Yeremi 9 - WE NU GALE 1995

Bɛlɛ gulu zu owinɔ do'do

¹ Mi kɔ̃a sɔ na, mi kpa mbe fala usu tɛ wi tɛ li gba zɔ̃ i, sɛ a mi wia we yu owinɔ 'da mi dɛ i mɔ de. We kɛ wa a owi vũ to tɛ wi, do owi bɛ̃ gɛnɛ Gale.

² Lɛfɛ wa bili nɛ́ nzabele, nɛ lɛnggɛ nu wa ba wele nɛ́ kpili ni. Wa tɔ̃́ gbãlã we ngɔ nùi 'da wa gɔ, wa kpasa tati nɛ do 'dã hã, do ɔkɔlɔ wi iko. Ma kɛ nwa tɔ̃a na: “Owinɔ 'da mi, wa dɛ tati a 'dã mɔ do 'dã mɔ, nɛ wa ĩ̀ ti mi ɔ nɛ NWA Gale 'da wa gɔ.

³ Wele kpo wè 'bɔ tɛ gbini zã a do ngba a tabi e sila a ngɔ nya a gɔ. We kɛ wa vɛ̃ wa 'bili bɛlɛ do zu li nya wa, ɔ nɛ kɛ Yakɔbɔ dɛa zi ni. Wa vɛ̃ wa tɔ̃ tɛ ngba wa wena.

⁴ Wele kpo kpo tɛ ɔlɔ ngba a, nɛ fo 'bɔ wi tɔ̃ gbãlã we bina. 'Bili bɛlɛ lia wa wena, nɛ 'dã mɔ ili do wa ia, wa wè 'bɔ we la fala nɛ gɔ.

⁵ 'Dã mɛ 'da wa gã dɛ dati, wa mbɔ́kɔ́ tɛ wa tɛ 'bili bɛlɛ gɔ, nɛ wa bɛ̃a na, wa ĩ 'bɔ ti mi NWA gɔ. Mi NWA, mi tɔ̃a ni.”

⁶ We duzu ma, NWA kɛ a do nganda vɛ̃ tɔ̃a na: “Mi nɛ fi owinɔ 'da mi kɔ ngamɔ we yamba wa ɔ nɛ kɛ wa yamba do mɔ bolo li we ni. Mbé mɔ kɛ mi wia sɔ 'bɔ we dɛ do wa ni, mɛ a mɔ ge nde?

⁷ Lɛfɛ wa ma ɔ nɛ a li kpili ni, nɛ wa tɔ̃ tati a lɛnggɛ bɛlɛ iko. Wa tɔ̃ ɛ̃fɛ̃ lɛnggɛ hã ongba wa, nɛ nde kɔ sila wa i, wa tɛ handa ongba wa.

⁸ Ma kɛ mi NWA, mi tɔ̃a na, mi wè tɛ dɛ 'bako hã owinɔ gɛ gɔ, mi nɛ bili nu gbã 'dã mɛ 'da wa hã wa.”

Ngba soe he kɔ̃a do ala nu ma wia ia

⁹ Nɛ mi Yeremi, mi tɔ̃a na: “Mi zɛ nu mi we okalanɔ, nɛ mi he kɔ̃a we ozɔ̃nɔ, we kɛ ma bɛlɛ vɛ̃, nɛ wele kpo lá 'bɔ wala do di ni gɔ. Wa zélé 'bɔ giti hiamɔ gɛlɛ onadalamɔ di ni gɔ, nɛ onɔɛnɔ do osa'denɔ wa yu fala ni vɛ̃ do'do.”

¹⁰ NWA tɔ̃a na: “Mi dɛ sɛ na, le Yeruzalɛmɛ kifi olo tɔa, nɛ osa'de zamɔ wa ɔ sɛ di ni. Ogã lenɔ tɛ ngɔ nù Yuda ma kifi sɛ li gba zɔ̀, nɛ wele wé sɛ 'bɔ we ɔ tɛ nɛ gɔ.”

¹¹ Nɛ mi aka na: “Aa NWA, gulu kɛ nùi ma 'danga, nɛ ma hɔa li gba zɔ̃ kɛ wele wè tɛ la li nɛ gɔ ni we ge nde? Wi kɛ a do hã zã, nɛ a wia we ĩ gulu nɛ ni boe nde? Nɛ wi kɛ mɔ tɔ̃a gulu nɛ hã a na, a tɔ̃ ma hã ogele winɔ ni boe nde?”

¹² Nɛ nwa gisa na: “Mɛnɔ ni ma dɛa tɛ̃ ɛ, we kɛ owinɔ 'da mi wa la fala dɛ mbulanɔ, kɛ mi ia zi hã wa ni do'do. Wa zèlè olo nu mi gɔ, nɛ wa dɛ̃ wenɔ kɛ mi tɔ̃a zi hã wa ni gɔ.

¹³ Wa dɛa yia nga zu, nɛ wa dɔnggɔ kpikima gale Bala, ɔ nɛ kɛ oyaa wa wa bia zi hã wa ni.

¹⁴ Kɔ mɔ zélé mɛ mi NWA ngɔ mɔ nyanga nza vɛ̃, mi Gale 'da obe Israɛlɛ, mi nɛ dɛ ma ni: Mi hã sɛ nwá Sanggo, kɛ ma a fã, nɛ ma ba wi ba ni hã owinɔ 'da mi na, wa nyɔngɔ, nɛ mi hã sɛ 'dã ina hã wa na, wa nɔ.

¹⁵ Mi pɛsɛ sɛ wa dɛ sanga ogele nu kɔnggɔnɔ, kɛ wa do oyaa wa, wa ĩ̀ zi ti wa dati gɔ ni. Nɛ mi tombo sɛ osoda we bi wa gbaa na wa kumu vɛ̃.”

Owi kɔ le Yeruzalɛmɛ wa sa mɔ hã owuko he kɔ̃a fio

¹⁶ NWA ngɔ mɔ nyanga nza vɛ̃ tɔ̃a na: “Nɛ lénggé ngɔ mɛnɔ ma la gɛ! Nɛ nɛ sá mɔ hã owuko he kɔ̃a fionɔ, do owanɔ kɛ wa ga zuma kɔ̃a fio ni na, wa tɛ.

¹⁷ Nɛ tɔ̃́ hã wa na, wa wɛlɛ tɛ wa, hã wa he kɔ̃a fio lɛ. Wa gá zuma kɔ̃a fie gbaa ndɔti nɛ a kɛ li lɛ ma dunu do lì, nɛ sala li lɛ ma 'bɔ do mili kɔ̃a!”

¹⁸ Wa zila hia kɔ̃a kɔ le Sioni na: “Lɛ kɔ 'bako, nɛ sape gulu zu lɛ do'do! Tɔanɔ 'da lɛ ma 'danga vɛ̃, nɛ lɛ nɛ la nùi 'da lɛ kpaa!”

¹⁹ Nɛ mi tɔ̃a na: “Nɛ, owukonɔ, nɛ zélé we NWA tɔ̃a ni, nɛ li nɛ sɔ̃. Nɛ bé zuma kɔ̃a fie hã oboko benɔ 'da nɛ, do ongba nɛ.

²⁰ Fio ɔ nɛ wi sɛlɛ kpalɛ ni, a la do falanɔ vɛ̃. A kũ do li holo tɔanɔ 'da lɛ, nɛ a le 'bɔ kɔ dia tɔa 'da ogã winɔ. A la li walanɔ, nɛ a gbɛ obenɔ. A hɔ ngɔ zandonɔ, nɛ a gbɛ ozagbãlãnɔ.”

²¹ NWA tɔ̃a 'bɔ hã mi na: “Owɔlɔ wele ma pɛsɛ tɛ falanɔ vɛ̃, ɔ nɛ kɛ wa yɛsɛ zubu tɛ kɔ fɔ ni. Wa ɔ nɛ kɛ'dɛ kɔni kɛ wa sɛlɛ, nɛ wa a do 'do wa, nɛ nde fo wi kala nɛ bina ni.”

²² NWA tɔ̃a na: “Wi hã zã tɛ dɔ̀nggɔ̀ tɛ̃ a do hã zã 'da a gɔ! Wi ngawi tɛ dɔ̀nggɔ̀ tɛ̃ a do ngawi 'da a gɔ! Nɛ wi kpamɔ tɛ dɔ̀nggɔ̀ tɛ̃ a do kpamɛ 'da a gɔ!

²³ Fala kɛ wele kɔ̃ we dɔnggɔ tɛ̃ ɛ, nɛ a dɔnggɔ tɛ̃ a na, ɛ ĩ ti mi NWA, nɛ ɛ ĩ na, kɔ̃a zã 'da mi dɛ 'da winɔ ma yɛ́kɛ́ tɛ̃ ɛ gɔ, nɛ mi kɔ̃a gbãlã we, do bɔlɔ zu dɛa mɔ. Ki ni a mɛnɔ kɛ ma de li mi NWA ni.”

^24-25 NWA tɔ̃a 'bɔ na: “'Da fala kpo, nɛ mi hã sɛ etumbu hã Oezipeto, Oyuda, Oedɔmɛ, Oamoni, Omoabɛ, do owinɔ tɛ li gba zɔ̃ i, kɛ wa kɛlɛ dati wa we dɔnggɔ ogalenɔ 'da wa ni. Owinɔ ni vɛ̃ wa nɛa gaza nɛa, nɛ nde wa dɛ́ mbula gaza gɔ. Wele kpo kɔ owinɔ ni, tabi kɔ obe Israɛlɛ a dɛ́ mbula gba tɔkɛ 'da mi gɔ.”