Yeremi 8 - WE NU GALE 1995

¹ Nɛ NWA tɔ̃a 'bɔ na: “Wa zã sɛ gbãlã onwa ngɔ nù Yuda do owi olo li wa dɛ nza. Nɛ wa zã sɛ 'bɔ kɛnɔ 'da onganganɔ, do owi gba olo nu mi Gale, do tala owinɔ kɔ le Yeruzalɛmɛ vɛ̃.

² Nɛ wa yɛlɛ sɛ ma dɛ li tua wese, do li zɛkɛ, do osɔlanɔ. We kɛ owinɔ ni wa kɔ̃ zi gɛnɛ wese, do zɛkɛ do osɔlanɔ wena. Wa hã zi odɔnggamɔ hã ma, nɛ wa ba tɛ wa we ma, nɛ wa dɔnggɔ zi ma ɔ nɛ gale 'da wa ni. Wa ngɛmɛ sɛ gbãlã winɔ ni, nɛ wa gésé sɛ ma dɛ kɔ kɔ̃ olo nɛ gɔ. Ma pɛsɛ sɛ do ngɔ nùi vɛ̃ ɔ nɛ wɔkɔsɔ ngɔ zubu ni.

³ Nɛ kɔ nu kɔnggɔ o'dã winɔ ni, wanɔ wa 'bana sɛ do tunu li wa tɛ falanɔ mi pɛsɛ do wa ni, wa zɔ sɛ na, fe fio ma dia nɛa ngɔ 'bana nza. Mi NWA, kɛ mi do nganda vɛ̃, mi tɔ̃a ni.”

Owinɔ 'da Gale wa dɛa sɔkpɔ tala nga zu

⁴ NWA tumba mi na, mi tɔ̃ hã winɔ 'da a na: “Fala kɛ wele te, nɛ nde a kúlú 'bɔ ngɔ gɔ nde? Fala kɛ wele yɔ wala, nɛ nde a kpóló 'bɔ tɛ̃ a 'do gɔ nde?

⁵ Kɔ gulu kɛ nɛ owinɔ 'da mi, nɛ siki 'do nɛ hã mi, nɛ nɛ kɔ̃̀ we kpolo tɛ nɛ 'da mi gɔ we ge nde? Nɛ 'bana e sila nɛ ngɔ okpikimanɔ 'da nɛ, nɛ nɛ kɔ̃̀ we kpolo tɛ nɛ 'da mi gɔ.

⁶ Mi zila wenɔ nɛ tɔ̃a ni do dia nɛ, nɛ nde mɛ a gbãlã we gɔ. Wele kpo kɔ nɛ, kɛ a gbala 'dã mɛ 'da a, tabi a sa tɛ̃ a ngɔ 'dã mɛ a dɛa ni, a bina. Wele do wele ba tati a wala 'da a, ɔ nɛ mbalata kɛ a yu, nɛ a lia kɔ bolo, nɛ a kɔ̃̀ we kpolo tɛ̃ a 'do gɔ ni.

⁷ Gɛnɛ kɔ odɔndɛa, wa ĩ ti kɔ̃ tũ kulu tɔa 'da wa, nɛ oyanggenɔ, do oganakelenɔ do okonggonɔ wa ĩ 'bɔ ti kɔ̃ tũ kɛ wa nɛ kpolo do tɛ wa ni. Nɛ nde nɛ, owinɔ 'da mi, nɛ ĩ̀ ti mɔ kpo kɔ mbulanɔ mi ia zi hã nɛ ni gɔ.

⁸ Kɔdɛ kɛ nɛ tɔ̃ na, nɛ a Owi hã zã, nɛ nɛ ĩ ti mbulanɔ 'da mi ni nɛ nde? Nɛ zɔ́, owi dɛ mbulanɔ wa a Owi bɛlɛ. Wa kpula mbula 'da mi, nɛ wa 'danga ma do'do.

⁹ Mɛ a sape we Owi hãnɔ 'da nɛ, wa ĩ̀ ti mɛ wa dɛ ni gɔ. Bili olo nu wa ma ba wa wele nɛ. Wa bɛ̃a we nu mi nwa, ni a wa kpa sɛ 'bɔ mbé hã do nde?

¹⁰ Gulu nɛ a mi nwa, mi kala sɛ fɔnɔ 'da wa, do wukonɔ 'da wa, nɛ mi 'dɔlɔ wa hã ogele wele. We duzu kɛ wele do wele, be tabi kpasa nɛ, a fa tati a kpasi 'da a zu a kpo. Nɛ owi gba olo nu mi do onganganɔ, wa vɛ̃ a owi zũ iko.

¹¹ Wa zɔ ngamɛ 'da owinɔ 'da mi li wa yala iko, nɛ wa tɛ tɔ̃ na: ‘Mɛnɔ la vɛ̃ do dia nɛ!’ Ĩ na, ma lá do dia nɛ gɔ.

¹² Sape 'dã mɛnɔ 'da wa ma bá li wa gɔ, nɛ wa ĩ̀ ti gbala 'dã mɛnɔ 'da wa gɔ. Gulu nɛ a mi nwa, mi nɛ hã etumbu hã wa. Wa te sɛ ɔ nɛ kɛ ogele winɔ wa tia ni. Nɛ wele kpo kúlú sɛ ngɔ gɔ.”

¹³ NWA tɔ̃a 'bɔ na: “Mi kɔ̃a sɔ we ngɛmɛ li owinɔ 'da mi, ɔ nɛ kɛ wele ngɛmɛ do li kpalɛ mɔ́ a ni. Nɛ nde wa ɔ nɛ te vinɔ kɛ gbakɔ̃ nɛ ngɔ nɛ bina, tabi te figɛ kɛ wala nɛ ngɔ nɛ bina, nɛ onwá nɛ kula vɛ̃ do'do ni. Ma kɛ mi kɔ̃a we 'dɔlɔ wa hã ogele winɔ.”

¹⁴ Nɛ owinɔ 'da Gale wa na: “Gulu kɛ lɛ 'bana dɛ dɛ we ge nde? Lɛ ngɛ́mɛ́ ngba lɛ, hã lɛ yú dɛ kɔ lenɔ kɛ gba ngbonɔ zĩ ma takpa ni, hã lɛ 'bɔ́ fie do i mɔ! NWA Gale 'da lɛ a 'dɔlɔ lɛ hã fio ia. A dɛa na, lɛ zɔ ngamɔ, ɔ nɛ wi kɛ a nɔa 'dã ina ni, we duzu kɛ lɛ dɛa 'dã mɔ gbali a.

¹⁵ Lɛ lingga zi na, mɛnɔ ma de sɛ, nɛ lɛ kpa sɛ dungu fio, nɛ nde mɔ na mɛ ni bina. Mɛ ma hɔ hã lɛ, mɛ a Sɔkpɔ tala kili.

¹⁶ Owi sɛnɛ lɛ wa hɔa kɔ le Danɛ ia, lɛ tɛ zele giti gɛlɛ ombalatanɔ 'da wa. Wa nɛ he mɔ, nɛ nùi ma tana. Owi sɛnɛ lɛ wa tɛa we 'danga nùi 'da lɛ, do mɛnɔ ngɔ nɛ vɛ̃. Wa tɛa we 'danga gã le 'da lɛ, nɛ wa gbɛ owinɔ kɔ nɛ vɛ̃.”

¹⁷ NWA tɔ́a na: “Mi nɛ tombo Owi sɛnɛ nɛ hã nɛ. Wa 'danga ɔ nɛ odã gɔ́ ni. Wa gɔmɔ sɛ nɛ, nɛ wele kpo wé sɛ we ɔkɔlɔ wa do zuma gɔ.”

Yeremi hia 'bako tɛ owinɔ 'da a

¹⁸ Mi Yeremi, sila mi zɛlɛ wena, 'bakoe 'da mi gã la li, nɛ fo ina nɛ bina.

¹⁹ Nɛ zélé! Tɛ ngɔ nùi gɛ vɛ̃, owinɔ 'da mi wa tɛ he mɔ na: “NWA Gale a 'bànà kɔ le Sioni gɔ nde? Nɛ le Sioni ma 'bɔ do nwa bina nde?” Nɛ NWA Gale kɛ a a nwa 'da wa ni, a gisa na: “Gulu kɛ nɛ nɔ̃lɔ̃ zã mi we ge nde? Gulu kɛ nɛ dɔnggɔ okpikimanɔ, nɛ nɛ gu gba zugolo dati ofumbu galenɔ we ge nde?”

²⁰ Nɛ winɔ wa hia 'bɔ mɔ na: “Zɔlɔ li kole ma ia, nɛ 'da fala kala kpalɛnɔ ma la 'bɔ do'do, nɛ nde lɛ, lɛ tɛ kpàsà gɔ.”

²¹ Mi zɔ zɛlɛ tɛ kɛ owinɔ 'da mi wa kpa gɛ, nɛ ma zɛlɛ sila mi wena. Gbãlã tɛ mi ma gbini vɛ̃. Mi kɔ gã 'bako, nɛ mi tɛ dungu gɛla nɛ.

²² Fo ina tɛ kɔ le Galadɛ bina nde? Nɛ fo 'bɔ monganga di ni bina nde? Ina boe, nɛ monganga 'bɔ boe! Kɔ gulu kɛ owinɔ 'da mi wa kpásá gɔ we ge nde?

²³ Mi kɔ̃a sɔ na, zã zu mi dunu do mili kɔ̃a, nɛ gbali mi sulu do lì, sɛ a mi hia kɔ̃a, tũ do gba wese, we owinɔ 'da mi kɛ wa fia ni de.