YƆBƆ 21 - WE NU GALE 1995

Yangga 'da o'dã winɔ ma sɔ sɔkpa

¹ Nɛ Yɔbɔ gese na:

² Nɛ gɛ́ zala nɛ ngboo, hã nɛ zele we mi nɛ tɔ̃ ma ni. Nɛ dɛ na mɛ ni, nɛ nɛ hã sɛ kpã sila hã mi.

³ Nɛ dúngú fio, hã nɛ zele mi, kɔ mi wele we 'da mi, hã mi da nu mi sɛ, nɛ nɛ ĩ ti mɔmɔ mi de.

⁴ Mi álá nu mi hã wele dɛ ngɔ nù ge gɔ, mi ala nu mi hã Gale, sila mi 'bɔa do li nɛ.

⁵ Fala kɛ nɛ á tɛ nɛ do mi, nɛ sape ma ba sɛ li nɛ, nɛ ma ba sɛ we nu nɛ, nɛ nɛ ɔngbɔ sɛ ɔngba.

⁶ 'Da fala mi lengge ngamɛ ma hɔ hã mi gɛ, nɛ sila mi gɔnɔ zurr, nɛ tɛ mi tana tuku tuku ní.

⁷ Gulu kɛ o'dã winɔ wa fé dɔ̃ gɔ, nɛ ngawi 'da wa ma gã dɛ dati gã fai we ge nde?

⁸ Obenɔ 'da wa wa linggi kɛ zã go'do wa takpa, nɛ obe yaa wa wa sanza dɛ li wa gbalala vɛ̃.

⁹ Nu tɔa 'da wa ma do dungu fio, nɛ wa dɛ́ kili gɔ, nɛ Gale hã ngamɔ hã wa gɔ.

¹⁰ Sabɛlɛ do sabɛlɛ, onadalamɛnɔ 'da wa wa ba zã, nɛ wa ko, nɛ nde ala zã nɛ bina.

¹¹ Obenɔ 'da o'dã winɔ wa yɛnggɛ, nɛ wa bũlũ dɛ ngɔ nɛ́ obe dua ni. Nɛ obe yaa wa wa dɛ sa nɛ́ kɛ zã wa kɔ̃a ni iko.

¹² Owinɔ ni wa dɛ yangga, nɛ wa zɛ zuma do kundu, nɛ wa yaka dawaya. Wa dama gaga, nɛ wa yɔ yɔla.

¹³ 'Do dia dungu kɛ wa kpa ngɔ nù gɛ ni, nɛ wa zĩlĩ do gɛ̃a sila dɛ kɔ le 'da ofionɔ.

¹⁴ Ĩ na, wa tɔ̃ zi hã Gale na, a la lo hã lo dungu fio, we kɛ linggamɛ 'da a ma dɛ́ mɔ hã lo gɔ.

¹⁵ Owinɔ wa tɔ̃ na, mɔ a Gale kɛ mɔ do nganda vɛ̃, nɛ nde gulu nɛ na, lɛ a ongbánɔ 'da mɔ nde? Lɛ sambala mɔ, nɛ mɛ mɔ nɛ dɛ hã lɛ ni a ge nde?

¹⁶ Owinɔ ni wa lénggé do Gale gɔ. Nɛ a dɛ́ mɔ kpo do wa gɔ.

¹⁷ Nɛ nde fala kɛ na, o'dã winɔ wa kpa ngamɔ, nɛ wa fe fio dɔ̃, tabi na, zã Gale nɔ̃lɔ̃ dɛ tɛ wa, nɛ a 'danga mɔ mɔ́ wa ni, ma nganda wena.

¹⁸ Wa ɔ̀ nɛ 'bulu wɔkɔsɔ, kɛ bũ kala ma, nɛ ma pɛsɛ ni gɔ, nɛ wa wè kɔ do fumbɛlɛ, kɛ gba bũ kamba so ma dɛ ngɔ, nɛ ma pɛsɛ ni gɔ.

¹⁹ Nɛ nɛ tɔ̃ na: Gale hã etumbu hã obenɔ 'da wi dɛ 'dã mɛnɔ. Nɛ nde we mi, dia nɛ sɔ na, a hã ma hã Owi dɛ 'dã mɛnɔ do tɛ wa ngboo, sɛ nɛ li wa sɔ de.

²⁰ E kɔ zã Gale kɛ a do nganda vɛ̃ ni, nɔ̃lɔ̃ dɛ tɛ o'dã winɔ ngboo, nɛ wa kpa ngamɔ.

²¹ Ngba soe kɛ wa fe ia, nɛ nde we mɔ́ obenɔ 'da wa ma zɔ́ wa gɔ.

²² Wele wè tɛ be hã zã hã Gale bia gɔ. Wi 'bili we 'da oanzɛnɔ, wi a a.

²³ Mbe owinɔ wa kpá 'bako ngɔ nù gɛ gɔ, nɛ wa ɔ gbaa, nɛ wa fe fio tɔa, nɛ nde wa 'bana do ngawi.

²⁴ Bula li wa ma ndele do nɔ, nɛ wa ɔ fai nɛ obe zagbãlã ni.

²⁵ Nɛ nde ombe nɛ wa kpa ngamɔ li dungu nza 'da wa, gbaa nɛ wa fe fio 'bako.

²⁶ Ĩ na, winɔ ni vɛ̃ wa fe sɛ, nɛ wa mi sɛ wa, nɛ ogbɛzɛ wa nyɔngɔ wɔlɔ wa.

²⁷ Nɛ ĩ na, mi ĩ ti 'dã lingga wenɔ 'da nɛ kɛ nɛ lengge dɛ ngɔ mi ni.

²⁸ Nɛ aka tɛ nɛ na: Tɔa 'da o'dã winɔ tɛ fala olo nɛ gɛ bina, ma nɛa do nde?

²⁹ Nɛ àkà Owi la walanɔ na, nɛ zele wenɔ wa gese hã nɛ ni gɔ nde?

³⁰ Ngba soe kɛ 'bako hɔ, nɛ 'dã wi zɔlɔ kɔ nɛ, nɛ wa kpasa ti nɔ̃lɔ̃ zã 'da Gale.

³¹ Wi wia we tɔ̃ 'dã dɛa mɛnɔ 'da wa dɛ li wa, nɛ a o dã zu wa ngɔ nɛ ni a wio nde?

^32-33 'Dã wi a fe sɛ, nɛ wa la do a dɛ ngɔ mabi'donggo i, nɛ owinɔ vɛ̃ wa kpe sɛ dɛ 'do wɔlɔ a, nɛ gba gili Owele wa kã sɛ a dɛ nu kɔ̃ i. Wa má sɛ nù dɛ ngɔ zunu a wena gɔ, nɛ wele wa ɔ sɛ ngi'di zunu a ɔa.

³⁴ Wila we 'da nɛ kɛ nɛ wele we ngo sila mi ni, ma yala iko. Gisa wenɔ 'da nɛ vɛ̃, mɛ a gisa we ɔlɔ wi.