YƆBƆ 12 - WE NU GALE 1995

Yɔbɔ gisa nu we 'da Sofarɛ

¹ Nɛ Yɔbɔ gese na:

² Mɔ lengge na, mɔ do hã zã nɛa ngɔ owinɔ vɛ̃ nde? Mɔ lengge na, fala kɛ mɔ fe, nɛ hã zã ma fe sɛ fala nɛ kpo do mɔ nde?

³ Ĩ na, mi do hã zã nɛa ngɔ mɔ, nɛ gbãlã zã mi siki la mɔ. Nɛ owinɔ vɛ̃ wa ĩ ti wenɔ mɔ wila ni.

⁴ Zi dati, mi sambala Gale, nɛ a zele mi. Nɛ da dɔ̃ gɛ, ongba mi wa tɛ mɔmɔ mi. Mi a wi bɔlɔ zu, nɛ mi dɛ̃ 'dã mɔ gɔ. Gɛnɛ kɔ na mɛ ni, nɛ nde owinɔ wa tɛ mɔmɔ mi.

⁵ Nɛ nɛ, kɛ nɛ dungu dia dungunɔ ni, nɛ mɔmɔ mi, wi 'bakoe gɛ. Nɛ nɛ dala 'da wi kɛ a 'bɔ we fe fia iko ni.

⁶ Nɛ nde Owi zũnɔ wa dungu gɛ̃a dungu. Wa tulu Gale, nɛ wa dɛ 'dã mɔ dɛ 'da a. Wa gbini zã wa do ngawi 'da wa wele nɛ, nɛ mɔ kpo dɛ́ wa gɔ.

⁷ Nɛ nde mɔ aka osa'denɔ, nɛ wa be sɛ hã zã hã mɔ. Mɔ aka onɔɛnɔ li nza i, nɛ wa be sɛ gulu nɛ hã mɔ.

⁸ Nɛ mɔ wele 'bɔ we do nùi, nɛ ma be sɛ mɔ hã mɔ. Nɛ okɔyɔ 'dɔ gba lìnɔ wa be sɛ mɔ hã mɔ.

⁹ Mɛnɔ do osa'denɔ ni vɛ̃ wa ĩ na, mɛ ma dɛa tɛ̃ ɛ gɛ ma yula kɔ̃ NWA.

¹⁰ Kpasi 'da Otunu li mɛnɔ vɛ̃ ma dɛ tambala kɔ̃ Gale, nɛ a hã bũ kpasi hã winɔ vɛ̃.

¹¹ Wa tɔ̃ na: “Zala wi zele we, nɛ ma gɔnɔ sanga nɛ, ɔ nɛ kɛ nu wi yamba nyɔngɔmɔ, nɛ ma ĩ ti ɛ̃fɛ̃ nɛ ni.

¹² “Hã zã mɛ a mɔ mɔ kpasa wi. Nɛ wi kɛ a dungu nza wena ni, a ĩ ti gɔnɔ sanga 'dã mɔ do dia mɔ.”

¹³ Nɛ nde hã zã do ĩ ti mɔ, wi a Gale, nɛ a do ngawi do hã zã we dɛ mɛnɔ.

¹⁴ Wi wia tɛ 'dafa mɔ kɛ Gale 'danga, nɛ ma de olo a ni, wi a wio nde? Nɛ wi wia we ba wele ti kɔ̃ Gale, wi a wio nde?

¹⁵ Gale dɛ na, ngangga yolo, nɛ sabɛlɛ bɛlɛ. A dɛ na, kolo tɛ, nɛ lìnɔ ma gbini.

¹⁶ Gale do ngawi we dɛ mɛnɔ vɛ̃. Fala kɛ wele ɔlɔ ngba a we dɛ 'dã mɔ, tabi wele dɛ 'dã mɔ we kɛ ngba a ɔlɔ a, nɛ nde Gale a wele winɔ ni bɔa nɛ.

¹⁷ Gale dɛ na, ogã wi mbatinɔ wa hɔ wi bɔ, nɛ ogã wi fɔmɔ lenɔ wa hɔ yɔndɔ wi.

¹⁸ A fo dɔndɔlɔ nwa kɔ̃ wa, nɛ a kpo fɛlɛ dɔkpɔ gɛlɛ wa ɔ nɛ Owi bɔlɔkɔ ni.

¹⁹ Nɛ a dɛ na, onganganɔ wa hɔ owi bɔ, nɛ a fo ngawi 'da okumunɔ.

²⁰ A kpe nu Owi tɔ̃ ɛ̃fɛ̃ lɛnggɛ, nɛ a fo hã zã 'da okpasa winɔ.

²¹ A dɛ na, winɔ wa zɔ ogã winɔ li wa yala. Nɛ a dɛ 'bɔ na, ngawi 'da o'dã nwanɔ ma e.

²² A fo gba tũnɔ do'do, nɛ a dɛ na, mɛnɔ kɛ ma kɔ gba tũ ni, ma ɔ dɛ sa fala.

²³ Nɛ a dɛ na, ombe winɔ wa dɛlɛ kɔ nu kɔnggɔ wa, nɛ wa nganda wena. 'Do nɛ, nɛ winɔ wa bi wa, nɛ wa gbɛ wa, nɛ wa kumu do'do.

²⁴ A dɛ na, zu nwanɔ ma vĩ, nɛ wa yɔ wala tɛ yɛnggɛ do li gba zɔ̃, nɛ nde wa ĩ́ ti wala wa la nɛ ni gɔ.

²⁵ Nɛ a dɛ na, wa yɛnggɛ nɛ́ owi tandu, nɛ wa la kpɛa kpɛa nɛ́ owi bá dɔ̃ ni.