YƆBƆ 1 - WE NU GALE 1995

Satana yamba sila Yɔbɔ

¹ Mbe wele kpo zɛ́ tɛ ngɔ nù Usi, li a a Yɔbɔ. A zɛ́ a saka wi, nɛ a a wi bɔlɔ zu. A yu kili Gale, nɛ a bɛ̃a dɛ 'dã mɔ.

² A kua zi obulu be sambo, nɛ oboko be talɛ.

³ A zi do onadalamɔ wena: obata koto sambo, osamo koto talɛ, ongɔmbɔ koto kpo, do opunda kama mɔlɔ. Nɛ a zi 'bɔ do Owi dɛa to dɛlɛ wena. A zi a gã wi kpamɔ, nɛ a nɛa ngɔ winɔ vɛ̃ tɛ si 'biti gba wese do kpamɔ.

⁴ Ozagbãlã benɔ 'da a, wa mba zi li ngba wa fai 'da wele kpo kpo sanga wa ni, we nyɔngɔ mɔ dɔ. Nɛ wa tɔlɔ zi ma do 'da zu wa kpo kpo vɛ̃. Nɛ wa sa zi tɛ mɛ 'bɔ mɔ hã oboko nya wa na, wa tɛ hã wa nyɔngɔ mɛ do lo fala nɛ kpo.

⁵ 'Da fala kɛ mba mɛ ni ma kpa zu wa vɛ̃ do'do, nɛ baa wa Yɔbɔ sa mɔ hã wa, nɛ a hã dɔnggamɔ hã Gale we wa, takɔ wa hɔ sa wi li a. A kulu ngɔ do sanga titole, nɛ a dɔ sa'de we dɔnggɔ do Gale do zu li wele kpo kpo sanga wa ni. Mba gɔ, a lengge zi na, mbe gɔ nɛ nde wa dɛa 'dã mɔ, nɛ wa dã zu li Gale do kɔ sila wa. Yɔbɔ dɛ zi na mɛ ni 'da fala fai.

⁶ Mbe ngba soe kpo, nɛ oanzɛnɔ 'da NWA Gale wa hɔa 'da a we tɔ̃ we dɛa tonɔ 'da wa hã a. Nɛ Satana lia tɛ mɛ 'bɔ sanga wa.

⁷ Nɛ NWA aka a na: “Mɔ yula do nde?” Nɛ Satana gese na: “Mi ngbala sɔ mbe nyanga mi dɛ ngɔ nù i we soko ma.”

⁸ Nɛ NWA aka 'bɔ a na: “Mɔ zɔa wi toe 'da mi Yɔbɔ nde? Wele ɔ nɛ a ni ngɔ nù i bina. A a saka wi, nɛ a a wi bɔlɔ zu. A yu kili mi, nɛ a bɛ̃a dɛ 'dã mɔ.”

⁹ Nɛ Satana gisa na: “Yɔbɔ yú kili mɔ yala gɔ.

¹⁰ Mɔ fɔ́mɔ́ a de wena gɔ nde? Ma ɔ nɛ kɛ mɔ zĩ ngbo dɛ tɛ̃ a, do nu fɛlɛ a, do tɛ kpamɛnɔ 'da a vɛ̃ zĩ ni. Mɔ wila nu mɔ tɛ dɛa toe 'da a, nɛ gili sa'denɔ 'da a, wa kpá ngɔ nù gɛ vɛ̃ gɔ nde?

¹¹ Nɛ nde mɔ 'be mbe tɛ kpamɛnɔ 'da a, nɛ a dã sɛ mɔ do dɛla dɛ gbali mɔ ni ngboo!”

¹² Nɛ NWA tɔ̃ hã Satana na: “Mɔ nɛ́, hã mɔ dɛ́ do kpamɛnɔ 'da a vɛ̃ nɛ́ kɛ zã mɔ kɔ̃a ni, nɛ nde kɔ̃ mɔ tɛ gbò tɛ̃ a gɔ.” Nɛ Satana kulu ngɔ, nɛ a la.

Obenɔ 'da Yɔbɔ wa fia, nɛ kpamɛnɔ 'da a 'danga

¹³ Mbe ngba soe kpo, nɛ obulu benɔ do oboko benɔ 'da Yɔbɔ wa mba li ngba wa kɔ tɔa 'da kpasa wi ti wa, hã wa tɛ nyɔngɔ mɔ do nɔ dɔ̃.

¹⁴ Nɛ mbe wi to hɔ 'da Yɔbɔ i, nɛ a tɔ̃ hã a na: “Ongɔmbɛnɔ 'da mɔ wa sɔ tɛ dɛ to li fɔ i, nɛ pundanɔ wa tɛ nyɔngɔ mɛ dɛ kɛ zã wa ni.

¹⁵ Kɔ owi ngɔ nù Saba wa hɔa, nɛ wa gbɛ Owi dɛa tonɔ 'da mɔ, nɛ wa zũ sa'denɔ vɛ̃. Nɛ mi zu mi kpo a mi kpasa, hã mi tɛa we tɔ̃ 'da nɛ hã mɔ.”

¹⁶ Kɔ wi toe ni 'bana tɔ̃ tɔ̃a iko, nɛ mbé nɛ le 'bɔ, nɛ a na: “Kolo ua dã li nza i, nɛ ma kala obatanɔ 'da mɔ, do Owi zɔ mɔ tɛ wa, nɛ ma ngutu wa vɛ̃. Nɛ mi zu mi kpo a mi kpasa, hã mi tɛa we tɔ̃ 'da nɛ hã mɔ.”

¹⁷ Nɛ wele ki ni tɛ dà nu ɛ gɔ, nɛ mbé nɛ le, nɛ a na: “Okalde wa tɛa ngɔ gili wa talɛ, nɛ wa tia ngɔ Owi dɛa tonɔ 'da mɔ, nɛ wa gbɛ wa, nɛ wa kala osamonɔ 'da mɔ. Nɛ mi zu mi kpo a mi kpasa, hã mi tɛa we tɔ̃ 'da nɛ hã mɔ.”

¹⁸ A ni tɛ fì nu a nù gɔ, nɛ mbé nɛ le 'bɔ, nɛ a na: “Obulu benɔ do oboko benɔ 'da mɔ, wa sɔ tɛ nyɔngɔ mɔ do nɔ dɔ̃ kɔ tɔa 'da kpasa wi ti wa i,

¹⁹ nɛ gba bũ kamba yula li go i, nɛ ma gbini 'bolo zã tɔa nalɛ nɛ Nɛ tɔa gbɛsa dɛ ngɔ wa, nɛ wa fe. Nɛ mi zu mi kpo a mi kpasa, hã mi tɛa we tɔ̃ 'da nɛ hã mɔ.”

²⁰ Yɔbɔ nɛa we zele ni, nɛ a kulu ngɔ, nɛ a ɛ̃ tulu tɛ̃ a, nɛ a kɛlɛ zu a vɛ̃, nɛ a gu li a nù,

²¹ nɛ a na: “Mi hɔa zi nza kɔ zã naa mi do wila te mi, nɛ mi kpolo sɛ 'bɔ tɛ mi dɛ ti nù i do wila tɛ mi. NWA Gale a hã zi mɛnɔ ni hã mi, nɛ a kala 'bɔ ma kɔ̃ mi do'do. E kɔ mi dɔnggɔ zu li a!”

²² Nɛ kɔ ngamɛnɔ ni vɛ̃, Yɔbɔ dɛ̀ 'dã mɔ kpo gɔ, nɛ a tɔ̃̀ mbe 'dã zu li Gale gɔ.