Yeremi 50 - WE NU GALE 1995

Osodanɔ tɛ si gbãlã ngɔ wa ba nù Babilonia

¹ Nɛ zélé we kɛ NWA tɔ̃a hã mi Yeremi, dɛ ngɔ le Babilɔnɛ, do nù Babilonia gɛ.

² A na: “Mɔ tɔ̃́ toe gɛ hã onu kɔnggɔ winɔ vɛ̃! Mɔ yɛ́'bɛ́ sako nɛ! Mɔ tɔ̃́ ma dɛ nza, mɔ tɛ ùsù we kpo gɔ! Wa ba le Babilɔnɛ! Mɛ a sape we okpikimanɔ do ogale bɛlɛnɔ 'da owinɔ kɔ le ni! Mɛ a 'bako we gale kɛ li a a Bɛlɛ, do gale Mardukɛ!

³ Ogele wele wa yula si gbãlã ngɔ, kɔ wa tɛ we bi Obabilonia, nɛ wa kifi sɛ nù Babilonia do li go, kɛ wele wè we ɔ se'de gɔ ni. Owinɔ do osa'denɔ wa yu sɛ vɛ̃, nɛ mɔ kpo 'báná sɛ 'bɔ di ni gɔ.”

Obe Israɛlɛ wa kpolo tɛ wa dɛ ngɔ nùi 'da wa

⁴ NWA tɔ̃a na: “Dɛ 'do nɛ, nɛ Oisraɛlɛ do Oyuda, wa kulu sɛ ngɔ fala nɛ kpo, nɛ wa tɛ sɛ do mili kɔ̃a li wa, nɛ wa fa sɛ mi, NWA Gale 'da wa.

⁵ Wa aka sɛ we li wala kɛ ma ba dɛ tɛ le Sioni ni, nɛ wa siki sɛ li wa, nɛ wa ba do ma. Wa tɛ sɛ, nɛ wa kpa mi nwa, nɛ wa gba tɔkɔ do mi. Nɛ gba tɔkɛ ni ma ɔ sɛ sabɛlɛ do sabɛlɛ, ta zu wa élé sɛ ngɔ ma fala kpo gɔ.

⁶ “Owinɔ 'da mi wa ɔ zi nɛ obata, kɛ Owi zɔ mɔ tɛ wa wa la wa, hã wa yɔa wala do'do ni. Wa yɛnggɛ zi do ngɔ kalanɔ kpi do kpi, nɛ ta zu wa ila ngɔ ba'de 'da wa.

⁷ Owinɔ vɛ̃ kɛ wa sɛnɛ owinɔ 'da mi ni, wa kpa zi wa, nɛ wa gbɛ wa iko. Nɛ wa na, we mɔ lo bina, we kɛ winɔ gɛ wa dɛa 'dã mɔ dɛ 'da NWA, wi kele zu wa, kɛ oyaa wa wa gbini zi zã wa do a ni.

⁸ “Aa nɛ, Oisraɛlɛ, nɛ hɔ nza kɔ le Babilɔnɛ! Nɛ yú ngɔ nù Babilonia do'do! Nɛ gbíní ngbonɔ, nɛ nɛ kpé dati owi yunɔ, ɔ nɛ kɛ owili dua wa kpe dati ngɔ gili oduanɔ ni.

⁹ Mi nɛ sa mɔ hã ogba dɔa wele, nɛ mi mu wa dɛ tɛ Owi ngɔ nù Babilonia, hã wa bi wa. Owinɔ ni wa yolo sɛ si gbãlã ngɔ, nɛ wa tɛ, nɛ wa bi le Babilɔnɛ, nɛ wa ba ma. Wa a onga wi bolo ngboo. Wa da nzabele kɔ́tɔ́ gɔ.

¹⁰ Owi zũ wa zũ sɛ mɛnɔ ngɔ nù Babilonia vɛ̃, ɔ nɛ kɛ zã wa kɔ̃a ni. Mi NWA, mi tɔ̃a ni.”

Osodanɔ wa ba le Babilɔnɛ

¹¹ NWA tɔ̃a na: “Aa nɛ, Owi Babilonia, nɛ 'danga zi nùi 'da mi. Nɛ nɛ dɔnggɔ tɛ nɛ, nɛ nɛ dɛ yangga, nɛ nɛ bũlũ dɛ ngɔ, ɔ nɛ obe wili ngɔmbɔ tɛ li zɔ́, nɛ nɛ he mɔ ɔ nɛ owili punda ni!

¹² Kɔ nɛ zɔ́, owinɔ 'da nɛ wa dunu sɛ do sape, nɛ owinɔ kɔ le kɛ ma kua nɛ ni, wa fe sɛ sape. Nɛ, owi Babilonia, nɛ sɛ a nda go'do onu kɔnggɔ winɔ ngɔ nù gɛ vɛ̃, nɛ nùi 'da nɛ ma kifi sɛ li gba zɔ̃ do butu kɛnzɛ.

¹³ Mba gɔ, nɔ̃lɔ̃ zã 'da mi, ma dɛ sɛ na, wele kpo tɛ ɔ̀ 'bɔ kɔ le Babilɔnɛ gɔ. Nɛ winɔ vɛ̃ kɛ wa la sɛ wala di ni ni, wa zɔ sɛ ma, nɛ wa ɔngbɔ, nɛ wa zɛ nu wa.

¹⁴ “Aa nɛ, Owi da nzabelenɔ vɛ̃, nɛ tɛ́, hã nɛ linggi le Babilɔnɛ. Nɛ dá kpilinɔ 'da nɛ vɛ̃ hã owinɔ kɔ le ni, nɛ nɛ tɛ là tala nɛ gɔ. Mba gɔ, wa dɛa 'dã mɔ gbali mi NWA.

¹⁵ Nɛ línggí wa, nɛ nɛ hé hiamɔ bole 'da nɛ zu wa. Nɛ zɔ́, wa kala kɔ wa dɛ ngɔ, kɔ wa tɛ we hã tɛ wa hã nɛ! Ngala tɔanɔ 'da wa ma 'danga, nɛ ngbonɔ 'da wa gbini. Mi nwa, mi tɛ bili nu gbã hã Owi Babilonia. Kɔ nɛ tɛ mɛ 'bɔ, nɛ bílí nu gbã hã wa. Nɛ sí ku'da mɛnɔ kɛ wa dɛa zi do nɛ ni hã wa.

¹⁶ Nɛ dɛ́ na, Owi Babilonia, wa tɛ kpà 'bɔ wala we mi kpalɛ ngɔ nùi 'da wa, nɛ wa kala ma gɔ. Nɛ ogɛnɛnɔ vɛ̃ kɛ wa ɔ di ni ni, wa dɛ sɛ kili osodanɔ 'da nɛ, nɛ wele do wele a fa sɛ we si dɛ kɔ le 'da a.”

¹⁷ NWA tɔ̃a na: “Obe Israɛlɛ wa ɔ zi nɛ obata kɛ wa yɔa wala, kɔ ogbɔgbɔ wa tɛ ndaka wa ni. Zi dati, nɛ nwa ngɔ nù Asiri tɛa, nɛ a bi wa, nɛ a gbɛ wa. Dɛ 'do nɛ, nɛ Nabukɔdɔnɔzɔrɛ, nwa ngɔ nù Babilonia tɛa 'bɔ, nɛ a kumu tala wa vɛ̃.

¹⁸ Gulu nɛ a mi NWA ngɔ mɔ nyanga nza vɛ̃, Gale 'da obe Israɛlɛ, mi nɛ hã etumbu hã Nabukɔdɔnɔzɔrɛ, nwa ngɔ nù Babilonia, do owinɔ 'da a vɛ̃, ɔ nɛ kɛ mi hã zi hã nwa ngɔ nù Asiri ni.

¹⁹ Nɛ nde mi kala sɛ obe Israɛlɛ, nɛ mi gese wa dɛ ngɔ nùi 'da wa. Nɛ wa nyɔngɔ sɛ okpalɛ li fɔnɔ tɛ ngɔ kala Karmɛlɛ, do ngɔ nù Basanɛ. Nɛ wa nyɔngɔ sɛ 'bɔ mɔ li fɔnɔ, kɛ ma ngɔ kalanɔ tɛ ngɔ nù Efraimɛ do Galadɛ ni. Zã wa ma hɛ̃ sɛ, nɛ wa zɔlɔ sɛ mɔ kpo gɔ.

²⁰ Do 'da fala ni, nɛ Oisraɛlɛ do Oyuda, wa dɛ́ sɛ 'bɔ 'dã mɔ tabi yɔa ti dɛa mɔ gɔ. We duzu kɛ mi fo sɛ ku'da 'dã mɛnɔ zu wanɔ wa 'bana sɛ nza ni. Mi NWA, mi tɔ̃a ni.”

Gale 'bili ngbangga 'da Obabilonia

²¹ NWA tɔ̃a na: “Nɛ vɛ̃, nɛ nɛ́, hã nɛ bí owinɔ tɛ ngɔ nù Maratimɛ, do wanɔ ngɔ 'bili tɛ nù Pekɔdɛ! Nɛ gbɛ́ wa, nɛ nɛ kúmú wa vɛ̃. Nɛ dɛ́ mɛnɔ kɛ mi ba nu mi na, nɛ dɛ ni vɛ̃. Mi NWA, mi tɔ̃a ni.

²² Owinɔ wa tɛ zele giti bolo ngɔ nùi 'da wa! Nùi 'da wa ma 'danga putu putu!

²³ Ma dɛa nɛ nde? Obabilonia wa ɔ zi nɛ dɔnɔ, kɛ ma mbɔtɔ owinɔ ngɔ nù gɛ vɛ̃ ni. Kɔ ngangga ni, sanga dɔnɛ ni gbini kisi kisi. Ogele nu kɔnggɔnɔ wa zɔ tɛlɛ tɛ kɛ ma gbini ni, nɛ wa zɛ nu wa.

²⁴ Aa nɛ, Obabilonia, nɛ bi zi bolo do mi. Ma kɛ mi ndɔa bili hã nɛ. Nɛ nɛ ĩ̀ fala ma gɔ, nɛ ma ba nɛ, nɛ mbé wala we hɔ li nɛ bina.

²⁵ Zã mi NWA nɔ̃lɔ̃, nɛ mi hũi nu tɔa ngɔ mɔ bi bolonɔ 'da mi, nɛ mi kala ma dɛ nza. Mba gɔ, mi Gale, NWA ngɔ mɔ nyanga nza vɛ̃, mi nɛ dɛ ma do to tɛ ngɔ nù Babilonia.

²⁶ Nɛ, osodanɔ, nɛ kúlú ngɔ ngɔ nù gɛ vɛ̃, hã nɛ tɛ́ we bi Obabilonia. Nɛ kṹ oyangganɔ 'da wa, nɛ nɛ ngɛ́mɛ́ okpamɛnɔ 'da wa dɛ ngɔ ngbɛ ɛ, nɛ nɛ dángá ma vɛ̃! Da dɛ kɔ mɔ kpo 'bana gɔ!

²⁷ Nɛ gbɛ́ onga sodanɔ 'da wa, ɔ nɛ kɛ wa gbɛ do sa'de ni! Nɛ kúmú wa vɛ̃! Mɛ a kɔ̃ tũ 'bako we Owi Babilonia, we kɛ 'da fala kɛ mi NWA, mi nɛ hã do etumbu hã wa ni, ma wia ia!

²⁸ “Nɛ zélé gɛlɛ obe Israɛlɛ, kɛ wa zi a kɔlɔ 'duli tɛ ngɔ nù Babilonia i ni, wa tɛ yu we si dɛ kɔ le Sioni. Nɛ wa tɔ̃ sako kɛ mi NWA Gale 'da wa, mi bili do nu gbã 'dã mɛnɔ hã Owi Babilonia, olo kɛ wa 'danga zi Tɛmpɛloe 'da mi kɛ ma santo ni.”

²⁹ NWA tɔ̃a na: “Aa nɛ, Owi da nzabelenɔ, nɛ nɛ́ hã nɛ bí le Babilɔnɛ. Nɛ dɛ́ fala ɔinɔ 'da nɛ zĩ do wa takpa, nɛ nɛ kélé wala yu ti wa! Nɛ gésé olo 'dã mɛnɔ wa dɛa zi ni hã wa, nɛ nɛ dɛ́ do wa ɔ nɛ kɛ wa dɛa zi do ogele winɔ ni. Mba gɔ, wa zɔ zi tɛ wa na, wa nɛa ngɔ mi NWA Gale santo 'da obe Israɛlɛ.

³⁰ Ma kɛ ozagbãlãnɔ 'da wa, wa fe sɛ dɛ gbogbo le, nɛ osodanɔ 'da wa vɛ̃, wa kumu sɛ do kɔ̃ tũi ni. Mi NWA, mi tɔ̃a ni.

³¹ “Nɛ, Obabilonia, nɛ do ngatɛ wena, kɔ mi Gale, NWA ngɔ mɔ nyanga nza vɛ̃, mi nɛ hã etumbu hã nɛ! Ngba soe 'da mi we hã etumbu hã nɛ, ma wia ia.

³² Nɛ, Owi ngatɛnɔ, nɛ kɔ sɛ zu nyanga nɛ, nɛ nɛ te, nɛ fo sɛ wi 'be nɛ dɛ ngɔ bina. Mi fi sɛ we tɛ lenɔ 'da nɛ, nɛ ma bɛlɛ sɛ mɛnɔ kɛ zã nɛ ni vɛ̃.”

³³ NWA ngɔ mɔ nyanga nza vɛ̃ tɔ̃a na: “Obabilonia wa zɛlɛ zi tɛ Oisraɛlɛ do Oyuda. Wa kala zi wa, nɛ wa si do wa kɔlɔ 'duli, nɛ wa bɛ̃ we da kɔ̃ wa tɛ wa.

³⁴ Nɛ nde wi bi bolo zu wa, a nganda wena, li a a NWA ngɔ mɔ nyanga nza vɛ̃. A zu a kpo hã a nɛ zɔ we 'da wa, a gese sɛ dungu fio dɛ ngɔ nùi 'da wa, nɛ a fi bolo ngɔ nù Babilonia.”

NWA bili gbã hã owi Babilɔnɛ

³⁵ NWA tɔ̃a na: “Nɛ gbɛ́ owi Babilonia! Nɛ gbɛ́ owi kɔ le Babilɔnɛ! Nɛ gbɛ́ Onwanɔ 'da wa, do owi hãnɔ 'da wa vɛ̃!

³⁶ Nɛ gbɛ́ owi sɔ̃nɔ 'da wa, wa a owi bɔ iko! Nɛ gbɛ́ osodanɔ 'da wa, wa a owi dɛ kili iko!

³⁷ Nɛ 'dángá ongilingilinɔ 'da wa, nɛ nɛ gbɛ́ ombalatanɔ 'da wa! Nɛ gbɛ́ onga sodanɔ kɛ wa kala wa gele falanɔ kpi do kpi we bi bole zu wa ni, nɛ wa hɔ owuko bolo dati nɛ! Nɛ gbíní nu tɔa usu do mɛnɔ 'da wa, hã nɛ kala kpamɛnɔ kɔ nɛ vɛ̃!

³⁸ Nɛ 'dángá fua lìnɔ 'da wa, nɛ nɛ dɛ́ na, ma ɔ̃sɔ̃ kpɛrr! Mba gɔ, nù Babilonia, mɛ a nùi 'da ogba sɔ̃ kpikima, kɛ wa fi bɔ zu owinɔ.

³⁹ Gulu nɛ hã ogawala do o'banggo wa tɛ sɛ we yɛnggɛ kɔ le Babilɔnɛ, nɛ Odili wa ɔ sɛ dɛ di ni. Le Babilɔnɛ ma kulu sɛ, nɛ wele kpo ɔ́ sɛ 'bɔ di ni gɔ kɔ sabɛlɛ do sabɛlɛ.

⁴⁰ Mi 'danga sɛ le Babilɔnɛ, ɔ nɛ kɛ mi 'danga zi do le Sodɔmɛ, do Gomɔrɛ, do lenɔ kɛ zã nɛ ni. Nɛ wele kpo ɔ́ sɛ 'bɔ kɔ nɛ gɔ. Mi NWA, mi tɔ̃a ni.

⁴¹ Owele wa yula si gbãlã ngɔ. Mɛ a gã nu kɔnggɔ Owele, do gba gili Onwanɔ 'da wa. Wa yula tɛ ndɔti nùi, kɔ wa tɛ we bi bolo.

⁴² Osodanɔ 'da wa, wa kala onzabele do osɛlɛ dɛ kɔ̃ wa. Wa 'danga wena, nɛ li wa kolo wena. Giti gɛlɛ wa dɔ́lɔ́ ɔ nɛ giti ngele lì ni. Wa kũ ngɔ ombalata, nɛ wa 'dafa tɛ wa vɛ̃ kpo, we bi owi kɔ le Babilɔnɛ.

⁴³ Nwa ngɔ nù Babilonia zila sakoe ni, nɛ gbãlã zã a bi do'do. Nɛ a dɛa kili ɔ nɛ wuko kɛ a do zɛlɛ kula ni.”

⁴⁴ NWA tɔ́a na: “Mi ɔ sɛ nɛ gbɔgbɔ kɛ a yula tɛ zamɛ nu lì Yɔrdanɛ, kɔ a hɔa nza, hã a nɛ tɛ fala wa dala do osa'denɔ ni. Mi hɔ sɛ hiaa, nɛ mi ndaka sɛ owi Babilonia ngɔ nùi 'da wa, nɛ wa yu vɛ̃. Nɛ mi e sɛ nwa kɛ mi saka a ni kɔ le Babilɔnɛ. Mba gɔ, wi wia kɔ̃ do mi a wio nde? Wi wia we aka mi na, mi tɔ̃ gulu we dati ɛ ni a wio nde? Nɛ nwa kɛ a wia we yolo dati mi ni a wio nde?

⁴⁵ “Na mɛ ni, nɛ zélé mɛ mi NWA, mi 'dafa we dɛ do owi Babilɔnɛ, do Owi ngɔ nù Babilonia gɛ. Gɛnɛ kɔ obenɔ 'da wa, nɛ owele wa kala sɛ wa 'bɛdɛ 'bɛdɛ ɔ nɛ onadalamɔ ni, nɛ wa la do wa kɔlɔ 'duli. Nɛ owinɔ vɛ̃ wa zɔ sɛ wa, nɛ wa tana kili.

⁴⁶ 'Da fala kɛ owi Babilɔnɛ wa te, nɛ nùi ma tana sɛ. Nɛ hiamɔ gɛlɛ wa ma dɔ̃lɔ̃ sɛ, nɛ ma kpa ngɔ nùnɔ vɛ̃.”