba lì tɔ̃ na, hã zã dɛ bina. Nɛ fua lì tɛ mɛ 'bɔ na, ma 'da ɛ gɛ bina.

¹⁵ Wa wè tɛ oso hã zã do mɔ mbali tabi do fɛ̃a mɔ bolo gɔ.

^16-19 Hã zã dia nɛa ngɔ mɔ mbali kɔ le Ofirɛ, ma dia nɛa ngɔ dia ta olo gã gole. Ma dia nɛa ngɔ talatala, tabi bila mɔ mbali. Hã zã dia nɛa ngɔ iyaka, nɛ ma nɛa 'bɔ ngɔ ta topazɛ kɛ ma yula ngɔ nù Etiopi ni. Nɛ mbé dia mɔ we nɛ ngɔ ma bina.

²⁰ Nɛ nde hã zã yolo ni do nde? Nɛ fala wa kpa do ĩ ti mɔ ni a do nde?

²¹ Gulu hã zã ma usu tɛ̃ ɛ li Owele, nɛ ma usu 'bɔ tɛ̃ ɛ li nɔɛnɔ li nza i.

²² Fio do le 'da fionɔ wa tɔ̃a na, “Gbãlã we, lɛ zila we 'da hã zã zila iko.”

²³ Nɛ nde wi ĩ ti fala hã zã yolo nɛ ni, wi a Gale, nɛ a zu a kpo a ĩ ti gulu nɛ.

²⁴ We kɛ gbali a soko mɛnɔ ngɔ nù gɛ vɛ̃, nɛ a zɔ mɛnɔ ti wese gɛ vɛ̃.

²⁵ 'Da fala Gale dɛa bũ ni, nɛ a ĩ ti ngawi 'da ma, nɛ a ĩ ti 'da pɛsɛ li gã lìnɔ, do 'da 'du nɛ.

²⁶ Gale ĩ ti ngba soe kɛ kole tɛ nɛ ni, nɛ a ĩ ti falanɔ kɛ ua dã kole la nɛ ni.

²⁷ Na mɛ ni, nɛ Gale zɔa hã zã, nɛ a kɔ̃ gɛnɛ nɛ, nɛ a ĩ ti gã gulu nɛ.

²⁸ Nɛ 'do ki ni, nɛ Gale tɔ̃ hã winɔ na: “Dɛ kili mi NWA, mɛ a wala kpa hã zã. Nɛ bɛ̃ gɛnɛ dɛ 'dã mɔ, mɛ a wala kpa ĩ ti mɔ.”