YƆBƆ 16 - WE NU GALE 1995

Wila we 'da Yɔbɔ

¹ Nɛ Yɔbɔ gese na:

² Mi zila tɛlɛ tɛ wila wenɔ nu nɛ gɛ wena. Nɛ yamba na, nɛ hã kpã sila hã mi, ĩ na, nɛ gálá mi gɔ.

³ Nɛ la sɛ fala yia wenɔ nu nɛ gɛ soe ki nge nde? Nɛ mɛ zã nɛ nɔ̃lɔ̃, nɛ nɛ wele wenɔ gɛ we nɛ ni a ge nde?

⁴ Nɛ ɔ́ sɔ fala olo mi gɛ, kɔ mi ɔ fala olo nɛ ni, nɛ mi wele sɔ tɛ mɛ 'bɔ kpo kpo wenɔ nɛ wele ni, nɛ mi tɔ̃ sɔ ɛ̃fɛ̃ lɛnggɛ nɛ ngɔ kɛ 'da nɛ. Nɛ mi dɛ sɔ tɛ mɛ 'bɔ 'bako, nɛ mi gɔmɔ zu mi we nɛ.

⁵ Nɛ wila we ngɔ lɛfɛ mi, ma kpãlã sɔ sila nɛ, nɛ sila nɛ gɛ̃.

⁶ Nɛ nde fala kɛ mi wele we, nɛ zɛlɛ tɛ mi ma gã dɛ dati. Kɔ fala kɛ mi kpe nu mi, nɛ nde zɛlɛ é 'bɔ gɔ.

⁷ Gale mbɔkɔ gbãlã tɛ mi do'do, nɛ a kumu 'bɔ nu fɛlɛ kulanɔ 'da mi vɛ̃.

⁸ A 'danga kili tɛ mi, nɛ mi ɔka, nɛ winɔ wa lengge na, mi dɛa 'dã mɔ.

⁹ Zã Gale nɔ̃lɔ̃ dɛ tɛ mi, nɛ a fa we gbɛ mi. A nyɔngɔ li gogo a, nɛ a fele li a dɛ tɛ mi.

¹⁰ Owele wa ngɛmɛ ngba wa, nɛ wa zĩ mi takpa, nɛ wa tulu mi.

¹¹ Gale ia mi dɛ tambala kɔ̃ ogbɔtɔkɔ be. A la mi dɛ kɔ̃ o'dã wi.

¹² Mi zi do dia dungu, nɛ Gale 'danga ma. A ba gɛlɛ mi, nɛ a lo mi do nù. Nɛ a e mi nɛ́ kpɔka we ndɔlɔ mi do okpili.

¹³ Nɛ kpilinɔ 'da a ma linggi mi. A ndɔlɔ zã mi, nɛ fãlĩ mi si nù, nɛ nde a ĩ mbe 'bako hã mi be sĩ gɔ.

¹⁴ A hɔngɔ dɛ ngɔ mi ɔ nɛ wi bi bolo ni. Nɛ a ia dani kpa do tɛ mi furr.

¹⁵ Mi hi'da tulu gɛla, nɛ mi so bũ dɛ zu mi.

¹⁶ Mi hia gbaa, nɛ gbali mi fila, nɛ ma hɛ̃a vɛ̃ tɛ kɔ̃a.

¹⁷ Ĩ na, mi dɛ̀ 'dã mɔ gɔ, nɛ mi 'bana tɛ sambala Gale do dia sila.

¹⁸ Tɔkɔ tɛ mi a nù, kɔ aa mɔ nù, mɔ zélé ala nu 'da mi, nɛ mɔ bili nu gbã tɔkɔ tɛ mi sɛ nɛ de.

¹⁹ We kɛ mi do wi tɔ̃ we ngɔ mi boe. Wi tɔ̃ we ngɔ mi a tɛ li nza i.

²⁰ Owinɔ 'da mi wa zɔ mi li wa yala. Mi ka mɔ kpo dɛ 'da Gale, nɛ li mi dunu do mili kɔ̃a.

²¹ E kɔ wi tɔ̃ we ngɔ mi 'dafa we ngbala lɛ do Gale, ɔ nɛ kɛ wa 'dafa we ngbala wele do ngba a ni.

²² E kɔ a tɔ̃ we ngɔ mi, we kɛ tũ fio 'da mi kɔla ia. Mi ba li wala fio, nɛ mi kpóló sɛ 'bɔ mbé tɛ mi 'do gɔ.