YƆBƆ 2 - WE NU GALE 1995

Satana yamba sila Yɔbɔ fala bɔa

¹ Mbe ngba soe kpo, nɛ oanzɛnɔ 'da NWA Gale wa hɔa 'bɔ we tɔ̃ we dɛa tonɔ 'da wa hã a. Nɛ Satana nɛa tɛ mɛ 'bɔ do wa, we tó kɛnɔ 'da ɛ.

² Nɛ nwa aka Satana na: “Mɔ yula do nde?” Nɛ Satana gese na: “Mi ngbala sɔ mbe nyanga mi dɛ ngɔ nù i we soko ma.”

³ Nɛ NWA aka 'bɔ a na: “Mɔ zɔa wi toe 'da mi Yɔbɔ nde? Fo wi ɔ nɛ a ni ngɔ nù i bina. A a saka wi, nɛ a a wi bɔlɔ zu. A yu kili mi, nɛ a bɛ̃a dɛ 'dã mɔ. A 'bana do wi kɛ wa wè tɛ sa kɔ'da tɛ̃ a fala kpo gɔ ni. Mɔ ɔkɔlɔ mi na, mi hã etumbu hã a yala iko.”

⁴ Nɛ Satana gisa na: “Wele wia we 'dɔlɔ mɛnɔ vɛ̃ kɛ a do ma ni, we kpasa kili tɛ̃ a.

⁵ Nɛ nde mɔ e kɔ̃ mɔ tɛ kili tɛ̃ a, nɛ a dã sɛ mɔ do dɛla dɛ gbali mɔ ni ngboo!”

⁶ Nɛ nwa tɔ̃ hã Satana na: “Ma a dia, mi ia a dɛ tambala kɔ̃ mɔ, nɛ nde mɔ tɛ gbɛ̀ a gbɛa gɔ.”

⁷ Nɛ Satana kulu ngɔ, nɛ a la, nɛ a fi 'dã zɛlɛ tɛ ndala tɛ Yɔbɔ. Ma yula ti tambala nyanga a gbaa, nɛ ma hɔ tɛ ndala zu a.

⁸ Yɔbɔ nɛa, nɛ a dungu dɛ zã gili bũ, nɛ a ba sangbãlã dɛ kɔ̃ a we gbɛlɛ do tɛ̃ a.

⁹ Nɛ wuke 'da a tɔ̃ hã a na: “Mɔ 'bana tɛ mɛ tɛ yu kili Gale fai nde? Mɔ da zu li a, kɔ a gbɛ́ mɔ do'do gɔ nde?”

¹⁰ Nɛ Yɔbɔ gese hã a na: “Kɛ mɔ tɔ̃ gɛ, ma do gulu nɛ bina. 'Da fala kɛ Gale tombo dia mɔ hã lɛ, nɛ lɛ kɔ̃ gɛnɛ nɛ dɔ̃. Kɔ gulu kɛ lɛ wè mɛ 'bɔ we kɔ̃ gɛnɛ ngamɛ kɛ a tombo hã lɛ ni gɔ, we ge nde?” Nɛ tɛ kɔ mbé ngamɛ kɛ Yɔbɔ kpa ni, a tɔ̃̀ 'dã zu li Gale gɔ.

Ongba Yɔbɔ talɛ wa tɛa we zɔ a

¹¹ Ongba Yɔbɔ talɛ, wa zila we ngamɛnɔ kɛ ma kpa a ni. Wi zi a Elifazɛ, wi kɔ le Temanɛ, Bildadɛ, wi Suha, do Sofarɛ, wi Nama. Owinɔ talɛ ni wa yula 'da wa i, nɛ wa tɛa 'da Yɔbɔ we be dɛa na hã a, do we mbɔkɔ sila a.

¹² Wa zɔa a ndũu i, nɛ wa yɔ ti a do'do. Ma kɛ wa tia ngɔ kɔ̃a, nɛ wa ɛ̃ tulu tɛ wa, nɛ wa so bũ dɛ zu wa vɛ̃.

¹³ Dɛ 'do nɛ, nɛ wa dungu do Yɔbɔ dɛ bulu nù ni gbaa 'do tũ sambo. Nɛ nde wa fì nu wa tɛ̃ a do lɛnggɛ kpo gɔ, we kɛ zɛlɛ tɛ 'da a ma gã zi li wa wena.