Yeremi 6 - WE NU GALE 1995

Le Yeruzalɛmɛ nɛ 'da 'danga

¹ Aa nɛ, owi nu kpala Bɛnzamɛ, nɛ hɔ́ nza kɔ le Yeruzalɛmɛ, nɛ nɛ yú, hã nɛ usu tɛ nɛ! Nɛ zɛ kɛ'dɛnggu kɔ le Tekoa, nɛ nɛ dã gba nyɛa we tɛ Bɛtɛ-Kerɛmɛ we mbese winɔ na, bolo boe. We kɛ Owele wa yula tɛ si gbãlã ngɔ, kɔ wa tɛ tɛ nɛ we hã tala ngamɔ hã nɛ.

² Gã le Sioni ma dia nɛ ge nde ni, nɛ nde ma 'danga sɛ vɛ̃.

³ Ogele nwa wa tɛ sɛ do sodanɔ 'da wa dɛ di ni, nɛ wa zĩ sɛ tɔa tandenɔ 'da wa kpa 'do le vɛ̃, nɛ wele do wele a 'danga sɛ fala kɛ zã a kɔ̃a ni.

⁴ Nɛ wa tɔ̃ sɛ na: “Lɛ kúlú ngɔ, kɔ le bí le Yeruzalɛmɛ! Lɛ 'dáfá tɛ lɛ, kɔ lɛ bi wa do midi!” Kɔ wa nɛ ka mɔ, nɛ nde wese gɛ̃a do'do, nɛ tũi ma ngɔ tũ nɛ ia.

⁵ Nɛ wa na: “Ma dɛ mɔ gɔ, lɛ bi wa do tũi, sɛ a lɛ 'danga ogba ngbonɔ 'da wa de.”

⁶ NWA ngɔ mɔ nyanga nza vɛ̃ ba nu ɛ hã Onwanɔ ni na, wa gɔmɔ ote, nɛ wa kimili ma dɛ 'do ngboe, nɛ wa kũ do ngɔ nɛ we zĩlĩ dɛ kɔ le Yeruzalɛmɛ i. Nɛ a tɔ̃a 'bɔ na: “Mi hã sɛ etumbu hã owinɔ kɔ le ni, we kɛ wa zɛlɛ tɛ ngba wa wena.

⁷ 'Dã mɛnɔ 'da wa ma kũ kũ fai ɔ nɛ zu lì kɛ ma ɔ̃́sɔ̃́ fala kpo gɔ ni. Wa zele di ni tati a lɛnggɛ zɛlɛ tɛ ngba wi, do lɛnggɛ gbɛ wi. Nɛ mi nwa, mi zɔ kɔ le ni tati a 'dã dɛa to tɛ wi, do zɛlɛ tɛ.

⁸ Aa nɛ, Owi kɔ le Yeruzalɛmɛ, e kɔ ngamɛnɔ nɛ kpa gɛ ma sɔ̃ li nɛ. Ní gɔ, nɛ mi fo sɛ tɛ mi 'do nɛ do'do, nɛ mi dɛ sɛ na, le 'da nɛ ma hɔ li gba zɔ̃, kɛ wele wè we ɔ tɛ nɛ gɔ ni.”

Obe Israɛlɛ wa bɛ̃a we zele toe 'da Gale

⁹ NWA ngɔ mɔ nyanga nza vɛ̃ tɔ̃a hã mi na, mi nɛ́ hã mi kala tala obe Israɛlɛ, kɛ wa 'bana do tunu li wa ni vɛ̃, ɔ nɛ kɛ wi 'bi wala vinɔ dɔlɔ do tala wala nɛ ngɔ te nɛ ni. Mi fá wele kpo kpo, nɛ mi gese a dɛ 'da ɛ dati kɛ na, 'da fala ni ma we ni.

¹⁰ Nɛ mi gisa na: “Mi tɔ̃ hã wa, tabi mi mbese wa, nɛ wi nɛ zele sɛ mi a wio nde? Zala wa la do'do, nɛ wa bɛ̃a we zele toe 'da mɔ. Nɛ wenɔ mɔ nwa, mɔ tombo mi we tɔ̃ hã wa ni, mɛ a mɔ gbɔlɔ mɔmu li wa iko. Wa kɔ̃́ we zele we kpo gɔ.

¹¹ Nɔ̃lɔ̃ zã 'da mɔ NWA dɛ tɛ wa, ma lia kɔ mi, nɛ ma dunu do mi, nɛ mi wè 'bɔ tɛ kunu sila mi gɔ.” Ma kɛ NWA tɔ̃a hã mi na, mi yɛnggɛ 'da li walanɔ, nɛ mi pɛ́sɛ́ nɔ̃lɔ̃ zã 'da mi dɛ ngɔ benɔ, do ozagbãlãnɔ do obe zɔnganɔ. Wa kala sɛ winɔ vɛ̃, Owi wili do owuko, okpasa wi do ogbɛlɛ, nɛ wa 'dɔlɔ wa.

¹² Nɛ wa hã sɛ tɔa olo wa hã ogele wele, nɛ wa dɛ sɛ 'bɔ do ofɔnɔ do owukonɔ 'da wa ni. “Do gbãlã we, mi nwa, mi nɛ hã etumbu hã owinɔ ngɔ nùi gɛ.

¹³ We duzu kɛ wele do wele, be tabi kpasa wi, a fa tati a kpasi 'da a zu a kpo. Nɛ owi gba olo nu mi, do onganganɔ, wa vɛ̃ a owi zũ iko.

¹⁴ Wa zɔ ngamɛ 'da owinɔ 'da mi li wa yala iko. Nɛ wa tɔ̃ na: ‘Mɛnɔ la vɛ̃ do dia nɛ!’ Ĩ na, ma lá do dia nɛ gɔ.

¹⁵ Sape 'dã mɛnɔ 'da wa ma bá li wa gɔ, nɛ wa ĩ̀ ti gbala 'dã mɛnɔ 'da wa gɔ. Gulu nɛ a mi nwa, mi nɛ hã etumbu hã wa. Wa te sɛ, ɔ nɛ kɛ ogele winɔ wa te ni. Nɛ wele kpo kúlú sɛ ngɔ gɔ. Mi NWA, mi tɔ̃a ni.”

Obe Israɛlɛ wa bɛ̃a we dɛ olo nu Gale

¹⁶ NWA tɔ̃a hã owinɔ 'da a na: “Nɛ yóló mbe nù tɛ li wala nɛ ba ma gɛ, hã nɛ sókó mɔ sɛ. Nɛ áká we walanɔ kɛ oyaa nɛ wa ba zi ni, nɛ nɛ fá dia kɛ, nɛ nɛ ba ma, sɛ a nɛ kpa dungu fio de.” Nɛ wa gisa na, lo dɛ́ sɛ ni gɔ.

¹⁷ Ma kɛ NWA a Owi gba olo nu a, takɔ wa mbese obe Israɛlɛ na, li wa sɔ̃, we kɛ kɛ'dɛnggu bolo tɛ dɔ̃lɔ̃ nɛ! Nɛ wa gisa na, ma dɛ́ mɔ tɛ lo gɔ.

¹⁸ Nɛ NWA tɔ̃a na: “Nɛ, owinɔ ngɔ nù gɛ, nɛ zélé mɛ ma nɛ dɛ obe Israɛlɛ ni, hã nɛ ĩ́ ti nɛ.

¹⁹ Nɛ, owinɔ nyanga nza gɛ vɛ̃, nɛ zélé! Mi nɛ tombo ngamɔ hã wa olo 'dã linggamɛnɔ 'da wa. Wa dɛ zi kili wena mi tɔ̃a hã wa ni gɔ, nɛ wa kɔ̃ zi gɛnɛ wenɔ mi bia hã wa ni gɔ.

²⁰ Gulu kɛ wa nɛ ngɔ nù Saba, nɛ wa oso nɔ yɔmbɔ we dɔnggɔ do mi we ge nde? Gulu kɛ wa nɛ ndũu nyɛlɛ wena, nɛ wa oso onwá kɛ ma unu de wena ni, nɛ wa tɛ nɛ we dɔnggɔ do mi we ge nde? Mi kɔ̃ sɛ gɛnɛ osa'denɔ wa gbɛ wa, nɛ wa dɔ wa ngɔ gbagala we dɔnggɔ do mi ni gɔ.

²¹ Gulu nɛ a mi kpe sɛ wala ti wa, nɛ wa lo sɛ li wa do mɛ mi kila do li wala ni, nɛ wa te, nɛ wa fe vɛ̃. Obaa benɔ do obulu benɔ wa fe sɛ fala nɛ kpo do ongba wa wi tɔanɔ, do oyali ngba wa.”

Owi bolonɔ wa yula si gbãlã ngɔ

²² NWA tɔ̃a na: “Owele wa yula ndũu si gbãlã ngɔ, kɔ wa tɛ tɛ ma. Mɛ a Owele kɛ wa nganda wena, nɛ wa 'dafa tɛ wa, kɔ wa tɛ bolo.

²³ Osodanɔ 'da wa, wa kala onzabelenɔ do osɛlɛnɔ 'da wa dɛ ngɔ. Wa 'danga wena, nɛ fo 'bako li wa bina. Wa kũ ngɔ mbalatanɔ 'da wa, nɛ wa 'dafa tɛ wa we bi le Yeruzalɛmɛ. Nɛ giti nyanga ombalatanɔ ni ma dɔ̃lɔ̃ ɔ nɛ giti ngele gba lìnɔ, kɛ ma go'do dɛ ngɔ ni.”

²⁴ Nɛ owi Yeruzalɛmɛ wa na: “Lɛ nɛa we zele sakoe ni, nɛ gbãlã kɔ̃ lɛ gbini vɛ̃, nɛ kili ba lɛ. Nɛ lɛ tana ɔ nɛ wuko kɛ a kɔla do kula ni.”

²⁵ Nɛ wa tɔ̃ 'bɔ na: “Lɛ tɛ hɔ̀ nza gɔ, lɛ tɛ yɛnggɛ zamɔ gɔ, we kɛ Owi sɛnɛ lɛ wa kpa falanɔ ni vɛ̃, hã wa 'bɔ we gbɛ lɛ iko. Falanɔ vɛ̃ mɛ a kili do kili.”

²⁶ NWA tɔ̃a hã owinɔ 'da a na: “Nɛ hé'dé tulu gɛla, nɛ nɛ kímílí tɛ nɛ do nù. Nɛ ndó dungu gɛla, ɔ nɛ wi kɛ a dungu gɛla kpo bulu be 'da a ni, we kɛ Owi sɛnɛ nɛ, kɛ wa tɛ tɛ we 'danga le 'da nɛ ni, wa kɔla fala gbanga nɛ ia.

²⁷ Yeremi, mi ia mɔ do wi yamba sila owinɔ 'da mi, ɔ nɛ kɛ wa yamba do dia mɔ bolo ni. Mɔ fá we ĩ ti dɛa to tɛ wa.

²⁸ Mɔ zɔ sɛ na, zu wa nganda ɔ nɛ tũ mɔ bolo, tabi nga mɔ bolo ni. We kɛ wa vɛ̃ a Owi dɛ nga zu, Owi tɔ̃ ngalangba, do Owi dɛ 'dã mɔ.

²⁹ Gɛnɛ kɔ wa pɛpɛ we dula, hã ma nyɛ nganda wena, nɛ nde 'dɔlɔ mɔ bolo kṹ lì gɔ, nɛ ma 'bana tɛ mɛ dɛ tɛ fɛ̃a mɔ bole iko. Ma tɛ mɛ 'bɔ ni we owinɔ 'da mi, we kɛ o'dã winɔ wa tɛ fò tɛ wa kɔ wa gɔ.

³⁰ Ma kɛ wa we sɛ wa do yia fɛ̃a mɔ bolo, we kɛ mi NWA, mi bɛ̃a gɛnɛ wa do'do.”