YƆBƆ 22 - WE NU GALE 1995

Elifazɛ na Yɔbɔ do 'dã gulu we

¹ Nɛ Elifazɛ, be Temanɛ hɔlɔ nu ɛ, nɛ a tɔ̃ hã Yɔbɔ na:

² Wele wia tɛ dɛ mɔ, nɛ ma gala Gale kɛ a do nganda vɛ̃ ni nde? Gɛnɛ kɔ wi ni ɔ do wi hã zã, nɛ nde hã zã ni we a wele nɛ zu a kpo iko.

³ Dia dɛa to tɛ mɔ ma wè tɛ gala Gale gɔ. Mɔ ɔ 'bɔ wi hã zã, nɛ nde ma dɛ́ sɛ mɔ hã a gɔ.

⁴ Mɔ lénggé na Gale dãlã dɛ tɛ mɔ, we kɛ mɔ a wi yu kili a gɛ nde?

⁵ A dɛa na mɛ ni we hã etumbu hã mɔ, we o'dã mɛnɔ mɔ dɛ ma fai gɛ.

⁶ Mɔ zɔ́ 'dã mɛnɔ kɛ mɔ dɛa ma gɛ: Mɔ aka ngba mɔ do nga nɛ na, a e mɛ 'da a do tikɔɛ hã mɔ. Nɛ mɔ ba gbãlã tulu ngɔɛ 'da a kpo ni kɔ a do'do.

⁷ Wi wɔ lì gɔ lì kɔ̃ mɔ, nɛ mɔ dɔ do a. Wi kɛ a mbɔkɔ wɔ ni, a gɔ 'bulu mapa kɔ mɔ, nɛ mɔ dɔ do a.

⁸ Mɔ dɛ gã zu, nɛ mɔ ba nùi 'da owinɔ kɔ̃ wa do nga nɛ, nɛ wele ma dɛ mɔ́ mɔ.

⁹ Mɔ sɔ́nzɔ́ do Owi fio wilinɔ gɔ, nɛ mɔ zũ mɛnɔ 'da be gulanɔ kɔ wa.

¹⁰ We duzu ma, wa ndɔa bili zĩ mɔ takpa, nɛ mɔ ndua tana kili do ti.

¹¹ Mɔ ɔ dɛ kɔ gba tũ, nɛ mɔ wè tɛ zɔ mɔ kɔ nɛ gɔ. Ngamɔ ma ba mɔ, nɛ ma bindi mɔ nɛ́ ngele lì ni.

¹² Lɛ ĩ na, Gale a gbaa li nza ngɔ i. Fala 'da a ndũu do 'do sɔlanɔ i.

¹³ Ma kɛ mɔ tɔ̃ na: Gale a gbaa 'do sɔlanɔ ngɔ i. A zɔ́ mɔ nù nga gɔ, nɛ a wè tɛ 'bili we mɔ́ wele gɔ.

¹⁴ Gba kuti kpia li nza wena, 'da fala kɛ a yɛnggɛ li nza i, nɛ nde a wè tɛ zɔ mɔ nù nga gɔ.

¹⁵ Mɔ kɔ̃a we si wala kɛ o'dã winɔ wa la do ma fai ni nde?

¹⁶ Owinɔ ni wa fe dati kɛ na, tũi 'da wa ma we ni. Wa ɔ nɛ wɔkɔsɔ kɛ gba hɛ̃a lì kala ma, nɛ ma fi ndũu ni.

¹⁷ O'dã winɔ wa tɔ̃ hã Gale na, a lá lo ni, hã lo dungu fio. A a wele kɛ a do nganda vɛ̃, nɛ nde mɔ kɛ a wia we dɛ do lo ni ma bina.

¹⁸ Ĩ na, wi a Gale a a dɛ na, nu fɛlɛ wa, wa kpa mɔ, nɛ nde wa lénggé do a gɔ.

¹⁹ Owi bɔlɔ zunɔ wa dɛ sɛ yangga we zɔ 'bakoe 'da o'dã winɔ. Nɛ wa mɔmɔ sɛ wa na:

²⁰ Nɛ zɔ́ owi sɛnɛ lɛ wa kpa ngamɔ, nɛ mɛnɔ 'da wa ma bɛlɛ vɛ̃.

²¹ Aa Yɔbɔ, mɔ 'dáfá sanga tɛ ngba mɔ do Gale, nɛ mɛnɔ vɛ̃ kɛ mɔ dɛ ma ni ma la sɛ do dia nɛ. Mɔ dɛ na mɛ ni, nɛ mɔ kpa sɛ yangga.

²² Mɔ zélé bia mɛ kɛ a be ma hã mɔ ni, nɛ mɔ usu wenɔ a tɔ̃ ni dɛ kɔ sila mɔ.

²³ Mɔ kpóló tɛ mɔ dɛ 'da Gale kɛ a do nganda vɛ̃, nɛ a gese sɛ ngawi 'da mɔ hã mɔ. Nɛ mɔ tɛ dɛ̃ 'bɔ 'dã mɔ gɔ.

²⁴ Mɔ dá mɔ mbali 'da mɔ zamɔ nyɛlɛ do mɔ.

²⁵ Nɛ Gale kɛ a do nganda vɛ̃, a dungu sɛ olo li mɔ mbali do fɛ̃a mɔ bole 'da mɔ.

²⁶ Mɔ dɛ na mɛ ni, nɛ mɔ dɛ sɛ yangga, fala nɛ kpo do Gale kɛ a do nganda vɛ̃ ni, nɛ mɔ gbini sɛ zã mɔ do a.

²⁷ Nɛ a zele sɛ sambala 'da mɔ, nɛ mɔ wia sɛ tɛ dɛ mɛ kɛ mɔ kɔ̃a ni.

²⁸ Mɔ zɔ sɛ mɔ ti nyanga mɔ de wena. Nɛ mɛ mɔ lengge we dɛ ma ni, mɔ dɛ sɛ ma do dia nɛ.

²⁹ Gale 'danga mɛnɔ kɛ owi gã zunɔ wa lengge we dɛ ma ni, nɛ a gala winɔ kɛ wa ba tɛ wa dɛ nù ni.

³⁰ Gale fo Owi bɔlɔ zu kɔ ngamɔ. Fala kɛ mɔ dɛ mɔ tɛ mɔ do dia nɛ, nɛ Gale a kpasa sɛ mɔ, nɛ nde mɔ kpá sɛ 'dã mɔ gɔ.