YƆBƆ 26 - WE NU GALE 1995

Yɔbɔ na lɛnggɛnɔ 'da Bildadɛ gálá ɛ gɔ

¹ Nɛ Yɔbɔ gese na:

² Mɔ kɔ̃a we be tɛ mɔ na, mɔ gala wi kɛ a zɔlɔ ngawi ni, nɛ mɔ hã ngawi hã a nde?

³ Mɔ tɔ̃ mbula hã wi kɛ a zɔlɔ hã zã ni, nɛ a ĩ ti mɔ nde?

⁴ Kɔ mɔ wele we nu mɔ gɛ hã wio nde? Nɛ wi ia wila we gɛ nu mɔ a wio nde?

Gale a wele mɛnɔ nyanga nza gɛ vɛ

⁵ Le 'da fionɔ gbaa tɛ ti go'do gba lì i, nɛ fionɔ wa ɔ i mɔ kɔ gba tũ, nɛ wa tana kili dati Gale.

⁶ We kɛ le 'da fionɔ ma ùsù tɛ̃ ɛ gbali a gɔ.

⁷ Wi tata li nza si gbãlã ngɔ, nɛ ma kele nyanga nza, nɛ nde fo mɔ 'be tɛ nɛ bina ni, wi a Gale. Nɛ a dɛ na, nùi ma yolo dɛ sanga bũi.

⁸ A ngɛmɛ li lì dɛ kɔ gba kutunɔ, nɛ a dɛ 'bɔ na, ma tɛ zù'dù dɛ nù nga gɔ.

⁹ Fala kɛ zɛkɛ fi mbata, nɛ a kele ma do gba kutu.

¹⁰ Nɛ a ia ngbala ngɔ gba lì, nɛ ma gɔnɔ sanga li nza do nù.

¹¹ Fala kɛ Gale o dã, nɛ li nza yaka, nɛ obɛlɛduma nɛ ma tana.

¹² A nɛa ngɔ gba lì do ngawi 'da a, nɛ a gbɛ gba sɔ sa'de do hã zã 'da a.

¹³ A ufu bũ nu a, nɛ li nza sa. A ba gba sɔ̃ gɔ̃, nɛ sanga a gbo, nɛ ma sala.

¹⁴ Mɛnɔ lɛ zɔ gɛ, mɛ a kuti mɔ, Gale ndua ma ndua iko. Ngba soe kɛ a be ngawi 'da a vɛ̃, nɛ nde kɔ̃ wele kpá sɛ tɛ nɛ gɔ.