YƆBƆ 24 - WE NU GALE 1995

Yɔbɔ na Gale la o'dã winɔ, nɛ wa dɛ mɛnɔ zã wa kɔ̃a ni

¹ Gale kɛ a do nganda vɛ̃, a wè kɔ tũi kɛ a nɛ 'bili do we 'da o'dã winɔ ni gɔ, gulu nɛ we ge nde? A dɛ sɔ na mɛ ni, nɛ owinɔ 'da a wa zɔ sɔ a tɛ 'bili we ngɔ wa do dia nɛ.

² O'dã winɔ wa tili li ngbala fɔɛ 'da wa dɛ dati, nɛ ombe wa zũ batanɔ 'da ogele winɔ, nɛ wa mba li nɛ do kɛ 'da wa.

³ Ombe winɔ wa kala pundanɔ 'da obe gulanɔ kɔ̃ wa, nɛ wa kala 'bɔ ngɔmbɔnɔ 'da Owi fio wilinɔ do tikɔɛ.

⁴ Wa ndaka Owi sãnɔ ngɔ mɛnɔ 'da wa, nɛ wa yu, nɛ wa usu tɛ wa gele fala.

⁵ Nɛ wa yɛnggɛ do ngɔ fɔ zamɔ i, nɛ wa fa nyɔngɔmɔ hã benɔ 'da wa ɔ nɛ opunda li gba zɔ̃ ni.

⁶ Owi sãnɔ ni wa kala olo kpalɛ kɔ fɔ 'da winɔ, nɛ wa 'bi tala wala vinɔ kɔ fɔ 'da o'dã winɔ.

⁷ Wa do mɔ we gu tɛ wa do tũ bina, nɛ fo gba tulu gu ngɔ wa tɛ gɛ̃ɛ bina.

⁸ Wa ɔ ngɔ kalanɔ, nɛ gba kolo ma wa, nɛ wa onggo kɔ kpangba ta.

⁹ Nɛ o'dã winɔ wa ba be kɛ baa a fia ni nu bele naa a do'do, nɛ wa kala ogã tulu 'da owi sãnɔ kɔ̃ wa do tikɔɛ.

¹⁰ Nɛ winɔ ni wa zɔlɔ tulu we he'de ma, wa ba wɔ dɛ zã wa, nɛ wa yɔnggɔ do kpalɛnɔ 'da ogele winɔ dɛ nza.

¹¹ Wa kpĩlĩ wala te olivɛ hã ogele winɔ, nɛ wa gi dɔ̃, nɛ nde wa yámbá zu nɛ gɔ.

¹² Owi kɔ lenɔ wa kɔlɔ do fio, nɛ wa he mɔ, nɛ owi kpa gã daninɔ, wa ala nu wa, nɛ nde Gale lénggé do 'bakoe 'da wa gɔ.

¹³ O'dã winɔ wa kɔ̃̀ gɛnɛ gba wese gɔ, wa kɔ̃a yɛnggɛ kɔ gba tũ.

¹⁴ Do tũi, nɛ 'dã wi nɛ we zũ mɔ, nɛ do sanga zɛ, nɛ a kulu ngɔ, nɛ a nɛ we gbɛ wi sã.

¹⁵ Wi kɛ a kɔ̃a we ɔ do kɛnɛ ngba a ni, a wɛ zu gba tũ, nɛ a gu tulu zu a, nɛ a lengge na wele zɔ́ sɛ ɛ go,

¹⁶ Wi zũ gbini nu tɔa do tũ, nɛ do gba wese, nɛ a dɛ kili, nɛ a usu tɛ̃ a.

¹⁷ O'dã winɔ wa dɛ kili sa fala, nɛ nde wa yú kili gba tũ gɔ.

¹⁸ Nɛ nde nɛ, nɛ tɔ̃ na: “Ngamɔ hɔa hã o'dã winɔ do gbanga nɛ, nɛ ma gbɛa wa. Gale fɔmba nùi 'da wa, nɛ wa nɛ́ 'bɔ we dɛ to kɔ fɔ vinɔ 'da wa gɔ.

¹⁹ O'dã winɔ wa la dɛ kɔ le 'da ofionɔ ɔ nɛ kɛ wese to nganda, nɛ gba kutu pɛsɛ, nɛ ma la ni.

²⁰ Ta zu naa wa ele ngɔ wa, nɛ ogbɛzɛ wa nyɔngɔ wɔlɔ wa. Nɛ owinɔ wa to 'bɔ mbé we mɔ́ wa gɔ. Wa ɔ nɛ te kɛ kolo ba ma, nɛ ma kolo gbangga ni.

²¹ O'dã winɔ wa hã ngamɔ hã wuko ndɔlɔ, nɛ wa ĩ́ 'bako hã wuko fio wili gɔ.

²² Gale do ngawi we ndaka o'dã winɔ, kɛ wa nganda wena ni. A kulu ngɔ, nɛ nde 'dã wi yóló ti a gɔ.

²³ O'dã winɔ wa lengge na mɔ dɛ́ sɛ lo gɔ, nɛ nde Gale a soko dɛa mɔ tɛ wa ni.

²⁴ Wa kpa mɔ, nɛ nde ma ɔ́ kɔ̃ wa gbaa gɔ. Wa kolo ɔ nɛ fulɛlɛ, kɛ wa 'bili ma 'bili ni.

²⁵ Wenɔ mi tɔ̃a ni, mɛ a gbãlã we, fo sɛ wi ba kafi nɛ nu mi bina.”