YƆBƆ 17 - WE NU GALE 1995

Yɔbɔ na gbãlã zã ɛ bi do'do

¹ Mi gbɔtɔ gɔgɔ fio, mi nɛ fe fia. Nu zunu fĩ we 'bɔ 'da mi.

² Owinɔ wa mɔmɔ mi, nɛ wa fi gbɛlɛgbɛsɛ zu mi. Nɛ 'dã wila wenɔ 'da wa ma kala yala li mi.

³ Aa Gale, mɔ gɔnɔ zu mi, we kɛ mbé wele we si 'do mi olo mɔ bina.

⁴ Mɔ bi gbãlã zã ongba mi vɛ̃, mɔ tɛ è wa kɔ wa nɛ ngɔ mi gɔ.

⁵ Wa ɔ nɛ wi kɛ wa tɔ̃ gba we 'da a, kɛ a sa mɔ hã ongba a we nyɔngɔ mɔ do a, nɛ obenɔ 'da a wa 'bɔ 'da kɛ 'da wa zãa ni.

⁶ Owinɔ wa ga zuma do zu li mi we mɔmɔ mi. Nɛ wa tufu sa nu wa dɛ sanga li mi.

⁷ Bula li mi dulu tɛ 'bako, nɛ mi ɔka gbaa, nɛ mi ɔ nɛ gbãlã ni.

⁸ Owi bɔlɔ zunɔ wa zɔ mi, nɛ ma ba we nu wa, nɛ sape ba li wa.

⁹ E kɔ wi bɔlɔ zu 'bana tɛ dɛ mɔ bɔlɔ zu 'da a. Nɛ wi dia sila dɛ nganda we dɛ de mɔ.

¹⁰ Aa nɛ, oyali ngba mi, nɛ tɛ́. Nɛ kpóló tɛ nɛ dɛ 'da mi nga. Gɛnɛ kɔ nɛ tɛ, nɛ nde mi zɔ̃ wi hã zã kɔ nɛ gɔ.

¹¹ Tũ dungu nza 'da mi sɔkpa ia, mi nɛ fe fia. Nɛ mɛnɔ vɛ̃ mi 'dafa we dɛ ma ni ma 'danga.

¹² Ongba mi wa zɔ gba tũ, nɛ wa lengge na mɛ a sa fala, nɛ wa tɔ̃ na nu sala soe kɔla ia.

¹³ Mɛ mi nɛ 'bɔ 'da nɛ ni a ge nde? Fala 'da mi a kɔ le 'da ofionɔ i. Nɛ tangge ɔi 'da mi a kɔ gba tũ.

¹⁴ Nɛ mi tɔ̃ hã zuni 'da mi na: “Mɔ ɔ nɛ baa mi ni.” Nɛ mi tɔ̃ hã ogbɛzɛnɔ wa nyɔngɔ wɔlɔ mi ni na: “Nɛ ɔ nɛ naa mi do boko nya mi ni.”

¹⁵ Mi wia 'bɔ we gbini zã mi do ge nde? Owinɔ vɛ̃ wa ĩ na, fo mɔ gbini zã mi do nɛ bina.

¹⁶ Mɛ mi gbini zi zã mi do ma ni, ma la do mi dɛ kɔ le 'da fionɔ i, nɛ lɛ kifi sɛ nù do ma bɔa nɛ.