YƆBƆ 20 - WE NU GALE 1995

O'dã winɔ wa kpa sɛ 'bako

¹ Sofarɛ, be Nama hɔlɔ nu ɛ, nɛ a tɔ̃ hã Yɔbɔ na:

² Linggamɔ zu mi ma tumba mi na, mi gese nu lɛnggɛ 'da mɔ. Nɛ sila mi fé gɔ na, mi wele we hã mɔ.

³ Mi zele 'dã we mɔ wele hã lɛ ni zila, nɛ mi ĩ ti kɛ mi nɛ gese hã mɔ ni ia.

⁴ Ta zu mɔ ila ngɔ kɛ na, ndo nyanga kɛ Gale dɛa wele ngɔ nù gɛ,

⁵ ngawi 'da o'dã winɔ ma ɔ̃ 'do nɛ nyɛlɛ gɔ, nɛ yangga 'da wa ma ɔ́ gbaa gɔ ni nde?

⁶ Gɛnɛ kɔ 'dã wi ngala gbaa, kɔ zu a to li nza,

⁷ nɛ nde a mbulu sɛ ɔ nɛ wɔkɔsɔ, nɛ owinɔ wa ĩ zi ti a ĩ ni, wa aka sɛ we a na, a 'bɔ a do nde?

⁸ Ma ɔ sɛ nɛ kɛ wele yala zu a, tabi a zɔa mɔ do li yalɛ, nɛ fala sa, nɛ nde ta zu a ila ngɔ nɛ do'do ni.

⁹ Owinɔ kɛ wa zɔ zi a zɔa ni, wa zɔ́ sɛ 'bɔ a mbé nɛ gɔ. Wa hɔ nu tɔa 'da a, nɛ nde wa kpá sɛ a gɔ.

¹⁰ Nɛ obenɔ 'da a wa si sɛ olo ku'da mɛnɔ kɛ a kala zi kɔ̃ wi sãnɔ ni hã wa.

¹¹ A zi a be zagbãlã, nɛ a zi do ngawi, nɛ nde ngawi 'da a ma mbɔkɔ sɛ, nɛ kili tɛ̃ a ma mbulu sɛ ti zunu.

¹² 'Dã we ɛ̃fɛ̃ nu a ndirr nɛ́ wala mungga ni. Nɛ ma dɔ̃ɔ dɛ ngɔ lɛfɛ a iko.

¹³ A ba 'dã we dɛ nu a ia, nɛ nde a dá nu a gɔ, nɛ a dɛ yangga ma gbaa, sɛ nɛ de.

¹⁴ Nɛ nde 'dã lɛnggɛnɔ ni, ma hã sɛ zɛlɛ hã a, nɛ ma fanga nu a kɛrr nɛ fãlĩ gɔ̃ ni.

¹⁵ Gale a dɛ sɛ na, a gese mɛnɔ 'da winɔ a yɔ'dɔ zi ma ni, nɛ a ɔ̃lɔ̃ sɛ ma kɔ zã a dɛ nù vɛ̃.

¹⁶ Mɛ a nzɔ'bɔ zi ni, mɛ a fãlĩ gɔ̃, ma gbɛ sɛ a.

¹⁷ A tɛ gbìnì zã a na, ɛ kpa sɛ odia mɔ dunu tɔa gɔ.

¹⁸ A gese sɛ kpa ngɔ mɛnɔ 'da a vɛ̃, nɛ nde si olo kpamɛ 'da a sɛ kɔ̃ a bina.

¹⁹ We kɛ a kala zi ma kɔ̃ winɔ do nga nɛ, nɛ a zɛlɛ tɛ Owi sãnɔ, nɛ a dolo zu tɔa mɔ́ wele.

²⁰ Sila a gã ngɔ kpamɔ wena. Nɛ nde mɔ olo gã gole 'báná sɛ 'bɔ kɔ̃ a gɔ.

²¹ De mɔ lá li a gɔ. Gɛnɛ kɔ na mɛ ni, kpamɛ 'da a ɔ́ sɛ gbaa gɔ.

²² 'Da fala kɛ a do kpamɔ wena, nɛ 'bako ma hɔ sɛ 'da a, nɛ ma dĩlĩ a nɛ́ kɛ wa ia dĩ tole zu a ni.

²³ 'Da fala kɛ a sɛ tɛ lengge zã a iko ni, nɛ Gale a tombo sɛ nɔ̃lɔ̃ zã 'da ɛ dɛ ngɔ a, nɛ tɛ̃ a ma zɛlɛ sɛ.

²⁴ Fala kɛ a gulu du kɔya 'da wi sɛnɛ a, nɛ a te sɛ li sɛlɛ.

²⁵ Fala kɛ a fo kpili kɛ ma lia 'do a ni, hã a gbɔtɔ sɛlɛ kɛ ma lia li sila a ni, nɛ kili fio ma ba sɛ a.

²⁶ Fala Gale 'dafa hã a ni, mɛ a kɔ̃ gba tũ. Gale a tombo sɛ we, nɛ ma bɛlɛ a, nɛ ma 'danga mɛnɔ kɔ tɔa 'da a vɛ̃.

²⁷ E kɔ owinɔ li nza i wa fo nwá ngɔ 'dã mɛnɔ 'da a, nɛ wanɔ nù nga gɛ wa tɔ̃ 'dã we 'da a dɛ nza.

²⁸ Ngba soe kɛ zã Gale ma nɔ̃lɔ̃ sɛ dɛ tɛ̃ a ni, nɛ dia mɛnɔ 'da a ma 'danga sɛ vɛ̃.

²⁹ Tɛlɛ tɛ mɛ kɛ Gale 'dafa ma, we dɛ do o'dã winɔ gɛ a ni.