YƆBƆ 19 - WE NU GALE 1995

Do ndɔti nɛ nɛ wele a tɔ̃ sɛ ngbangga ngɔ Yɔbɔ

¹ Nɛ Yɔbɔ gese na:

² Nɛ la sɛ fala tulu mi soe ki nge nde? Nɛ nɛ fo sɛ dĩ tole lɛnggɛ nu nɛ gɛ ngɔ mi soe ki nge nde?

³ Nɛ dã mi fala dɛlɛ wena ia, kɛ nɛ zɛlɛ tɛ mi nɛ gɛ, ma ha sape hã nɛ gɔ nde?

⁴ Gɛnɛ kɔ mi sɔ a wi dɛ 'dã mɔ, nɛ nde ma zɔ̃ nɛ gɔ, ma zɔa mi zu mi kpo.

⁵ Nɛ dãlã dɛ tɛ mi we 'dã mɛ mi dɛa gɛ. Nɛ fa na mi kpa sape, nɛ nɛ ɔ do dɔ̃lɔ̃ li.

⁶ Nɛ nde nɛ ĩ na, wi hã ngamɛ gɛ hã mi, wi a Gale, a hã a fi mi kɔ gbanda 'da a.

⁷ Fala kɛ mi tɔ̃ we ngatɛ kɛ Gale dɛ do mi gɛ, nɛ nde fo wi lengge do ma bina. Mi sa mɔ na, wele tɛ hã a gala mi, nɛ nde fo wi tɔ̃ bɔlɔ we ngɔ mi bina.

⁸ Gale kpia wala ti mi, nɛ mi wè tɛ la nɛ gɔ. A ia mi dɛ kɔ gba tũ na, mi tamba ti mi tamba.

⁹ A fua dɔ̃lɔ̃ li 'da mi vɛ̃, nɛ mɛnɔ ma be zi dia sako li mi ni, ma ia vɛ̃.

¹⁰ A 'danga mɛnɔ 'da mi vɛ̃, nɛ mi tia nù. Fo mɔ kɛ na, mi gbini zã mi do nɛ ni bina. Mi ɔ nɛ te kɛ wa gɔmɔ ma, nɛ olo nɛ dɛa wila ni.

¹¹ Zã a nɔ̃lɔ̃ dɛ tɛ mi, nɛ a zɔ mi nɛ́ mbe kpo kɔ owi sɛnɛ a ni.

¹² A tumba Owele na wa bi mi, nɛ wa fi dolo mɔ wa dɛ tɛ mi, nɛ wa linggi tɔa tande 'da mi.

¹³ Gale ndaka Owele mi, nɛ wa nyɛlɛ do mi ndũu, nɛ owi ĩ ti mi wa yu mi do'do.

¹⁴ Owinɔ tɛ kɔ tɔa ti mi, do oyali ngba mi ngboo ni, wa yu mi, nɛ ta zu wa ila ngɔ mi vɛ̃.

¹⁵ Gɛnɛ kɔ ogele winɔ kɛ wa ɔ zi dɛ ti kɔ̃ mi ni, wa ĩ 'bɔ ti mi gɔ. Nɛ owuko wi dɛa tonɔ 'da mi, wa zɔ mi nɛ́ gele wi ni, nɛ wa kɔ̃̀ 'bɔ gɛnɛ mi gɔ.

¹⁶ Mi sa mɔ hã wi dɛa toe 'da mi, nɛ nde a kɔ̃́ nu mi gɔ. Gɛnɛ kɔ mi ala nu mi hã a gbaa, nɛ nde a kɔ̃́ gɔ.

¹⁷ Wuko 'da mi kɔ̃̀ dungu kɛ zã mi gɔ, nɛ onya mi wa kɔ̃̀ 'bɔ gɛnɛ mi gɔ.

¹⁸ Ogbɔtɔkɔ be wa zɔ mi li wa yala. Kɔ fala kɛ mi wele we ia, nɛ wa fi gbɛlɛgbɛsɛ zu mi.

¹⁹ Oyali ngba mi ngboo ni, wa soko mi do 'dã li. Nɛ owinɔ vɛ̃ mi kɔ̃a zi gɛnɛ wa ni, wa sɛnɛ mi.

²⁰ Mi ɔka gbaa, nɛ mi ɔ nɛ gbãlã ni. Mɛnɔ 'da mi mbiti vɛ̃, nɛ ma la tati a kpongbolo zu mi iko.

²¹ Aa nɛ, oyali ngba mi, nɛ kɔ̃, nɛ nɛ ĩ 'bako hã mi, we kɛ wi a Gale a hã ngamɛ gɛ hã mi.

²² Gulu kɛ nɛ mba do a, nɛ nɛ hã ngamɔ hã mi we ge nde? Nɛ tɛ mbɔkɔ tɛ zɛlɛ tɛ mi gɔ nde?

²³ Mi kɔ̃a na, wa kɔma gulu we 'da mi kɔ mbɛti.

²⁴ Nɛ wa kɔma ma dɛ ngɔ kpangba ta na, ma ɔ ɔa fai.

²⁵ Mi ĩ na, mi do wi tɔ̃ we ngɔ mi boe, a 'bana nza. Nɛ a gɔnɔ sɛ ngbangganɔ ngɔ nù ge.

²⁶ Gɛnɛ kɔ mi kpa zɛlɛ tɛ gbaa, hã mi fe, nɛ mi zɔ sɛ Gale do gbali mi.

²⁷ Mi zɔ sɛ a do li mi ngboo, nɛ nde a sɛ li mi a mbé wi gɔ. Nɛ mi mbɔkɔ tɛ 'bɔ 'da ngba soe ni.

²⁸ Nɛ zɔ mi, nɛ nɛ tɔ̃ na, lo nɛ dɛ do zɛlɛ tɛ̃ a nɛ nde? We lo nɛ tɔ̃ dɛ ngɔ a, takɔ wa 'bili 'dã we hã a ni a ge nde?

²⁹ Nɛ ɔ̃ do sɔ̃a li, ní gɔ, nɛ nɛ kpa sɛ ngamɔ, we kɛ dɛa to tɛ nɛ, ma wia do fio. Nɛ ĩ na, Gale a 'bili sɛ ngbangga 'da nɛ.