YƆBƆ 15 - WE NU GALE 1995

O'dã winɔ wa zɔ́lɔ́ sɛ kpa ngamɔ gɔ

¹ 'Do ki ni, nɛ Elifazɛ, be Temanɛ tɔ̃ hã Yɔbɔ na:

² Wi hã zã nɛ́ mɔ gɛ, nɛ a wele yia we, nɛ a gese olɛnggɛ kɛ gulu nɛ bina, ɔ nɛ kɛnɔ gɛ nde?

³ Wenɔ mɔ wele nu mɔ gɛ do gulu nɛ bina, mɔ wele ma vɛ̃ yala iko.

⁴ Mɔ dɛ na, owinɔ wa la fala yu kili Gale, nɛ wa tɛ sàmbàlà 'bɔ a gɔ.

⁵ Wila we nu mɔ be na, mɔ dɛa 'dã mɔ. Mɔ fa we tɔ̃ ɛ̃fɛ̃ lengge, takɔ mɔ vĩ zu 'dã mɛnɔ 'da mɔ.

⁶ Wi fi balia zu mɔ, wi a mi gɔ. Mɛ a lɛnggɛ nu mɔ zu mɔ kpo. Kɔa nu mɔ ma 'bili sɛ we dɛ zu mɔ.

⁷ Wi wa kua a ngɔ nù gɛ dati, wi a mɔ nde? Nɛ mɔ zɔa nza dati sɛ a Gale dɛ kalanɔ de nde?

⁸ 'Da fala kɛ Gale mba zi li oanzɛnɔ 'da a ni, nɛ mɔ zila we a tɔ́a hã wa, takɔ mɔ kpa hã zã nɛ zu mɔ kpo nde?

⁹ Mɛ mɔ ĩ ti nɛ, nɛ lɛ gele winɔ lɛ ĩ ti ma gɔ ni, mɛ a ge nde?

¹⁰ Lɛ do okpasa wi hã zã sanga lɛ gɛ boe, nɛ sabɛlɛ 'da wa ma nɛa ngɔ sabɛlɛ 'da baa mɔ.

¹¹ Gale kɔ̃a we ngo sila mɔ do wala dia wila we 'da lɛ, nɛ mɔ dɛ gã zu, nɛ mɔ bɛ̃ gɛnɛ nɛ nde?

¹² Gulu kɛ zã mɔ nɔ̃lɔ̃, nɛ mɔ fele li mɔ dɛ tɛ lɛ,

¹³ nɛ sila mɔ 'danga dɛ tɛ Gale, nɛ mɔ wele o'dã we hã a ni we ge nde?

¹⁴ Wele wia we tɔ̃ na, ɛ dɛ́ 'dã mɔ gɔ, nɛ nde ɛ a wi bɔlɔ zu nde?

¹⁵ Gɛnɛ kɔ oanzɛnɔ ngboo, nɛ nde Gale gbíní zã a do wa gɔ, nɛ li nza ma dé li a ngboo gɔ,

¹⁶ Singga do wele kɛ kɔ sila a dè go, nɛ a dɛ́ mɔ bɔlɔ zu gɔ, nɛ wɔ dɛ 'dã mɔ ba a nɛ́ wɔ lì gɛ nde?

¹⁷ Mɔ zélé mi sɛ, mi nɛ tɔ̃ we hã mɔ! Mi nɛ tɔ̃ we mɛ mi ĩ ti ma ni hã mɔ.

¹⁸ Mɛ a bia we oyaa wi hã zãnɔ, wa bia zi ma hã wa ni.

¹⁹ Gale hã zi nùi gɛ hã wa do mɔ́ wa, nɛ ogele wele wa lè we kpolo linggamɔ zu wa gɔ.

²⁰ Mɔ zɔ́, o'dã winɔ wa kpa ngamɔ kɔ dungu nza 'da wa vɛ̃. Nɛ Gale tɔlɔ tũ dungu nza 'da wa tɔla.

²¹ Zala wa ɔkɔlɔ wa ɔ nɛ owele wa he mɔ kɛ zã wa ni, nɛ kili ba wa. Nɛ wa dɛ kili na, ogele 'dã wele wa tɛ sɛ, nɛ wa 'danga dungu fio 'da lo.

²² Nɛ wa lengge na, lo fe sɛ nga fio. Owele wa gbɛ sɛ wa do tɔ̃a nu bolo.

²³ Nɛ oziki wa nyɔngɔ sɛ wɔlɔ wa. Wa ĩ de wena na, ngamɛ ma 'bɔ 'da wa ni, ma gã wena,

²⁴ nɛ wa kpa sɛ 'bako do zɛlɛ tɛ. Mɛnɔ ni ma hã sɛ kili hã wa, ɔ nɛ kɛ nwa kala osodanɔ 'da a, nɛ a nɛ bolo do wa, nɛ a hã kili hã Owi sɛnɛ a ni.

²⁵ Mɛ kɛ ma dɛ sɛ tɛ̃ ɛ hã wi dɛ gã zu, kɛ a umu kɔ̃ a, nɛ a be ma li Gale, kɛ a do nganda vɛ̃, nɛ a bɛ̃ we nu a gɛ a ni.

²⁶ A sɔmɔ tɛ̃ a, nɛ a bi do Gale, nɛ a usu tɛ̃ a dɛ 'do ngele 'da a.

^27-28 Gɛnɛ kɔ a gã wena, hã bula li a ndele 'bɔ tɛ gã, nɛ a si sɛ kɔ lenɔ wa 'danga zi ma ni, nɛ a ɔ kɔ ã tɔanɔ kɛ wele ɔ́ zi kɔ nɛ gɔ, we kɛ ma 'bɔ zi we te tia iko ni.

²⁹ Wi ni, a hɔ́ sɛ wi kpamɔ fala kpo gɔ. A kpa tabi mɔ, nɛ nde ma ɔ́ sɛ gɔ, nɛ a hɔ́ sɛ gã wi gɔ.

³⁰ A yú sɛ gba tũ ngamɔ gɔ. A ɔ sɛ nɛ te kɛ we bɛlɛ ma, nɛ ogbakɔ̃ nɛ kolo ngaɔɔ ni. Nɛ bũ nu Gale ma ba sɛ a, nɛ ma fi a ndũu.

³¹ A tɛ gbini zã a do 'bili bɛlɛ gɔ, we kɛ a dɛ na mɛ ni, nɛ wa ɔkɔlɔ sɛ tɛ mɛ 'bɔ a.

³² Nɛ a fe sɛ ngɔ zagbãlã tɛ̃ a, nɛ a ɔ sɛ nɛ́ te kɛ gbakɔ̃ nɛ ku kula,

³³ tabi nɛ́ vinɔ kɛ owala nɛ sɔ̃̀ gɔ, nɛ ma ala, tabi olivɛ kɛ ma dua, nɛ do nɛ ala vɛ̃ ni.

³⁴ O'dã winɔ wa dungu sɛ ndɔlɔ. Nɛ we ma bɛlɛ sɛ tɔanɔ 'da owinɔ, kɛ wa dɛ mɛnɔ olo mbili kɛ wa kpa do 'dã wala ni.

³⁵ Sila winɔ ni lengge fai we dɛ 'dã mɔ, nɛ wa kpa sɛ si olo 'dã mɛnɔ 'da wa.