Yeremi 7 - WE NU GALE 1995

Yeremi tɛ be we kɔ Tɛmpɛlo

^1-3 NWA tumba mi na, mi nɛ, hã mi yolo tɛ nu tɔa Tɛmpɛloe, fala Oyuda wa le nɛ we dɔnggɔ do ɛ ni. A tɔ̃a hã mi na, mi yolo dɛ di ni, nɛ mi tɔ̃ toe gɛ hã winɔ na, ɛ NWA ngɔ mɔ nyanga nza vɛ̃, Gale 'da obe Israɛlɛ, ɛ tɔ̃a hã wa na: “Nɛ kpóló li wala nɛ ba ma gɛ, do mɛnɔ nɛ dɛ gɛ, sɛ nɛ mi la sɛ nɛ na, nɛ 'bana dɛ ngɔ nùi gɛ de.

⁴ Mbe winɔ wa ɔkɔlɔ tɛ wa na: ‘Tɛmpɛloe 'da NWA ma kɛ! Lɛ kpasa ia! Tɛmpɛloe 'da NWA ma kɛ! Tɛ lɛ nganda ia!’ Nɛ tɛ zèlè lɛnggɛ bɛlɛnɔ wa tɔ̃ ni gɔ.

⁵ “Nɛ kpóló li wala nɛ ba ma gɛ, nɛ nɛ 'dáfá dɛa to tɛ nɛ. Nɛ 'bílí we 'da ngba nɛ do bɔlɔ nɛ.

⁶ Nɛ lá fala fa kpasi 'da nɛ dɛ ngɔ ogɛnɛnɔ, obe gulanɔ, do owi fio wilinɔ. Nɛ lá fala gbɛ owinɔ kɛ wa dɛ̃ 'dã mɔ gɔ ni. Nɛ nɛ lá fala dɔnggɔ ogele galenɔ, da dɛ kɔ nɛ kpá ngamɔ gɔ.

⁷ Fala kɛ nɛ kpolo dɛa to tɛ nɛ, nɛ mi la sɛ nɛ na, nɛ 'bana dɛ ngɔ nùi gɛ, kɛ mi hã zi ma hã oyaa nɛ do mɔ wa ni.

⁸ “Nɛ nde nɛ, nɛ 'bana tɛ gbini zã nɛ do lɛnggɛ bɛlɛnɔ, kɛ ma do gulu nɛ bina ni fai.

⁹ Nɛ 'bana tɛ zũ mɔ, gbɛ wele, ɔ do wuko 'da ngba nɛ, kana tɛ nɛ do bɛlɛ, gbɛ sa'de we dɔnggɔ do gale Bala. Nɛ nɛ dɔnggɔ ogele galenɔ kɛ nɛ ĩ̀ zi ti wa dati gɔ ni.

¹⁰ Nɛ dɛ mɛnɔ kɛ mi sɛnɛ ma ni, nɛ 'do nɛ, nɛ nɛ tɛ kɔ Tɛmpɛloe 'da mi, nɛ nɛ yolo dati mi, nɛ nɛ na: ‘Lɛ kpasa ia!’

¹¹ Nɛ lengge na, Tɛmpɛloe 'da mi mɛ a tɔa usu tɛ wi mɔ́ owi zũ nde? Mi zɔa mɛnɔ nɛ tɛ dɛ ma ni.

¹² Nɛ kúlú ngɔ, hã nɛ nɛ́ tɛ kɔ le Silo, kɛ mɛ a kuti fala mi saka zi takɔ wa dɔnggɔ do mi ni, nɛ nɛ zɔ sɛ tɛlɛ tɛ kɛ mi 'danga do ma ni. Mi dɛa ni we duzu 'dã mɛnɔ 'da owinɔ 'da mi, obe Israɛlɛ.

¹³ Nɛ nde nɛ, obe Yuda nɛ dɛa tɛ mɛ 'bɔ o'dã mɛnɔ ni vɛ̃. Gɛnɛ kɔ mi wila we hã nɛ 'do ngbɛ ɛ do 'do ngbɛ ɛ, nɛ nɛ bɛ̃a we zele ma. Mi sa zi mɔ hã nɛ, nɛ nɛ kɔ̃̀ nu mi gɔ.

¹⁴ Nɛ 'bana tɛ gbini zã nɛ do Tɛmpɛloe 'da mi gɛ, nɛ nde mi dɛ sɛ do ma kpasaa, ɔ nɛ kɛ mi dɛa zi do le Silo ni.

¹⁵ Nɛ mi 'dɔlɔ sɛ nɛ nyɛlɛ do mi ndũu, ɔ nɛ kɛ mi 'dɔlɔ zi do onya nɛ Oisraɛlɛ ni. Mi NWA, mi tɔ́a ni.”

Gale bɛ̃a na Yeremi tɛ sàmbàlà we winɔ gɔ

¹⁶ NWA tɔ́a na: “Mɔ Yeremi, mɔ tɛ sàmbàlà we owinɔ gɛ gɔ. Mɔ tɛ àlà nu mɔ hã mi we wa gɔ. Nɛ mɔ tɛ dàlà nu mɔ gɔ, we kɛ mi zélé sɛ mɔ gɔ.

¹⁷ Mɔ ĩ ti mɛnɔ vɛ̃ kɛ wa tɛ dɛ ma kɔ lenɔ ngɔ nù Yuda, do tɛ li walanɔ kɔ le Yeruzalɛmɛ ni.

¹⁸ Obenɔ wa kala ogbã gua, nɛ owi wilinɔ wa dã wenɔ, nɛ owukonɔ wa dɔ mukate we hã do dɔnggamɔ hã gale wuke, kɛ wa sa li a na Nwa wuko li nza ni. Nɛ wa tulu 'bɔ mi, we kɛ wa hã dɔ́ we dɔnggɔ do ogele galenɔ.

¹⁹ Nɛ nde wi kɛ wa tulu a wi a mi nde? Gɔ, wa dɛ ki ni dɛ tɛ wa wele nɛ, nɛ sape nɛ ma ba sɛ li wa.

²⁰ Ma kɛ mi NWA Gale, mi nɛ sulu nɔ̃lɔ̃ zã 'da mi dɛ ngɔ le gɛ. Mi sulu sɛ ma dɛ ngɔ owinɔ do osa'denɔ, dɛ ngɔ ote zamɔ, do okpalɛnɔ ngɔ nùi gɛ. Nɛ nɔ̃lɔ̃ zã 'da mi ma ɔ sɛ nɛ nyɛa we kɛ wele kpo wè tɛ bi ma gɔ ni.”

Owinɔ wa bɛ̃a we nu Gale 'da wa

²¹ NWA Gale 'da obe Israɛlɛ tɔ́a hã wa na: “Nɛ, owinɔ 'da mi, nɛ mbá sa'denɔ kɛ nɛ gbɛ, nɛ nɛ dɔ hã mi ni, do kɛnɔ nɛ gbɛ we be dɛa na ni, hã nɛ nyɔngɔ ma do tɛ nɛ wele nɛ. We kɛ ma dɛ́ mɔ kpo tɛ mi gɔ.

²² 'Da fala kɛ mi fua zi oyaa nɛ ngɔ nù Ezipeto dɛ nza ni, nɛ mi è zi mbula hã wa si ngɔ dɔ sa'de, tabi hã gele dɔnggamɔ hã mi gɔ.

²³ Mi ia zi tati nɛ a mbula hã wa na, wa zele nu mi, sɛ a mi hɔa Gale 'da wa, nɛ wa hɔ tɛ mɛ 'bɔ owinɔ 'da mi de. Mi ia zi mbula ni hã wa na, wa dɔnggɔ ma, sɛ nɛ wa kpa sɛ dia dungu de.

²⁴ Nɛ nde wa zèlè mi gɔ, nɛ wa gɛ̀ mbe zala wa tɛ wenɔ mi tɔ́a hã wa ni gɔ. Wa dɛa mɛnɔ kɛ nga zui 'da wa, do 'dã wɔ kɔ sila wa, ma tombo wa na wa dɛ ni. Nɛ wa la fala siki li wa dɛ 'da mi do'do, nɛ wa siki 'do wa hã mi.

²⁵ Yolo tɛ kɔ tũi kɛ mi fua zi do oyaa nɛ tɛ ngɔ nù Ezipeto dɛ nza ni, gbaa we hɔ sɔɛ gɛ, mi là fala tombo Owi tonɔ 'da mi, we gba olo nu mi hã nɛ gɔ.

²⁶ Nɛ nde wele kpo zèlè mi gɔ, nɛ fo wi a tɛ̃ a do wenɔ 'da mi bina. Nɛ vɛ̃, nɛ hɔa owi nga zu, nɛ nɛ dɛa mɔ tɛ nɛ 'danga nɛa ngɔ kɛ 'da oyaa nɛ.

²⁷ “Ma kɛ mɔ Yeremi, mɔ tɔ̃ sɛ wenɔ ni vɛ̃ hã owinɔ 'da mi, nɛ nde wa zélé sɛ mɔ gɔ. Mɔ sa sɛ mbila 'da mi hã wa, nɛ nde wa gésé sɛ nu nɛ hã mɔ gɔ.

²⁸ Nɛ mɔ tɔ̃ sɛ hã wa na: ‘Nɛ a Owi kɛ nɛ kɔ̃̀ we zele we nu NWA Gale 'da nɛ gɔ, nɛ nɛ bɛ̃a mbisa wenɔ 'da a. Nɛ gbíní 'bɔ zã nɛ do a gɔ, we kɛ nɛ zɔ na, ki ni a ã dɛa mɔ, kɛ ma la zi ia.’ ”

Winɔ wa dɛa 'dã mɔ kɔ gbangɔlɔ̃ Hinɔmɛ

²⁹ NWA tɔ̃a na: “Nɛ Oyuda, nɛ kɛ́lɛ́ du mili zu nɛ, kɛ ma be na nɛ a owinɔ 'da mi ni, nɛ nɛ a ma zamɔ. Nɛ gá zuma kɔ̃a fio tɛ ngɔ kalanɔ, we kɛ zã mi nwa ma nɔ̃lã, nɛ mi bɛ̃a gɛnɛ nɛ owinɔ 'da mi do'do.”

³⁰ Nɛ nwa tɔ̃ 'bɔ na: “Oyuda wa dɛa 'dã mɔ, wa faka Tɛmpɛloe 'da mi. Wa kala okpikimanɔ kɛ mi sɛnɛ ma ni, nɛ wa a ma kɔ nɛ.

³¹ Wa 'dafa fala tɛ kɔ gbangɔlɔ̃ Hinɔmɛ, nɛ wa sa li nɛ na ‘Tɔfɛtɛ’. Wa 'dafa fala ni we dɔ do obulu benɔ, do oboko benɔ 'da wa do dɔnggamɔ. Ĩ na, mi bà zi mbe nu mi hã wa ni fala kpo gɔ, nɛ mi lènggè zi 'bɔ mbe do mɔ ɔ ni fala kpo gɔ.

³² Gulu nɛ a mbe tũ kpo, nɛ wa sá sɛ 'bɔ li fala ni na, ‘Tɔfɛtɛ’, tabi ‘Gbangɔlɔ̃ Hinɔmɛ’ gɔ. Nɛ nde wa sa sɛ li nɛ na, ‘Gbangɔlɔ̃ kumu Owele.’ We duzu kɛ fo sɛ fala mi do fio bina, nɛ wa mi sɛ wa dɛ di ni.

³³ Nɛ owɔlɔ winɔ ni ma dɛ sɛ nyɔngɔmɔ nu onɔɛ do osa'de zamɔ. Nɛ fo sɛ wi ndaka wa tɛ nɛ bina.

³⁴ Nùi ma 'danga sɛ vɛ̃. Nɛ mi dɛ sɛ na, tɛ kɔ lenɔ ngɔ nù Yuda, do li walanɔ kɔ le Yeruzalɛmɛ, wa tɛ zèlè 'bɔ giti hiamɔ gbalimɔ, do hiamɔ yangga, do ozuma ba ngba wi gɔ. Mi NWA, mi tɔ̃a ni.”