YƆBƆ 23 - WE NU GALE 1995

Yɔbɔ na Gale kɔ̃̀ we wele we do ɛ gɔ

¹ Nɛ Yɔbɔ gese na:

² Ala nu 'da mi ma é gɔ, ma gã dɛ dati gã fai, nɛ fala na mi kpé nu mi dɛ ngɔ nɛ bina.

³ Aa! Mi ĩ sɔ ti fala Gale se'de ni, nɛ mi nɛ sɔ we kpa ngba mi do a,

⁴ nɛ mi tɔ̃ gulu we 'da mi hã a, nɛ mi wele sɔ we wena.

⁵ Mi zele sɔ we a nɛ gese hã mi ni, nɛ mi ĩ 'bɔ ti we a kɔ̃a we tɔ̃ ma ni.

⁶ A hɔngɔ sɔ dɛ ngɔ mi, we tɔ̃ ngbangga do mi nde? Gɔ, a e sɔ mi na, mi tɔ̃ gulu we 'da mi.

⁷ Nɛ a zɔ sɔ na, mi a wi bɔlɔ zu, kɔ a 'bili we 'da mi, nɛ mi hɔ sɔ nza ti ngbangga 'da a.

⁸ Fala kɛ mi la we fa a si 'biti gba wese, nɛ nde a i mɔ bina. Mi nɛ si 'biti gɛ̃a wese, nɛ nde mi zɔ́ a gɔ.

⁹ A dɛ tabi to si gbãlã ngɔ i nde, mi ĩ̀ gɔ. Tabi a usu tɛ̃ a si ba gɔtɔ i nde, mi ĩ̀ gɔ.

¹⁰ Gɛnɛ kɔ ní, nɛ nde a ĩ̀ ti wala mi la do ma ni. Fala kɛ a yamba sila mi, nɛ a zɔ sɛ na mi a wi bɔlɔ zu, mi ɔ nɛ mɔ mbali kɛ 'dɔlɔ nɛ 'bànà zã nɛ gɔ ni.

¹¹ Mi bá do wala 'da a, nɛ mi là si gele fala gɔ.

¹² Mi bɛ gɛnɛ mbula 'da a gɔ, mi usu ma dɛ kɔ zã mi, nɛ mi dɛ vɛ̃ a mɛ kɛ zã a kɔ̃a ni.

¹³ Gale do linggamɔ kpo kɔ sila a ni, nɛ wele wè tɛ kpolo ma gɔ. A dɛ tati a mɛ kɛ zã a kɔ̃a ni.

¹⁴ A dɛ hã mi a linggamɛ kɛ a 'bili do kɔ sila a ni, a dɛ ma nɛ́ kɛ a dɛ do ogele linggamɛnɔ 'da a ni.

¹⁵ Gulu nɛ a mi dɛ kili dati Gale. Mi lengge do a, nɛ kili ba mi wena.

¹⁶ Gale kɛ a do nganda vɛ̃, a dɛa na kpã sila 'da mi ma e, nɛ a ia gã kili kɔ sila mi.

¹⁷ Nɛ a dɛa na, mi te kɔ gba tũ. Nɛ nde mi kpè nu mi dɛ ngɔ we 'da mi gɔ.