YƆBƆ 10 - WE NU GALE 1995

Gale dɛa mi we hã ngamɔ hã mi iko

¹ Wɔ dungu nza ia tɛ mi do'do, nɛ mi wé sɛ we usu ala nui 'da mi fai gɔ. Sila mi ma 'danga ia, nɛ mi lá sɛ fala tɔ̃ we nɛ gɔ.

² Gale, mɔ tɛ 'bìlì 'dã gulu we hã mi gɔ. 'Dã mɛ mi dɛa ni a ge nde? Mɔ tɔ̃ hã mi sɛ.

³ Mɔ zɔ́ zɛlɛ tɛ 'da mi li mɔ ɔ dia nde? Nɛ ma ɔ dia na, mɔ zɔ wi kɛ mɔ dɛa a ni li mɔ yala nde? O'dã winɔ wa dɛ 'dã linggamɛnɔ 'da wa, nɛ mɔ zɔ li mɔ ɔ dia nde?

⁴ Mɔ zɔ́ mɔ nɛ́ lɛ Owele iko nde? Gulu kɛ mɔ lengge mɔ nɛ́ wele ni we ge nde?

⁵ Mɔ dɛ na mɛ ni, we kɛ kpasi 'da mɔ, do sabɛlɛ dungu nza 'da mɔ wia kɔ̃ do wele nde? Ɔ̃ ɔ, ma ni gɔ.

⁶ Kɔ gulu kɛ mɔ fa we ĩ ti 'dã mɛnɔ 'da mi we ge nde?

⁷ Mi ĩ de wena na, mi dɛ̀ 'dã mɔ gɔ. Nɛ mi wè tɛ yu ti kɔ mɔ gɔ.

⁸ Mɔ a mɔ 'bua zi mi, nɛ mɔ dɛa mi do kɔ mɔ ngboo, nɛ di dɔ̃ ni, mɔ kɔ̃a we gbɛ mi we ge nde?

⁹ Mɔ 'bua zi mi dati ɔ nɛ kpana ni, nɛ mɔ kɔ̃a we 'danga mi, nɛ́ kɛ wa zɛ kpana, nɛ ma 'bu ni nde?

¹⁰ Mɔ hã ngawi hã baa mi na, a ko mi. Nɛ mɔ ia kuli mi kɔ zã naa mi.

¹¹ Nɛ mɔ dɛa na, mi hɔ wele, nɛ mɔ a omulu tɛ mi, nɛ mɔ dɛ ndala tɛ mi. Mɔ dɛa gbãlã tɛ mi, nɛ mɔ a 'bɔ onĩ tɛ mi.

¹² Nɛ mɔ dɛa na mi ɔ do kpasi, do dia zã, nɛ mɔ fa do tɛ mɔ na mi 'bana do tunu li mi.

¹³ Gɛnɛ kɔ na mɛ ni, nɛ mɔ usu zi linggamɔ kɔ sila mɔ do mi. Nɛ nde da dɔ́ gɛ, mi ĩ ti ma ia.

¹⁴ Mɔ ka mɔ tɛ mi we zɔ na, mi dɛa 'dã mɔ nde. Kɔ fala kɛ mi dɛ 'dã mɔ, nɛ nde mɔ tɛ fò ku'da 'dã mɛ 'da mi gɔ.

¹⁵ Fala kɛ mi dɛ 'dã mɔ, nɛ mɔ hã etumbu hã mi. Fala kɛ mi dɛ̃ 'dã mɔ gɔ, nɛ nde dungu nza 'da mi ma dè gɔ. Nɛ zu mi dĩlĩ do sape, nɛ mi fai do 'bako iko.

¹⁶ Fala kɛ mi kpa be ngawi sĩ, hã mi ba zu mi ngɔ nde, nɛ mɔ ba mi, ɔ nɛ kɛ gbɔgbɔ ba do sa'de ni. Nɛ mɔ dɛ gba sɔ̃ mɛnɔ we zɛlɛ 'bɔ tɛ mi.

¹⁷ Mɔ tombo otemɔɛ, nɛ wa tɔ̃ hã mɔ na, mi dɛa 'dã mɔ. Nɛ zã mɔ nɔ̃lɔ̃ dɛ tɛ mi nganda wena, nɛ mɔ lengge mbé ngamɔ, we hã ma hã mi hã fai iko.

¹⁸ Aa Gale, gulu kɛ mɔ hã zi wala na, naa mi ko mi we ge nde? Ma wia zi na, mi fe 'da fala kula 'da mi, nɛ wele kpo tɛ zɔ̀ sɔ mi gɔ.

¹⁹ Mi fe zi 'da fala kula 'da mi, nɛ mi we sɔ kɔ̃ do wi kɛ wa kò a gɔ ni.

²⁰ Tũ dungu nza 'da mi ma gã̀ gɔ. 'Da kala bi sĩ, nɛ mi fe nɛ. Kɔ mɔ dá kɔ̃ mɔ tɛ mi na, mi kpa mbe yangga dati, sɛ nɛ mi fe de.

²¹ 'Da kala bi sĩ, nɛ mi fe nɛ, nɛ mi la sɛ si fala kɛ ma kɔ gba tũ, nɛ 'bako i mɔ wena ni.

²² Fala ni, gba tũ ma tũ kpã kpã, nɛ mɛnɔ vɛ̃ ma ɔ fatata do nù gɛ iko, nɛ yele ngbala i mɔ, mɛ a gba tũ.