Yeremi 52 - WE NU GALE 1995

Osoda Babilɔnɛ wa ba le Yeruzalɛmɛ

¹ Sedekiasi hɔa zi nwa ngɔ nù Yuda, nɛ nde a zi do 'bu sabɛlɛ bɔa ngɔ nɛ kpo. Nɛ a dɛa to nwa 'da a tɛ Yeruzalɛmɛ 'do sabɛlɛ 'bu ngɔ nɛ kpo. Li naa a zi a Hamutalɛ, be 'da Irmeya, wi Libna.

² Nwa Sedekiasi dɛa zi mɔ kɛ ma dè tɛ NWA Gale gɔ ni, kpasaa ɔ nɛ kɛ Yoakimɛ dɛa zi ni.

³ Mɛnɔ vɛ̃ kɛ ma la zi tɛ kɔ le Yeruzalɛmɛ, do ngɔ nù Yuda ni, ma nɔ̃lɔ̃ zi zã NWA Gale wena. Nɛ a 'dɔla zi owinɔ 'da a ndũu nyɛlɛ do a. Nwa Sedekiasi bɛ̃a zi we nu Nabukɔdɔnɔzɔrɛ, nwa ngɔ nù Babilonia.

⁴ Kɔ ma hɔa kɔ zɛkɛ 'bu, zɛkɛ 'da 'bu, tɛ kɔ kusi sabɛlɛ dɛa to nwa 'da Sedekiasi tɛ ngɔ nù Yuda, nɛ nwa Nabukɔdɔnɔzɔrɛ kulu ngɔ do osodanɔ 'da a vɛ̃, nɛ wa nɛ, nɛ wa linggi gba ngbo nu le Yeruzalɛmɛ.

⁵ Wa linggi zi le, nɛ wa ɔ dɛ di ni gbaa we hɔ tɛ sabɛlɛ kɛ 'bu ngɔ nɛ kpo kɔ dɛa to nwa 'da Sedekiasi tɛ ngɔ nù Yuda.

⁶ Nɛ gba wɔ tia kɔ le, nɛ ma fila kerr, nɛ fo zi mbamba nyɔngɔmɔ be sĩ na owinɔ wa nyɔngɔ ma bina. Kɔ ma nɛa we hɔ kɔ zɛkɛ kusi, zɛkɛ 'da nalɛ, tɛ kɔ sabɛlɛ kɛ 'bu ngɔ nɛ kpo kɔ dɛa to nwa 'da Sedekiasi,

⁷ nɛ osoda Babilɔnɛ wa gbo li holo tɛ dɛlɛ gba ngbo nu le Yeruzalɛmɛ, nɛ wa le. Sedekiasi do osodanɔ 'da a wa nɛa we zɔ ni, nɛ wa hɔ nza kɔ le Yeruzalɛmɛ do tũ, nɛ wa yu, nɛ nde osoda Babilɔnɛ wa ĩ̀ fala nɛ gɔ. Nɛ wa la do nu ngbo kɛ ma tɛ ngbala gba ngbonɔ bɔa ni, nɛ wa ba wala fɔɛ 'da Sedekiasi, nɛ wa yu si dɛ li wala kɔ gbangɔlɔ̃ lì Yɔrdanɛ.

⁸ Nɛ osoda Babilɔnɛ wa ndaka 'do wa gbaa, nɛ wa kpa nwa Sedekiasi tɛ li zɔ̃ɛ dɔ́ɔ do Yeriko, nɛ nde osodanɔ 'da a vɛ̃ wa yu, nɛ wa la a zu a kpo.

⁹ Nɛ wa ba a, nɛ wa kã a hã nwa Nabukɔdɔnɔzɔrɛ. 'Da fala ni, nɛ nde a zi a kɔ le Ribla, tɛ ngɔ nù Hamatɛ. Nɛ a 'bili ngbangga 'da nwa Sedekiasi dɛ di ni.

¹⁰ Nɛ Nabukɔdɔnɔzɔrɛ ba nu a, nɛ wa 'bili gɛlɛ obulu benɔ 'da Sedekiasi dɛ gbali baa wa ni, fala nɛ kpo do ogã wi ngɔ nù Yuda vɛ̃.

¹¹ 'Do nɛ, nɛ a ba 'bɔ nu a, nɛ wa 'dɔ gbali Sedekiasi, nɛ wa ɛnzɛ a kiti kiti, nɛ wa la do a dɛ Babilɔnɛ, nɛ wa fi a bɔlɔkɔ. Nɛ Sedekiasi ɔa gbaa, nɛ a fe dɛ di ni.

Nɛbuzaradanɛ 'danga 'bɔ le Yeruzalɛmɛ dɛ dati

¹² Nwa Nabukɔdɔnɔzɔrɛ dɛa sabɛlɛ 'bu ngɔ nɛ kusi kɔ dɛa to nwa 'da a tɛ ngɔ nu Babilonia, kɔ ma nɛa we hɔ kɔ̃ zɛkɛ sambo, zɛkɛ 'da mɔlɔ, nɛ Nɛbuzaradanɛ, gã wi ngɔ owi zɔ mɔ tɛ nwa ngɔ nù Babilonia le kɔ le Yeruzalɛmɛ.

¹³ A hɔa, nɛ a fi we tɛ tɔa Tɛmpɛloe, do tɔa 'da nwa, do tɔanɔ 'da ogã winɔ kɔ le Yeruzalɛmɛ ni vɛ̃.

¹⁴ Nɛ osodanɔ 'da a wa gbini ongbo nu le Yeruzalɛmɛ dɛ nù.

¹⁵ 'Do nɛ, nɛ Nɛbuzaradanɛ kala ombe wi sãnɔ, do tala winɔ kɛ wa 'bana zi dɛ di ni ni, mba do owanɔ wa hã zi tɛ wa hã nwa ngɔ nù Babilonia, do tala owi dɛ si'bili mɛnɔ, nɛ a si do wa kɔlɔ 'duli.

¹⁶ Nɛ a la dɛ ngɔ nù Yuda tati a tala Owi sãnɔ, kɛ wa zi do mɔ kpo bina ni na, wa wa fɔ, nɛ wa 'dafa ti vinɔnɔ.

¹⁷ Osoda Babilɔnɛ wa gbini obɛlɛduma tũ mɔ bole, kɛ ma zi dɛ nu tɔa Tɛmpɛloe ni. Nɛ wa 'danga 'bɔ ongilingilinɔ, kɛ wa ia zi mɛ ɔ nɛ gba sani tũ mɔ bole dɛ ngɔ nɛ, nɛ ma ɔ zi dɛ li fanda kɛ zã tɔa Tɛmpɛloe ni. Wa kala tũ mɔ bole ni vɛ̃, nɛ wa tombo do ma dɛ Babilɔnɛ i.

¹⁸ Nɛ wa kala 'bɔ omɛnɔ vɛ̃ kɛ wa dɛa ma do tũ mɔ bolo, nɛ wa dɛ zi do to we dɔnggɔ do Gale ni. Mɛ zi a omɔ a do bũ, opau, omɔ 'be do mɔ, do obila.

¹⁹ Nɛ gã wi ngɔ owi zɔ mɔ tɛ nwa kala 'bɔ omɛnɔ vɛ̃ kɛ wa dɛa ma do mɔ mbali, tabi do fɛ̃a mɔ bolo ni. Mɛ zi a obe sani, omɔ bi do mwinda, osani kpɔ do tɔkɔ sa'denɔ, omɔ a do bũ, omɔ a do mwindanɔ, obila do okpana.

²⁰ Omɛnɔ vɛ̃ kɛ nwa Salɔmɔ dɛa zi ma do tũ mɔ bolo we 'dafa do Tɛmpɛloe 'da nwa ni, wa wè zi we e ma ngɔ kilo we ĩ ti dĩ ma gɔ, we kɛ ma dɛlɛ zi la li ngele. Mɛ zi a obɛlɛduma tũ mɔ bolo bɔa, do mɔ ɔ korr nɛ gba sani, nɛ wa ia ma dɛ li 'do owili ngɔmbɔ 'bu ngɔ wa bɔa, do ongilingilinɔ.

²¹ 'Da ngala bɛlɛduma kpo kpo zi a mɛtrɛ kusi, nɛ 'da gã zã nɛ mɛtrɛ gazɛlɛ. Holo zi kɔ obɛlɛdumanɔ ni boe, nɛ gã nu mɔ bolo nɛ, mɛ zi a sãtimɛtrɛ ngbɛ'dɛ'dɛ.

²² Wa dula zi 'bɔ mɔ ɔ nɛ ndasa ni bɔa do tũ mɔ bolo, nɛ wa gu dɛ zu bɛlɛdumanɔ ni. 'Da ngala ndasa kpo kpo zi a mɛtrɛ bɔa do dɔ nɛ. Nɛ wa gɛzɛ odɔkpɔ kɛ ma kasa ngbɛ ɛ ni dɛ tɛ zu bɛlɛduma kpo kpo. Nɛ wa gɛzɛ 'bɔ lɔnggɔ fɛlɛ wala te grenadɛ bɔa do tũ mɔ bolo dɛ zu obɛlɛdumanɔ ni. Obɛlɛdumanɔ bɔa ni, do ogɛzamɛnɔ tɛ nɛ vɛ̃, ma wia zi kɔ̃.

²³ Dɛ zu bɛlɛduma kpo kpo, wa gɛzɛ zi 'bɔ wala te grɛnadɛ kama kpo, nɛ wa lɔnggɔ fɛlɛ ma dɛ 'do ngbɛ ɛ. Kɔ wele yolo nù nga, nɛ a zɔ tati a wala te grenadɛ 'bu nɛ kusi ngɔ nɛ gazɛlɛ iko.

²⁴ Nɛbuzaradanɛ, gã wi ngɔ owi zɔ mɔ tɛ nwa Nabukɔdɔnɔzɔrɛ ba nu a, nɛ wa kala gã nwa nganga Sɛraya, do kosolo nwa nganga Sɛfania, do ogele onganga talɛ kɛ wa zɔ mɔ tɛ nu tɔa Tɛmpɛloe ni.

²⁵ Nɛ a ba 'bɔ nu a, nɛ wa kala mbe gã wi ngɔ osodanɔ, do Owi dɛa tonɔ 'da nwa zu wa sambo, do wi kɔmɔ mbɛtinɔ 'da nwa ngɔ osodanɔ, do obe Yuda 'bu wa gazɛlɛ. Winɔ ni vɛ̃, wa zi dɛ kɔ le Yeruzalɛmɛ.

²⁶ Nɛbuzaradanɛ kala wa, nɛ a kã wa hã nwa ngɔ nù Babilonia tɛ Ribla, tɛ ngɔ nù Hamatɛ.

²⁷ Wa hɔa i mɔ, nɛ nwa ba nu a, nɛ wa gbɛ owinɔ ni do ti. Tɛlɛ tɛ kɛ Oyuda wa la zi nɛ kɔlɔ 'duli nyɛlɛ do nùi 'da wa ndũu gɛ a ni.

²⁸ Nɛ zɔ̀ ngɔ gili owinɔ vɛ̃ kɛ nwa Nabukɔdɔnɔzɔrɛ kala zi wa, nɛ a si do wa kɔlɔ 'duli kɔ sambo sabɛlɛ dɛa to nwa 'da a gɛ: A kala obe Yuda 3.023.

²⁹ Kɔ a dɛa sabɛlɛ 'bu ngɔ nɛ ngbɛ'dɛ'dɛ kɔ dɛa to nwa 'da a, nɛ a kala Owi kɔ le Yeruzalɛmɛ 832.

³⁰ Kɔ a dɛa sabɛlɛ 'bu nɛ bɔa ngɔ nɛ talɛ, nɛ Nɛbuzaradanɛ, gã wi ngɔ Owi zɔ mɔ tɛ̃ a kala obe Yuda 745. Wa mba vɛ̃, nɛ wa hɔ Owele 4.600.

Nwa ngɔ nù Babilonia da kɔ̃ a tɛ nwa Yoakinɛ

³¹ Yoakinɛ, nwa ngɔ nù Yuda ɔa 'bu sabɛlɛ talɛ ngɔ nɛ sambo tɛ kɔlɔ 'duli, nɛ Evilɛ-Merodakɛ hɔ nwa ngɔ nù Babilonia. Kɔ ma nɛa we hɔ kɔ̃ zɛkɛ 'bu nɛ bɔa ngɔ nɛ sambo, zɛkɛ 'da 'bu ngɔ nɛ bɔa do kpo kɔ sabɛlɛ ni, nɛ nwa Evilɛ-Merodakɛ ĩ 'bako hã Yoakinɛ, nɛ a fo a kɔ bɔlɔkɛ dɛ nza.

³² Nɛ a wele we do a do dia sila, nɛ a e a ngɔ ongba a nwanɔ kɛ wa zi do a kɔlɔ 'duli tɛ kɔ le Babilɔnɛ i ni.

³³ Nɛ a tɔ̃ hã Yoakinɛ na, a tɛ hè'dè 'bɔ tuli 'da Owi bɔlɔkɔnɔ gɔ. Nɛ yolo dɛ di ni, Yoakinɛ nyɔngɔ zi mɔ fala nɛ kpo do nwa ngɔ nù Babilonia.

³⁴ Na mɛ ni, nwa ngɔ nù Babilonia hã zi mɛ kɛ ma wia tɛ gala Yoakinɛ ni hã a tũ kpo kpo, gbaa nɛ Yoakinɛ fe do ma.