YƆBƆ 18 - WE NU GALE 1995

Gale ndɔa bili hã o'dã winɔ

¹ Nɛ Bildadɛ, be Suha na:

² Aa Yɔbɔ, mɔ la sɛ fala yia lɛnggɛnɔ nu mɔ gɛ soe ki nge nde? Mɔ 'dáfá linggamɔ zu mɔ, nɛ lɛ wele sɛ we do mɔ.

³ Gulu kɛ mɔ zɔ lɛ li mɔ nɛ́ sa'de ni we ge nde? Mɔ lengge na, lɛ a yɔnda wi nde?

⁴ Nɔ̃lɔ̃ zã 'da mɔ, ma zɛlɛ sɛ tɛ mɔ wele nɛ ngboo. Nɛ ma fó sɛ 'bɔ kalanɔ tɛ fala ma nɛ ni gɔ.

⁵ We yélé sɛ ngɔ 'dã wi fai gɔ. Nyɛa we nu di 'da a ma bi sɛ.

⁶ Nɛ fala ngɔ tɛ̃ a yélé sɛ 'bɔ gɔ, nɛ wele sá sɛ li a mbé nɛ gɔ.

⁷ A yɛnggɛ zi, nɛ nde kili bá a gɔ, kɔ di dɔ̃ ni, a yɛnggɛ do tɛ kili, nɛ mɛnɔ a 'dafa zi we dɛ ma ni, ma 'danga sɛ.

⁸ A ba sɛ wala kɛ wa ndɔa bili li nɛ ni, nɛ a te sɛ li bili wa ndɔa hã a ni,

⁹ nɛ ma ba nyanga a, nɛ ma ɛnzɛ a nɔ kee.

¹⁰ Fɛlɛ bili nɛ ba nyanga a ni do ti nù, nɛ ma ndɔa, nɛ ma ɔ 'bɔ 'da a iko.

¹¹ Ngamɔ tɛ 'bɔ 'da a tɛ falanɔ vɛ̃ a yɛnggɛ do ma ni, nɛ ma kpa sɛ a do gbanga nɛ.

¹² A zi do kpamɔ wena, nɛ nde gba wɔ ma ba a, nɛ 'bako lia tɔa ngɔ a.

¹³ 'Dã zɛlɛ ma 'danga sɛ ndala tɛ̃ a, nɛ ma 'bili sɛ zu kɔ̃ a do zu nyanga a ngɔ te nɛ vɛ̃.

¹⁴ Wa ba sɛ a tɛ fala ɔi 'da a ngboo, nɛ wa la do a dɛ 'da nwa kɔ le 'da fionɔ i.

¹⁵ Kɔ tɔa olo a ma ɔ sɛ iko, nɛ wa fɔlɔ sɛ kɔ nɛ dati, sɛ nɛ wele ɔ kɔ nɛ de.

¹⁶ Na mɛ ni, nɛ a ɔ sɛ nɛ te kɛ ma kula ngaɔɔ, yolo tɛ liã nɛ gbaa, we hɔ tɛ ogba kɔ̃ nɛ vɛ̃ ni.

¹⁷ Li a ma mbiti sɛ ngɔ nù gɛ vɛ̃, nɛ ta zu wele ma ele sɛ ngɔ a.

¹⁸ Wa ndaka sɛ a sanga owinɔ do'do. Wa fo sɛ a tɛ sa fala, nɛ wa fi a kɔ gba tũ.

¹⁹ Be mɔ́ a kpo kó sɛ be zã ɛ gɔ, nɛ obe zã a wa kpásá sɛ gɔ.

²⁰ Lɛnggɛ 'da a ma kpa sɛ nyanga nza vɛ̃. Nɛ gã kili ma ba sɛ winɔ, nɛ wa tana gbulu gbulu.

²¹ Na mɛ ni, nɛ wa tɔ̃ sɛ na: “Mɛ kɛ ma kpa wi dɛ 'dã mɔ kɛ ta zu a ila ngɔ Gale gɛ a ni.”